អាមេរិកចោទជនជាតិអ៊ីរ៉ង់៤នាក់ពីបទរៀបចំផែនការចាប់ពង្រត់អ្នកកាសែតរិះគន់អ៊ីរ៉ង់
រដ្ឋអាជ្ញាអាមេរិកកាលពីថ្ងៃអង្គារ ១៣ កក្កដាម្សិលមិញ បានចោទប្រកាន់ជនជាតិអ៊ីរ៉ង់ ៤នាក់ ពីបទរៀបចំផែនការចាប់ជំរិតអ្នកកាសែតអាមេរិកដើមកំណើតអ៊ីរ៉ង់ម្នាក់នៅទីក្រុងញូវយ៉ក។ បើតាមនាយកដ្ឋានយុត្តិធម៌អាមេរិក ជនជាតិអ៊ីរ៉ង់ទាំង៤នាក់ ប៉ុនប៉ងចាប់ពង្រត់យកអ្នកកាសែតទៅកាន់ប្រទេសអ៊ីរ៉ង់ដើម្បីទទួលទោសនៅទីនោះ។
ចុះផ្សាយនៅថ្ងៃ៖
ស្តាប់ - ០២:១០
ម៉ាស៊ី អេឡេណេចាត (Masih Alinejad) ដែលជាស្ត្រីអ្នកកាសែតនិងជាសកម្មដើមកំណើតអ៊ីរ៉ង់បានអះអាងនៅលើបណ្តាញសង្គមធ្វីតទ័រថា នាង គឺជាគោលដៅចាប់ពង្រត់របស់ភ្នាក់ងារអ៊ីរ៉ង់។ ស្ត្រីអ្នកកាសែតរូបនេះ បម្រើការនៅវិទ្យុសំឡេងសហរដ្ឋអាមេរិក (VOA) និងជាអ្នករិះគន់យ៉ាងខ្លាំងចំពោះរដ្ឋាភិបាលទីក្រុងតេហេរ៉ង់ពាក់ព័ន្ធបញ្ហាសិទ្ធិមនុស្សនិងស្ត្រី។
តាមរយៈវីដេអូខ្លីបមួយ អ្នកស្រីអេឡេណេចាត បាននិយាយថា គម្រោងផែនការចាប់ពង្រត់នេះ ផ្ចុងផ្តើមគំនិតដោយលោកហាសាន រ៉ូហានី ប្រធានាធិបតីអ៊ីរ៉ង់។ ចំណែកបុរសអ៊ីរ៉ង់ ៤ នាក់ដែលមានឈ្មោះនៅក្នុងការចោទប្រកាន់ រួមមានមន្រ្តីស៊ើបការណ៍សម្ងាត់អ៊ីរ៉ង់ម្នាក់ដែលជាមេខ្លោង និងមន្រ្តី ៣ នាក់ផ្សេងទៀតគឺជាអ្នកធ្វើការនៅក្រោមបង្គាប់។ ពួកគេទាំងអស់រស់នៅក្នុងប្រទេសអ៊ីរ៉ង់។ អ្នករួមគំនិតទីប្រាំម្នាក់ទៀត នៅរដ្ឋកាលីហ្វ័រញ៉ា ត្រូវបានចោទប្រកាន់ផងដែរ ពីបទផ្តល់ថវិកាគាំទ្រដល់គម្រោងមួយនេះ។
បើយោងតាមការចោទប្រកាន់របស់នាយកដ្ឋានយុត្តិធម៌អាមេរិក ភ្នាក់ងារអ៊ីរ៉ង់បានព្យាយាមជាលើកដំបូងកាលពីឆ្នាំ ២០១៨ ល្បួងឲ្យអ្នកស្រីអេឡេណេចាត ធ្វើដំណើរទៅកាន់ប្រទេសទី៣ ក្នុងបំណងចាប់ព្រងត់គាត់យកទៅកាន់ប្រទេសអ៊ីរ៉ង់ដើម្បីដាក់ពន្ធនាគារនៅទីនោះ។
បន្ទាប់មកទៀត ភ្នាក់ងារអ៊ីរ៉ង់ ក៏បានចាប់ផ្តើមគម្រោង តាមដានជនងរងគ្រោះ និងសមាជិកគ្រួសាររបស់នាង ក្នុងសង្កាត់ Brooklyn នៃទីក្រុងញូវយ៉កជាច្រើនលើកច្រើនសាក្នុងឆ្នាំ ២០២០ និង ២០២១។
ខណៈកំពុងស៊ើបអង្កេតអំពីករណីនេះ ភ្នាក់ងារ FBI អាមេរិកបាននាំស្ត្រីអ្នកកាសែត ម៉ាស៊ី អេឡេណេចាត និងស្វាមីទៅរស់នៅកន្លែងដែលមានសុវត្ថិភាព។ ក្រោយរងការប៉ុនប៉ងចាប់ពង្រត់ អ្នកស្រីអេឡេណេចាត បាននិយាយថា គាត់បានធ្វើឲ្យរដ្ឋាភិបាលក្រុងតេហេរ៉ង់មិនសប្បាយចិត្ត តាមរយៈការផ្សព្វផ្សាយជំរុញឲ្យស្ត្រីអ៊ីរ៉ង់ធ្វើបាតុកម្មប្រឆាំងនឹងច្បាប់ដែលតម្រូវឲ្យស្ត្រីពាក់ក្រណាត់ ឬក្រម៉ារុំក្បាល (Hijab) និងការរាយការណ៍ព័ត៌មានអំពីការស្លាប់របស់ប្រជាជនអ៊ីរ៉ង់ក្នុងបាតុកម្មនាឆ្នាំ ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ