ប៉ូលិសហៃទី៖ឃាតកម្មសម្លាប់ប្រធានាធិបតីលោក ហ្សូវឺណែល ម៉ូអ៊ីស៍មានកម្មវត្ថុនយោបាយ
នៅក្នុងប្រទេសហៃទី ៥ថ្ងៃក្រោយឃាតកម្មសម្លាប់ប្រធានាធិបតីលោកហ្សូវឺណែល ម៉ូអ៊ីស៍ នាយកនគរបាលជាតិលោកឡេអុង ឆាល៍បានប្រកាសនៅក្នុងសន្និសីទកាសែតនាយប់ថ្ងៃអាទិត្យ ទី១១ កក្កដាថា ប៉ូលិសបានចាប់ខ្លួនជនជាតិអាមេរិកដើមកំណើតហៃទីម្នាក់ឈ្មោះគ្រីស្យង់ អេម៉ានុយអែល សាណុងដែលជាមេខ្លោងរៀបចំផែនការសម្លាប់លោកម៉ូអ៊ីស៍។ បើតាមលោកឡេអុង ឆាល៍ ជនអេម៉ានុយអែល សាណុងបានធ្វើដំណើរទៅកាន់ប្រទេសហៃទីក្នុងខែមិថុនាដោយមានក្រុមការពារខ្លួនជាជនជាតិអាមេរិកដើមកំណើតកូឡុំប៊ីច្រើននាក់តាមជើងយន្តហោះឯកជនមួយគ្រឿង។ តើជនគ្រីស្យង់ អេម៉ានុយអែល សាណុងជានរណា?
ចុះផ្សាយនៅថ្ងៃ៖
ស្តាប់ - ០២:២១
បើតាមកាសែត Miami Herald ជនអេម៉ានុយអែល សាណុងដែលមានអាយុ ៦៣ឆ្នាំជាគ្រូពេទ្យម្នាក់ដែលបានរស់នៅក្នុងរដ្ឋ Florida តាំងពីជាង ២០ឆ្នាំ ហើយបើតាមនាយកនគរបាលហៃទីលោកឡេអុង ឆាល៍ ជនអេម៉ានុយអែល សាណុងបានទៅដល់ទឹកដីហៃទីនាដើមខែមិថុនា និងមានកម្មវត្ថុនយោបាយច្បាស់លាស់។ ពីដំបូងឡើយ ផែនការរបស់ជនអេម៉ានុយអែល សាណុងគឺចាប់ប្រធានាធិបតីលោកហ្សូវឺណែល ម៉ូអ៊ីស៍ទាំងរស់ ពោលមិនមែនសម្លាប់ចោលទេ។ បើតាមកាសែត Miami Herald ដដែល ដើម្បីអាចសម្រេចបាននូវផែនការចាប់លោកហ្សូវឺណែល ម៉ូអ៊ីស៍ទាំងរស់ ជនអេម៉ានុយអែល សាណុងប្រហែលជាបានជ្រើសរើសក្រុមកងកម្ម៉ង់ដូស៊ីឈ្នួលចំនួន ២២នាក់ពីក្រុមហ៊ុនសន្តិសុខរបស់វ៉េណេស៊ុយអេឡាដែលមានមូលដ្ឋានក្នុងរដ្ឋ Floride។
កម្មវត្ថុនយោបាយរបស់ជនអេម៉ានុយអែល សាណុង គឺដណ្តើមយកតំណែងប្រធានាធិបតីពីលោកហ្សូវឺណែល ម៉ូអ៊ីស៍ នេះបើតាមកាសែត Miami Herald។ ព័ត៌មានទាំងនេះបានបែកធ្លាយក្រោយពីប៉ូលិសបានសួរចម្លើយលើក្រុមកម្ម៉ង់ដូស៊ីឈ្នួល។ ក្នុងចំណោមជនសង្ស័យចំនួន ២៨នាក់ មាន ១៩នាក់កំពុងស្ថិតក្នុងកណ្តាប់ដៃប៉ូលិស។ ទន្ទឹមគ្នានេះ មានមនុស្សចំនួន ២នាក់ទៀតដែលជនអេម៉ានុយអែល សាណុងបានទាក់ទងត្រូវបានប៉ូលិសចាត់ទុកជាអ្នករួមដៃនៅក្នុងផែនការសម្លាប់ប្រធានាធិបតីលោកហ្សូវឺណែល ម៉ូអ៊ីស៍។ ដោយឡែក និងក្រៅពីការស៊ើបអង្កេតរបស់រដ្ឋអំណាចហៃទី ក្រុមអ្នកស៊ើបអង្កេតអាមេរិកមកពីស្ថាប័ន FBI ក្រសួងការបរទេស ក្រសួងយុត្តិធម៌ និងក្រសួងសន្តិសុខផ្ទៃក្នុងបានទៅដល់ហៃទីក្នុងថ្ងៃអាទិត្យ ទី១១ កក្កដា។
ពួកគេបានជួបសន្ទនាជាមួយនាយកនគរបាលហៃទីលោកឡេអុង ឆាល៍ និងមានជំនួបដាច់គ្នារវាងតួអង្គនយោបាយហៃទី ក្នុងនោះមាននាយករដ្ឋមន្រ្តី និងប្រធានព្រឹទ្ធសភា។ គួរបញ្ជាក់ថា ឃាតកម្មសម្លាប់ប្រធានាធិបតីលោកហ្សូវឺណែល ម៉ូអ៊ីស៍បានធ្វើឲ្យហៃទីធ្លាក់ក្នុងវិបត្តិស្ថាប័នកាន់តែធ្ងន់ធ្ងរថែមទៀត ពិសេសការដណ្តើមគ្នាធ្វើជាប្រធានាធិបតីស្តីទីរវាងឥស្សរជននយោបាយចំនួន ៣នាក់នាពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ