ប្រជាជនអាហ្សង់ទីនធ្វើបាតុកម្មប្រឆាំងកិច្ចព្រមព្រៀងស្តីពីប្រាក់បំណុលជាមួយមូលនិធិIMF
ប្រជាជនអាហ្សង់ទីនរាប់ម៉ឺននាក់បានចុះថ្នល់ធ្វើបាតុកម្មកាលពីថ្ងៃសៅរ៍ទី ១១ធ្នូ ដើម្បី ប្រឆាំងនឹងការចុះព្រមព្រៀងណាមួយ រវាងរដ្ឋាភិបាលជាមួយមូលនិធិរូបិយវត្ថុអន្តរជាតិ IMF ស្តីពីប្រាក់បំណុល។ នៅមួយសប្តាហ៍មកនេះ មន្រ្តីរដ្ឋាភិបាល រួមទាំងអ្នកទទួលខុសត្រូវរបស់ធនាគារកណ្តាលអាហ្សង់ទីនបានធ្វើដំណើរទៅទីក្រុងវ៉ាស៊ីនតោន ដើម្បីពិភាក្សាពីរឿងដោះបំណុលប្រមាណ ៤៥ពាន់លានដុល្លារ ដែលអាហ្សង់ទីនបានទៅខ្ចីពីមូលនិធិ កាលពីឆ្នាំ ២០១៨។
ចុះផ្សាយនៅថ្ងៃ៖
ស្តាប់ - ០២:៣០
នៅទីក្រុងប៊ុយណូហ្សែរ ប្រជាជនអាហ្សង់ទីន ធ្វើបាតុកម្មប្រឆាំងរាល់កិច្ចព្រមព្រៀងរវាងរដ្ឋាភិបាលនិងមូលនិធិរូបិយវត្ថុអន្តរជាតិIMF។ នៅទីក្រុងវ៉ាស៊ីនតោន រដ្ឋាភិបាលអាហ្សង់ទីនកំពុងផ្តើមចរចា ជាមួយមូលនិធិរូបិយវត្ថុអន្តរជាតិ IMF ដើម្បីដោះស្រាយប្រាក់បំណុល ៤៥ពាន់លានដុល្លារ ដែលរដ្ឋាភិបាលអាហ្សង់ទីន អាណត្តិមុនបានទៅខ្ចីពីមូលនិធិ IMF សម្រាប់ដោះស្រាយវិបត្តិសេដ្ឋកិច្ច កាលពីឆ្នាំ ២០១៨។
ទៅតាមកិច្ចព្រមព្រៀងកន្លងមក រដ្ឋាភិបាលអាហ្សង់ទីនត្រូវបង្វិលសងប្រាក់បំណុល ប្រមាណ ១៩ពាន់លានដុល្លារ ក្នុងមួយឆ្នាំៗ នៅឆ្នាំ២០២២ និងឆ្នាំ ២០២៣។ ប៉ុន្តែ រដ្ឋាភិបាលអាហ្សង់ទីនសព្វថ្ងៃ វាយតម្លៃថា អាហ្សង់ទីននៅមិនទាន់មានសមត្ថភាពសងទាន់ពេលវេលា និងបានចរចា សុំពន្យារពេល សងប្រាក់បំណុលទាំងអស់ទៅឲ្យ មូលនិធិ IMF ពីពេលនេះ រហូតដល់ឆ្នាំ ២០២៤។
ប៉ុន្តែ សម្រាប់ប្រជាជនអាហ្សង់ទីន អ្នកដែលរដ្ឋាភិបាលត្រូវដោះស្រាយប្រាក់បំណុលជាមួយ មិនមែនមូលនិធិរូបិយវត្ថុIMF ប៉ុន្តែ គឺប្រជាជនអាហ្សង់ទីនផ្ទាល់។ ប្រជាជនអាហ្សង់ទីនមិនចង់ឲ្យមានកិច្ចព្រមព្រៀងថ្មីណាមួយរវាងរដ្ឋាភិបាលនិងមូលនិធិIMFនោះទេ ព្រោះថា ដើម្បីសងប្រាក់បំណុល IMF រដ្ឋាភិបាលអាហ្សង់ទីននឹងត្រូវចាត់វិធានការ រឹតត្បិតថវិកាជាតិ កាត់បន្ថយការចំណាយសាធារណៈបន្ថែមទៀត នៅក្នុងប្រទេសមួយ ដែលប្រជាជន៤០ភាគរយ កំពុងធ្លាក់ខ្លួនក្នុងភាពក្រីក្ររួចហើយនោះ។
សម្រាប់បាតុករ អាហ្សង់ទីន ដូចកាលឆ្នាំ ២០១៨ វិធានការរឹតត្បិតថវិកា ដើម្បីឆ្លើយតបទៅនឹងការទាមទាររបស់មូលនិធិIMF នឹងប៉ះពាល់តែប្រជាជនសាមញ្ញ ចំណែកក្រុមអ្នកមាន នៅតែអាចគេច មិនបង់ពន្ធ ដោយសារអំពើពុករលួយក្នុងជួររដ្ឋាភិបាល។
គួររំលឹកជូនថា នៅក្នុងអំឡុងវិបត្តិហិរញ្ញវត្ថុដ៏ធ្ងន់ធ្ងរ នៅឆ្នាំ ២០០១ នៅពេលអាហ្សង់ទីន គ្មានសមត្ថភាពសងប្រាក់បំណុលជាង ៩១ពាន់លានដុល្លារ និងកំពុងជួបវិបត្តិសង្គម ភាពក្រីក្រ និងការងើបបះបោរ កុប្បកម្មរបស់ប្រជាជន ដោយសារតែភាពគ្មានការងារធ្វើ មូលនិធិរូបិយវត្ថុអន្តរជាតិ បានចូលខ្លួនជួយប្រទេសអាហ្សង់ទីន។ ប៉ុន្តែ ក្នុងនាមជាម្ចាស់បំណុលផ្តាច់មុខរបស់អាហ្សង់ទីន មូលនិធិ IMF បានទាមទារឲ្យរដ្ឋាភិបាលធ្វើកំណែទម្រង់សេដ្ឋកិច្ចជាច្រើន ដែលនៅក្នុងនោះ មានផងដែរវិធានការរឹតត្បិតថវិកា ការកាត់បន្ថយចំណាយសាធារណៈ។
ជាលទ្ធផល IMF មិនស្ថិតក្នុងក្រសែភ្នែកល្អរបស់ប្រជាជនអាហ្សង់ទីននោះទេ។ សម្រាប់សេដ្ឋកិច្ចវិទូ បញ្ហារបស់អាហ្សង់ទីន មិនមែនរឿងប្រាក់បំណុលរបស់IMF នោះទេ ប៉ុន្តែ គឺសមត្ថភាពរបស់អាហ្សង់ទីន ដែលនៅតែខ្សត់ខ្សោយ ខាងការផលិត នាំចេញ ដែលធ្វើឲ្យអាហ្សង់ទីន ត្រូវរស់ពឹងអាស្រ័យជានិច្ចនឹងប្រាក់បំណុលបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ