លោកបៃដិនបញ្ជាឲ្យទ័ពអាមេរិកវាយប្រហារតាមអាកាសលើក្រុមជីវពលស្និទ្ធនឹងអ៊ីរ៉ង់នៅក្នុងប្រទេសស៊ីរី
សហរដ្ឋអាមេរិកបានបើកការវាយប្រហារតាមអាកាសកាលពីថ្ងៃព្រហស្បតិ៍ ២៥ កុម្ភៈម្សិលមិញ នៅភាគខាងកើតប្រទេសស៊ីរី ដោយសំដៅទៅលើទីតាំងនានារបស់ក្រុមជីវពលគាំទ្រដោយអ៊ីរ៉ង់។ មន្ទីរបញ្ចកោណបាននិយាយថា នេះគឺជាសាររបស់រដ្ឋបាលអាមេរិកថ្មីដឹកនាំដោយលោកចូ បៃដិន ផ្ញើទៅកាន់ទីក្រុងតេហេរ៉ង់ ក្រោយហេតុការណ៍វាយប្រហារដោយរ៉ុកែតលើទីតាំងកងទ័ពអាមេរិកនៅអ៊ីរ៉ាក់។
ចុះផ្សាយនៅថ្ងៃ៖
ស្តាប់ - ០២:១៤
ការវាយប្រហារនេះ គឺជាសកម្មភាពយោធាដំបូងគេដែលបញ្ជាដោយលោកប្រធានាធិបតីអាមេរិកថ្មី ចូ បៃដិន ជាការឆ្លើយតបទៅនឹងការវាយប្រហារប្រឆាំងនឹងសហរដ្ឋអាមេរិកនិងសម្ព័ន្ធមិត្ត នៅក្នុងប្រទេសអ៊ីរ៉ាក់កាលពី ១១ ថ្ងៃមុន ពោលគឺនៅថ្ងៃទី ១៥ កុម្ភៈ។ នៅក្នុងការវាយប្រហារកាលណោះ មានបុគ្គលិកស៊ីវិលរបស់អាមេរិកម្នាក់ស្លាប់ និងជាច្រើននាក់ផ្សេងទៀតរងរបួស។
ក្រសួងការពារជាតិអាមេរិកបានឲ្យដឹងថា កងទ័ពខ្លួនបានធ្វើការវាយប្រហារតាមអាកាសនៅត្រង់ចំណុចត្រួតពិនិត្យព្រំដែនស៊ីរី-អ៊ីរ៉ាក់ ដោយបានកម្ទេចទីតាំងជាច្រើន ដែលជាទីតាំងគ្រប់គ្រង និងប្រើប្រាស់ដោយក្រុមជីវពលស្និទ្ធនឹងអ៊ីរ៉ង់នៅក្នុងប្រទេសស៊ីរី។
បទបញ្ជារបស់លោកប្រធានាធិបតីចូ បៃដិន ឲ្យបើកការវាយប្រហារនេះ គឺជាការឆ្លើយតបផ្នែកយោធាដ៏ស័ក្តិសមចំពោះការវាយប្រហារថ្មីៗប្រឆាំងនឹងអាមេរិកនិងសម្ព័ន្ធមិត្តនៅអ៊ីរ៉ាក់។ នេះគឺជាសម្តីរបស់អ្នកនាំពាក្យមន្ទីរបញ្ចកោណអាមេរិកលោកចន ឃឺរី បាននិយាយនៅក្នុងសេចក្តីថ្លែងការណ៍មួយ។
លោក ឃឺរី មិនបានបញ្ជាក់ប្រាប់នោះទេថាមានអ្នកស្លាប់និងរបួសឬក៏អត់ នៅក្នុងការវាយប្រហាររបស់អាមេរិកកាលពីថ្ងៃព្រហស្បតិ៍។ ក៏ប៉ុន្តែ ក្រុមអ្នកឃ្លាំមើលសិទិ្ធមនុស្សស៊ីរី បាននិយាយថា មានមនុស្ស ១៧ នាក់ ត្រូវបានសម្លាប់ក្រោយការវាយប្រហាររបស់អមារិក ត្រូវទៅលើរថយន្តដឹកទំនិញ ៣ គ្រឿងដែលផ្ទុកទៅដោយគ្រាប់បែបពីអ៊ីរ៉ាក់ នៅក្បែរទីក្រុងប៊ូកាម៉ាល់ (Bukamal) របស់ប្រទេសស៊ីរី។ អ្នកស្លាប់ទាំងអស់ គឺជាកងកម្លាំងហាស្ហ៊ីត អាល់ ស្ហាអាប៊ី (Hashed al-Shaabi) ដែលគាំទ្រដោយរដ្ឋអ៊ីរ៉ាក់ និងមានទំនាក់ទំនងស្និទ្ធជាមួយអ៊ីរ៉ង់។
ការវាយប្រហាររបស់អាមេរិកនេះ ប្រាកដជាបង្កជាបញ្ហាប្រឈមដល់រដ្ឋបាលថ្មីរបស់លោកចូ បៃដិន នៅខណៈពេល កំពុងបើកទ្វារដើម្បីបន្តការចរចាជាមួយទីក្រុងតេហេរ៉ង់ជុំវិញកិច្ចព្រមព្រៀងកម្មវិធីអាវុធនុយក្លេអ៊ែរ។
យ៉ាងណាក៏ដោយ មន្ទីរបញ្ចកោណអាមេរិកនិយាយថា លោកប្រធានាធិបតីបៃដិន មិនអាចនៅស្ងៀមបានឡើយ នៅពេលដែលបុគ្គលិកអ្នកធ្វើការឲ្យខ្លួន ឬកងទ័ពអាមេរិក ឬក៏កងទ័ពសម្ព័ន្ធមិត្ត ត្រូវរងការវាយប្រការនោះ។ មន្ទីរបញ្ចកោណបន្ថែមថា លោកបៃដិន នឹងធ្វើអ្វីគ្រប់យ៉ាងដើម្បីការពារបុគ្គល ហើយនិងសម្ព័ន្ធមិត្តរបស់ខ្លួន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ