ទស្សនកិច្ចផ្លូវរដ្ឋលើកទី១របស់នាយករដ្ឋមន្រ្តីអ៊ីស្រាអែលនៅអាមេរិក
នាយករដ្ឋមន្រ្តីអ៊ីស្រាអែលលោកណាវតាលី ប៊ែននែតបានទៅបំពេញទស្សនកិច្ចនៅអាមេរិក។ នេះជាទស្សនកិច្ចផ្លូវរដ្ឋលើកទី១ តាំងពីលោកប៊ែននែតបានចូលកាន់អំណាចក្នុងខែមិថុនា។ បន្ទាប់ពីបានទទួលជួបដោយរដ្ឋមន្រ្តីការបរទេស និងរដ្ឋមន្រ្តីការពារជាតិអាមេរិកនាថ្ងៃពុធ ទី២៥ សីហា លោកប៊ែននែតចូលជួបប្រធានាធិបតីលោកចូ បៃដិននៅសេតវិមានក្នុងថ្ងៃព្រហស្បតិ៍ ទី២៦ សីហា។
ចុះផ្សាយនៅថ្ងៃ៖
ស្តាប់ - ០២:១៤
នៅក្នុងដំណើរទស្សនកិច្ចផ្លូវរដ្ឋលើកទី១ លើទឹកដីអាមេរិកពេលនេះ ប្រមុខរដ្ឋាភិបាលអ៊ីស្រាអែលលោកណាវតាលី ប៊ែននែតមិនខ្វះប្រធានរឿងដើម្បីជជែកជាមួយប្រធានាធិបតីអាមេរិកលោកចូ បៃដិនទេ។ តែអ្វីដែលមេដឹកនាំទាំងពីរត្រូវធ្វើមុនគេ គឺការស្វែងយល់គ្នា និងស្គាល់គ្នាឲ្យបានស៊ីជម្រៅថែមទៀតក្នុងនាមជាអ្នកទើបឡើងកាន់តំណែងថ្មីថ្មោងដូចគ្នា។ ទោះជាយ៉ាងនេះក្តី លោកប៊ែននែតមិនញញើតនឹងបញ្ជាក់ថា លោកបៃដិនជាមិត្តចាស់ និងជាមិត្តពិតម្នាក់របស់រដ្ឋអ៊ីស្រាអែល។ អតីតឯកអគ្គរដ្ឋទូតអាមេរិកប្រចាំអ៊ីស្រាអែលលោក Dan Kurtzer បានយល់ឃើញថា ទស្សនកិច្ចរបស់លោកប៊ែននែតនៅអាមេរិកពេលនេះនឹងផ្តល់សន្ទុះថ្មីដល់ទំនាក់ទំនងរវាងអាមេរិក និងអ៊ីស្រាអែល ក្រោយពីអ៊ីស្រាអែលស្ថិតក្រោមការដឹកនាំរបស់លោកនេតាន់យ៉ាហ៊ូរយៈពេល ១២ឆ្នាំ។
អ្វីដែលអ៊ីស្រាអែលសង្ឃឹមចង់បាន គឺស្មារតីថ្មីនៃទំនាក់ទំនងជាមួយរដ្ឋបាលអាមេរិករបស់លោកបៃដិនដែលនឹងខុសគ្នារវាងរដ្ឋបាលអាមេរិកជំនាន់លោកត្រាំ និងរដ្ឋាភិបាលអ៊ីស្រាអែលជំនាន់លោកនេតាន់យ៉ាហ៊ូ។ ក្រៅពីសង្ឃឹមពង្រឹង និងផ្តល់សន្ទុះថ្មីឲ្យទំនាក់ទំនងទ្វេភាគី លោកប៊ែននែតមិនអាចបំភ្លេចនិយាយជាមួយលោកបៃដិននូវប្រធានរឿងអាទិភាពមួយបានទេ។ ប្រធានរឿងអាទិភាពនោះ គឺសំណុំរឿងនុយក្លេអ៊ែរអ៊ីរ៉ង់។ អ្វីដែលលោកប៊ែននែតចង់និយាយជំនះលោកបៃដិននៅក្នុងរឿងនុយក្លេអ៊ែរអ៊ីរ៉ង់នេះ គឺសុំឲ្យលោកបៃដិនបោះបង់ចោលវិញនូវគំនិតចង់នាំអាមេរិកចូលក្នុងកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ ជាថ្មី។
គួររម្លឹកថា កិច្ចព្រមព្រៀងមួយនេះត្រូវបានអតីតប្រធានាធិបតីអាមេរិកលោកត្រាំដកអាមេរិកចេញក្នុងឆ្នាំ ២០១៨ និងបានដាក់ទណ្ឌកម្មជាថ្មីលើអ៊ីរ៉ង់។ បន្ទាប់មក នៅមានសំណុំរឿងប៉ាឡាស្ទីនដែលមេដឹកនាំទាំងពីរលើកទៅនិយាយដោយចៀសមិនផុត។ តែនៅក្នុងបទសម្ភាសន៍មួយឲ្យកាសែត The New York Times លោកប៊ែននែតបានបញ្ជាក់ជាមុនរួចជាស្រេចថា អ៊ីស្រាអែលយល់ព្រមមិនកាត់យកដីប៉ាឡេស្ទីននៅតំបន់ស៊ីហ្សកដានី តែអ៊ីស្រាអែលក៏មិនយល់ព្រមឲ្យមានរដ្ឋប៉ាឡេស្ទីនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ