បោះឆ្នោតសភាវ៉េណេស៊ុយអេឡា៖ក្រុមគណបក្សប្រឆាំងធ្វើពហិការមិនចូលរួមបោះឆ្នោត
នៅក្នុងប្រទេសវ៉េណេស៊ុយអេឡា អ្នកបោះឆ្នោតប្រមាណជា ២០លាននាក់ត្រូវបានគេអញ្ជើញឲ្យចូលរួមបោះឆ្នោតជ្រើសរើសតំណាងរាស្រ្តថ្មីនៅក្នុងសភា។ ការបោះឆ្នោតសភាលើកនេះត្រូវបានក្រុមគណបក្សប្រឆាំងភាគច្រើនធ្វើពហិការមិនចូលរួមដោយពួកគេយល់ថា ការបោះឆ្នោតនេះមិនយុត្តិធម៌ និងគ្មានតម្លាភាព។ ចំណែកគណបក្សរបស់លោកប្រធានាធិបតីនីកូឡា ម៉ាឌូរ៉ូសង្ឃឹមដណ្តើមយកសភាពីកណ្តាប់ដៃបក្សប្រឆាំងវិញ។
ចុះផ្សាយនៅថ្ងៃ៖
ការបោះឆ្នោតសភាវ៉េណេស៊ុយអេឡាលើកនេះចូលរួមដោយគណបក្សចំនួន ១០៧គណបក្ស និងមានបេក្ខជនឈរឈ្មោះសរុបប្រមាណជា ១៤ ០០០នាក់។ មានអ្នកតំណាងរាស្រ្តថ្មីចំនួន ២៧៧រូបដែលអ្នកបោះឆ្នោតវ៉េណេស៊ុយអេឡាប្រមាណជា ២០លាននាក់ត្រូវជ្រើសរើស។ តែក្រុមគណបក្សប្រឆាំងភាគច្រើនបានធ្វើពហិការមិនចូលរួមបោះឆ្នោតដោយពួកគេយល់ថា ការបោះឆ្នោតនេះមិនយុត្តិធម៌ និងគ្មានតម្លាភាព។ គួរបញ្ជាក់ថាតាំងពីឆ្នាំ ២០១៥ មកទល់ថ្ងៃនេះ ក្រុមគណបក្សប្រឆាំងដែលដឹកនាំដោយលោកហ័ន ហ្កាយដូក្នុងនាមជាប្រធានរដ្ឋសភាកំពុងមានសម្លេងភាគច្រើននៅក្នុងសភា។
តែគណបក្សរបស់ប្រធានាធិបតីលោកនីកូឡា ម៉ាឌូរ៉ូសង្ឃឹមដណ្តើមសភាពីកណ្តាប់ដៃបក្សប្រឆាំងវិញ។ អ្វីជាការកត់សម្គាល់ ការបោះឆ្នោតសភាពេលនេះធ្វើឡើង ខណៈដែលប្រទេសកំពុងបន្តឆ្លងកាត់វិបត្តិនយោបាយ និងសេដ្ឋកិច្ចយ៉ាងធ្ងន់ធ្ងរ។ តាំងពីខែវិច្ឆិកា ឆ្នាំ ២០១៩ អតិផរណាបានកើនដល់អត្រា ៤ ០០០% ហើយប្រទេសកំពុងជួបការខ្វះខាតសព្វគ្រប់ មានទឹកស្អាត ហ្កាស និងភ្លើងអគ្គិសនី។ ចាប់ពីថ្ងៃចន្ទ ទី៧ ធ្នូ លោកហ័ន ហ្កាយដូដែលជាប្រធានសភា និងជាប្រធានាធិបតីស្តីទីប្រកាសខ្លួនឯងតាំងពី ២ឆ្នាំមុនគ្រោងរៀបចំការពិគ្រោះយោបល់មួយដើម្បីបង្ហាញថា ពលរដ្ឋវ៉េណេស៊ុយអេឡាទាត់ចោលការបោះឆ្នោតសភាពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ