របាយការណ៍ចារកិច្ចអាមេរិកថាការឡើងកម្តៅផែនដីនឹងបង្កភាពតានតឹងជាសកល
ទីភ្នាក់ងារចារកិច្ចសម្ងាត់របស់អាមេរិក កាលពីថ្ងៃព្រហស្បតិ៍ ២១ តុលាម្សិលមិញបាននិយាយជាលើកដំបូងថា ការប្រែប្រួលអាកាសធាតុបង្កការគំរាមកំហែងខ្ពស់ដល់សន្តិសុខជាតិអាមេរិក។ ក្រៅពីនេះ របាយការណ៍ចារកិច្ចអាមេរិកថ្មីបានបង្ហាញថាដែរថាការកើនឡើងកម្តៅផែនដីបង្កជាហានិភ័យខ្ពស់ដល់ស្ថិរភាពនៅជុំវិញពិភពលោកទាំងមូល។
ចុះផ្សាយនៅថ្ងៃ៖
ស្តាប់ - ០២:២០
ការកើនឡើងកម្តៅនៃភពផែនដីនឹងបង្កជាការគំរាមកំហែងកាន់ខ្លាំងដល់ផលប្រយោជន៍សន្តិសុខជាតិអាមេរិក មានតាំងពីផលប៉ះពាល់លើរាងកាយដែលអាចជំរុញឲ្យមានការបញ្ហាផ្នែកសន្តិសុខដែលត្រូវប្រឈម រហូតដល់វិធីសាស្ត្រដែលប្រទេសនានាត្រូវឆ្លើយតបទៅនឹងការប្រែប្រួលអាកាសធាតុ។ នេះគឺជាការលើកឡើងរបស់សេតវិមានដោយសង្ខេបចេញពីរបាយការណ៍របស់ទីភ្នាក់ងារស៊ើបការណ៍សម្ងាត់អាមេរិក។
ការព្យាករណ៍ខាងលើនេះបានធ្វើឡើងនៅក្នុងការវាយតម្លៃជាផ្លូវការលើកដំបូងដោយការិយាល័យប្រធានចារកម្មជាតិអាមេរិក ឬហៅកាត់ថា ODNI។ យោងតាមទីភ្នាក់ងារអាមេរិក ការប្រែប្រួលអាកាសធាតុកំពុងជំរុញឲ្យភាពតានតឹងផ្នែកភូមិសាស្ត្រនយោបាយកើនឡើង ស្របពេលដែលប្រទេសនានានិយាយរុញដាក់គ្នាថាទៅវិញទៅមកថាអ្នកណាគួរសកម្មភាពនេះ សកម្មភាពនោះបន្ថែម។ ចំណែកឯផលប៉ះពាល់ ត្រូវគេរំពឹងថានឹងកើតមានភាគច្រើននៅក្នុងប្រទេសក្រីក្រដែលពិបាកនឹងអាចសម្របខ្លួនបាន។
រូបភាពនៃពិភពលោកមួយដែលមិនអាចសហការគ្នាទប់ស្កាត់ការកើនឡើងកម្តៅផែនដីបាននាំឲ្យមានការប្រកួតប្រជែងនិងអស្ថិរភាពប្រកបដោយគ្រោះថ្នាក់នៅជុំវិញពិភពលោក។ របាយការណ៍ចារកិច្ចអាមេរិកបានសង្កត់ធ្ងន់ថានៅខណៈប្រទេសជាច្រើនឆ្លើយតបទៅនឹងវិបត្តិអាកាសធាតុដោយព្យាយាមមិនឲ្យប៉ះពាល់ដល់សេដ្ឋកិច្ចរបស់ពួកគេ អស្ថិរភាពបង្កឡើងដោយការកើនឡើងកម្តៅផែនដីកំពុងលេចចេញនៅក្នុងប្រទេសមួយចំនួន។
សេតវិមានអាមេរិកនិយាយថា អង្កភាពសន្តិសុខជាតិរបស់ខ្លួននឹងរួមបញ្ចូលផលប៉ះពាល់នៃការប្រែប្រួលអាកាសធាតុទៅក្នុងផែនការរបស់ពួកគេ។ ជាឧទាហហរណ៍ មន្ទីរបញ្ចកោណនឹងពិចារណាពីបញ្ហាប្រែប្រួលអាកាសធាតុនៅគ្រប់កម្រិតដើម្បីធានាការពារសន្តិសុខជាតិអាមេរិក ក្នុងបរិបទដែលកាន់តែស្មុគស្មាញខ្លាំងឡើង។
ការធ្វើចំណាកស្រុកដែលជាបញ្ហារសើបផ្នែកនយោបាយនៅតាមព្រំដែនភាគខាងត្បូងរបស់អាមេរិក ក៏ត្រូវបានគេមើលឃើញថាមួយផ្នែកដែលជាប់ពាក់ព័ន្ធនឹងហានិភ័យបង្កឡើងដោយការប្រែប្រួលអាកាសធាតុដែរ។
គួរជ្រាបថា ការវាយតម្លៃខាងលើគឺជាលើកទីមួយហើយដែលរដ្ឋាភិបាលទីក្រុងវ៉ាស៊ីនតោនទទួលស្គាល់ជាផ្លូវការនិងរាយការណ៍អំពីទំនាក់ទំនងហានិភ័យ និងការកើនឡើងកម្តៅផែនដី។ របាយការណ៍ចារកិច្ចអាមេរិកដែលមានកម្រាស់២៧ ទំព័រនេះត្រូវបានចេញផ្សាយមុនកិច្ចប្រជុំកំពូលអាកាសធាតុCOP26របស់អង្គការសហប្រជាជាតិដែលគ្រោងផ្តើមប្រព្រឹត្តធ្វើទៅនៅស្កុតឡែនដ៏នាថ្ងៃទី ៣១ តុលាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ