ការសិក្សា៖ ការប្រែប្រួលអាកាសធាតុដើរតួសំខាន់ធ្វើឲ្យមេរោគកូរ៉ូណា ឆ្លងពីសត្វ ទៅមនុស្ស
តើការប្រែប្រួលអាកាសធាតុអាចចូលរួមធ្វើឲ្យមេរោគកូរ៉ូណាឆ្លងទៅ មនុស្សបានយ៉ាងម៉េច? នៅពេលក្រុមអ្នកជំនាញរបស់អង្គការសុខភាពពិភពលោក កំពុងធ្វើការស៊ើបអង្កេតរកប្រភពដំបូងនៃមេរោគកូវីដ ១៩ នៅទីក្រុងវូហាន ប្រទេសចិន ការសិក្សាមួយ ដែលចុះផ្សាយ ថ្ងៃសុក្រទី ៥កុម្ភៈ បានបង្ហាញថា ការប្រែប្រួលអាកាសធាតុ ដែលបង្កឲ្យមានអាកាសធាតុក្តៅ និងទឹកភ្លៀងដោយកន្លែង បានផ្តល់អំណោយផលឲ្យកើតមានសត្វប្រចៀវជាច្រើនប្រភេទ។ សត្វប្រចៀវដែលផ្ទុកមេរោគកូរ៉ូណា ប្រភពនៃជំងឺកូវីដ ១៩សព្វថ្ងៃនេះ។
ចុះផ្សាយនៅថ្ងៃ៖
ស្តាប់ - ០២:១៣
ក្រុមអ្នកជំនាញរបស់អង្គការសុខភាពពិភពលោកដែលកំពុងធ្វើការស៊ើបអង្កេតរកប្រភពដើមនៃមេរោគកូវី នៅប្រទេសចិន បានលើកឡើងពីលទ្ធភាពដែលថា មេរោគកូវីដដែលកំពុងឆ្លងរាតត្បាតទៅលើមនុស្សពេញ ពិភពលោកមានប្រភពមកពី សត្វព្រៃ ច្រើនជាង មកពីមន្ទីរពិសោធន៍របស់ចិន។
ការស៊ើបអង្កេតរបស់អង្គការសុខភាពពិភពលោកនៅមិនទាន់បញ្ចប់ គេនៅតែមិនទាន់ដឹងច្បាស់ថា តើមេរោគកូវីដ មេរោគកូរ៉ូណា អាចឆ្លងពីសត្វ មកមនុស្សបានតាមរយៈអ្វីនោះទេ។ ប៉ុន្តែ ការសិក្សាមួយរបស់ក្រុមអ្នកជំនាញនៅសកលវិទ្យាល័យ អង់គ្លេស Cambridg បានបង្ហាញថា ការប្រែប្រួលអាកាសធាតុដែលបានបង្កឲ្យមានអាកាសធាតុក្តៅ និងទឹកភ្លៀងជោគជាំ បានអំណោយផល សម្រាប់ការកកើតជំរក ព្រៃត្រូពិក ជំរករបស់សត្វប្រចៀវ ដែលជាអ្នកផ្ទុកមេរោគកូរ៉ូណា។
បើតាមការស្រាវជ្រាវរបស់អ្នកជំនាញ អង់គ្លេស ដោយសិក្សាទៅលើលក្ខខណ្ឌអាកាសធាតុ នៅក្នុងរយៈពេល ១០០ឆ្នាំចុងក្រោយនេះ គេសង្កេតឃើញមានសត្វប្រចៀវ កើនឡើងបន្ថែមដល់ទៅ ៤០ប្រភេទ នៅភាគខាងត្បូងប្រទេសចិន ជាប់ព្រំដែនភូមា និងឡាវ។ ដោយហេតុថា សត្វប្រចៀវមួយប្រភេទៗ អាចផ្ទុកមេរោគកូរ៉ូណា ជាមធ្យម ២ប្រភេទក្នុងខ្លួនរបស់វា គេវាយតម្លៃថា មានមេរោគកូរ៉ូណាដល់ទៅជាង ១០០ប្រភេទផ្សេងគ្នា កំពុងចរាចរ នៅក្នុងតំបន់ភាគខាងត្បូងប្រទេសចិន។
នៅពេលគេមិនទាន់អាចកំណត់ ឃើញ អន្តរការី ដែលដើរតួកណ្តាលជាអ្នកចម្លងមេរោគកូរ៉ូណាពី សត្វប្រចៀវ ទៅមនុស្ស អ្នកស្រាវជ្រាវរបស់សកលវិទ្យាល័យអង់គ្លេស វាយតម្លៃថា ការប្រែប្រួលអាកាសធាតុ ការឡើងកំដៅផែនដី ហើយនិងការបំផ្លាញ ប្រព័ន្ធជីវចម្រុះបានធ្វើឲ្យមនុស្ស និងសត្វព្រៃកាន់តែខិតចូលជិតគ្នា។ “មនុស្សរស់នៅកាន់តែក្បែរជិតជំរករបស់សត្វប្រចៀវ ដែលមានផ្ទុកមេរោគកូរ៉ូណា ការប្រែប្រួលអាកាសធាតុអាចជាកត្តាជំរុញមេរោគកូរ៉ូណាឲ្យឆ្លងមកមនុស្ស”។
នៅក្នុងការសិក្សា ដែលចុះផ្សាយកាលពី ថ្ងៃសុក្រដោយទស្សនាវដ្តីវិទ្យាសាស្រ្ត Science of the Total Environment អ្នកជំនាញបានអំពាវនាវរដ្ឋាភិបាលឲ្យចាត់វិធានការកុំឲ្យមានការពង្រីកដីកសិកម្ម ឬការអភិវឌ្ឍក្រុង ទៅក្បែរ ព្រៃសំបូរដោយសត្វព្រៃ ដើម្បីទប់ស្កាត់ការឆ្លងរាលដាលមេរោគរាតត្បាតដូចកូវីដ ទៅថ្ងៃអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ