អាមេរិកចាប់បើកព្រំដែនឡើងវិញក្រោយពីបិទអស់រយៈពេល២០ខែ
សហរដ្ឋអាមេរិកនៅថ្ងៃចន្ទ ទី៨ វិច្ឆិកា ឆ្នាំ២០២១ ចាប់ផ្តើមបើកច្រកព្រំដែនគោក និងអាកាសរបស់ខ្លួនឡើងវិញ ទទួលអ្នកដំណើរដែលបានចាក់វ៉ាក់សាំងកូវីដពេញលេញហើយ។ ចំណាត់ការនេះ ធ្លាក់មកក្រោយការដាក់កំហិតរយៈពេល ២០ខែ ហាមឃាត់យ៉ាងតឹងរ៉ឹងទៅលើការធ្វើដំណើរចូលអាមេរិក មកពីជុំវិញពិភពលោកដោយហេតុកូវីដ។
ចុះផ្សាយនៅថ្ងៃ៖
ស្តាប់ - ០២:២៧
ក្រោយបិទប្រទេសអស់រយៈពេល២០ ខែរួចមក នៅទីបំផុតទៅសហរដ្ឋអាមេរិកចាប់បើកព្រំដែនទាំងផ្លូវគោកនិងអាកាសឡើងវិញហើយនៅថ្ងៃចន្ទនេះ។ ក៏ប៉ុន្តែវិធានការរឹតបន្តឹងមួយចំនួននៅតែមានសម្រាប់ការធ្វើដំណើរចូលទឹកដីអាមេរិក។
អាជ្ញាធរអាមេរិកមានគម្រោងតាមដានយ៉ាងម៉ត់ចត់នូវស្ថានភាពនៃការចាក់ថ្នាំបង្ការកូវីដរបស់អ្នកដំណើរ ហើយនឹងនៅតែតម្រូវឲ្យពួកគេធ្វើតេស្ដកូវីដអវិជ្ជមាន។
សម្រាប់អ្នកដំណើរតាមផ្លូវអាកាស ចាប់ពីថ្ងៃចន្ទ ទី៨ វិច្ឆិកានេះតទៅ នឹងត្រូវតម្រូវឲ្យទទួលបានការចាក់ថ្នាំបង្ការពេញលេញ និងត្រូវធ្វើតេស្តរកកូវីដក្នុងរយៈពេលបីថ្ងៃមុនពេលធ្វើដំណើរ។ រីឯក្រុមហ៊ុនអាកាសចរណ៍វិញ ត្រូវតម្រូវឲ្យដាក់ប្រព័ន្ធតាមដានទំនាក់ទំនង។
ដោយឡែក ការបើកព្រំដែនគោកនឹងធ្វើឡើងជាពីរដំណាក់កាល។ ការទទួលបានការចាក់វ៉ាក់សាំងបង្ការពេញលេញគឺជាកាតព្វកិច្ចសម្រាប់ការធ្វើដំណើរក្នុងករណីមិនចាំបាច់ដូចជាការទៅលេងជាលក្ខណៈគ្រួសារ ឬទេសចរណ៍ជាដើម។ យ៉ាងណាក៏ដោយ សម្រាប់ការធ្វើដំណើរក្រោមហេតុផលចាំបាច់ អាជ្ញាធរអាមេរិកនឹងនៅតែអនុញ្ញាតឲ្យចូលក្នុងប្រទេសដូចមុនដដែល ទោះបីជាអ្នកដំណើរនៅមិនទាន់បានចាក់វ៉ាក់សាំងបង្ការកូវីដ១៩ក្តី។
ចំណែក ដំណាក់កាលទីពីរដែលនឹងត្រូវចាប់ផ្តើមនៅដើមខែមករាខាងមុខ អ្នកដំណើរបរទេសទាំងអស់ត្រូវតែចាក់វ៉ាក់សាំងបានពេញលេញរួចរាល់ដើម្បីអាចចូលប្រទេសអាមេរិកតាមផ្លូវគោក មិនថាក្រោមហេតុផលណាមួយឡើយ។
សម្រាប់ការធ្វើដំណើរតាមផ្លូវអាកាស អាជ្ញាធរអាមេរិកទទួលយកអ្នកដំណើរដែលបានចាក់រាល់វ៉ាក់សាំងណាដែលទទួលស្គាល់ឲ្យប្រើប្រាស់ដោយភ្នាក់ងារឱសថអាមេរិក និងអង្គការសុខភាពពិភពលោក។ វ៉ាក់សាំងទាំងនោះរួមមាន AstraZeneca, Johnson & Johnson, Moderna, Pfizer/BioNTech, Covaxin, Sinopharm និង Sinovac៕
គួររំឭកថា ដើម្បីទប់ស្កាត់ការឆ្លងរាលដាលខ្លាំងនៃជំងឺកូវីដ ព្រំដែនរបស់អាមេរិកត្រូវបានបិទចាប់តាំងពីខែមីនា ឆ្នាំ ២០២០មក ចំពោះអ្នកដំណើរមកពីផ្នែកជាច្រើននៃពិភពលោករួមមានសហភាពអឺរ៉ុប ចក្រភពអង់គ្លេស ចិន ឥណ្ឌា និងប្រេស៊ីលជាដើម។ ភ្ញៀវទេសចរដែលធ្វើដំណើរតាមផ្លូវគោកមកពីម៉ិកស៊ិក និងកាណាដាក៏ត្រូវបានហាមឃាត់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ