ក្រុមហ៊ុនModerna ថាវ៉ាក់សាំងខ្លួនបច្ចុប្បន្នទំនងជាមិនអាចទប់ទល់នឹងអូមីក្រុងបានទេ
ខណៈមេរោគបំប្លែងខ្លួនអូមីក្រុងកំពុងរាលដាលទៅប្រទេសកាន់តែច្រើន និងបង្កឲ្យមានការព្រួយបារម្ភកាន់តែខ្លាំងនោះ ក្រុមហ៊ុន Moderna បានបង្ហាញពីក្តីបារម្ភអំពីប្រសិទ្ធភាពរបស់វ៉ាក់សាំងខ្លួនទល់នឹងមេរោគប្រភេទថ្មីនេះ។ ប្រធានក្រុមហ៊ុន Moderna បានប្រាប់កាសែត Financial Times ថា វ៉ាក់សាំង Moderna បច្ចុប្បន្នទំនងជានឹងមិនអាចទប់ទល់នឹងមេរោគអូមីក្រុងបាននោះទេ ហើយក្រុមហ៊ុនត្រូវចាយពេលជាច្រើនខែដើម្បីផលិតវ៉ាក់សាំងដែលមានប្រសិទ្ធភាពអាចបង្ការទល់នឹងមេរោគបំប្លែងខ្លួនថ្មីមួយនេះបាន។
ចុះផ្សាយនៅថ្ងៃ៖
ស្តាប់ - ០២:១៧
នៅក្នុងបទសម្ភាសន៍មួយដែលចេញផ្សាយនៅថ្ងៃអង្គារ ទី៣០ វិច្ឆិកានេះនាយកប្រតិបត្តិក្រុមហ៊ុនផលិតវ៉ាក់សាំងអាមេរិក Moderna លោកស្ទេហ្វាន បង់សេល (Stéphane Bancel) បានឲ្យដឹងថា ទិន្នន័យនឹងអាចរកឃើញពីប្រសិទ្ធភាពនៃវ៉ាក់សាំង Moderna បច្ចុប្បន្នក្នុងរយៈពេលពីរសប្តាហ៍ខាងមុខ។ ក៏ប៉ុន្តែអ្នកវិទ្យាសាស្ត្រគ្មានសុទិដ្ឋិនិយមនោះទេថាវ៉ាក់សាំង Moderna បច្ចុប្បន្នអាចបង្ការទល់នឹងមេរោគបំប្លែងខ្លួនអូមីក្រុងបាន។
ការទាញសញ្ញាអាសន្នរបស់ប្រធានក្រុមហ៊ុន Moderna នេះបានកើតឡើងស្របពេលដែលរដ្ឋមន្ត្រីសុខាភិបាលរបស់ក្រុមប្រទេសមហាអំណាចឧស្សាហកម្ម G7 បើកកិច្ចពិភាក្សាបន្ទាន់មួយស្តីអំពីមេរោគអូមីក្រុង។ អូមីក្រុងដែលកំពុងតែឆ្លងរាលដាលនៅជុំវិញពិភពលោក និងបង្ខំឲ្យប្រទេសជាច្រើនត្រលប់ទៅបិទព្រំដែន ឬដាក់កំហិតការធ្វើដំណើរជាថ្មី។
ប្រមុខក្រុមហ៊ុន Moderna មានប្រសាសន៍ដែរថាក្រុមអ្នកស្រាវជ្រាវមានការព្រួយបារម្ភដោយហេតុតែការបំប្លែងខ្លួនរបស់អូមីក្រុងទំនងជាខ្លាំងនិងយកឈ្នះលើប្រព័ន្ធការពាររបស់មនុស្សបាន។ ដូច្នោះហើយប្រសិទ្ធភាពនៃវ៉ាកសាំង Moderna ទំនងជានឹងថយចុះឥទ្ធិពលក្នុងការប្រឆាំងទល់នឹងអូមីក្រុង។
ប្រឈមនឹងមេរោគបំប្លែងខ្លួនអូមីក្រុងដែលមានហានិភ័យខ្ពស់នេះ ក្រុមហ៊ុន Moderna បានប្រកាសឲ្យដឹងថាខ្លួនបានចាប់ផ្តើមដំណើរការស្រាវជ្រាវផលិតវ៉ាក់សាំងដែលមានប្រសិទ្ធភាពទប់ទល់នឹងមេរោគនេះបាន។
ប្រធានក្រុមហ៊ុន Moderna ថាក្រុមហ៊ុនទំនងជាត្រូវចាយពេលជាច្រើនខែដើម្បីផលិតវ៉ាក់សាំង ដែលមានប្រសិទ្ធភាពអាចបង្ការទល់នឹងមេរោគបំប្លែងខ្លួនថ្មីនេះ និងថា Moderna អាចនឹងចែកចាយថ្នាំបង្ការរបស់ខ្លួនបានចន្លោះពី ២ ពាន់លាន ទៅ ៣ ពាន់លានដូសក្នុងឆ្នាំ ២០២២ខាងមុខ។
ស្រដៀងគ្នានេះដែរ ក្រុមហ៊ុនផលិតឱសថអាមេរិក Pfizer បានប្រកាសឲ្យដឹងដែរថាក្រុមហ៊ុនបានចាប់ផ្តើមដំណើរការអភិវឌ្ឍវ៉ាក់សាំង ដោយផ្តោតជាពិសេសទៅលើមេរោគអូមីក្រុងដើម្បីបង្ការទូកក្នុងករណីដែលវ៉ាក់សាំង Pfizer បច្ចុប្បន្នគ្មានប្រសិទ្ធភាពប្រឆាំងទល់នឹងមេរោគប្រភេទថ្មីដែលមានប្រភពចេញពីអាហ្វ្រិកខាងត្បូងនេះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ