អាមេរិកចោទអ៊ីរ៉ង់ពីបទលូកដៃនៅក្នុងសង្រ្គាមអ៊ុយក្រែនដោយបានបញ្ជូនដ្រូនឲ្យរុស្ស៊ី
នៅថ្ងៃអង្គារ ទី១២ កក្កដា អ៊ីរ៉ង់តាមរយៈអ្នកនាំពាក្យក្រសួងការបរទេសលោកណាស៊ែរ កាណានីបានបញ្ចេញប្រតិកម្មទៅនឹងការចោទប្រកាន់របស់អាមេរិកដែលថា អ៊ីរ៉ង់នឹងបញ្ជូនដ្រូនប្រយុទ្ធជាច្រើនរយគ្រឿងទៅឲ្យរុស្ស៊ីសម្រាប់ធ្វើសង្រ្គាមនៅអ៊ុយក្រែន។ ការចោទប្រកាន់របស់អាមេរិកនេះបានធ្វើឡើងក្នុងថ្ងៃចន្ទ ទី១១ កក្កដាដោយលោកជេក ស៊ូលីវ៉ាន់ ទីប្រឹក្សាសន្តិសុខជាតិរបស់ប្រធានាធិបតីអាមេរិកលោកចូ បៃដិន។ តាមលោកណាស៊ែរ កាណានី អ៊ីរ៉ង់មិនបានធ្វើការអភិវឌ្ឃន៍ពិសេសណាមួយនៅក្នុងកិច្ចសហប្រតិបត្តិការបច្ចេកវិទ្យារវាងអ៊ីរ៉ង់ និងរុស្ស៊ីទេ។ បន្ទាប់មក អ្នកនាំពាក្យក្រសួងការបរទេសអ៊ីរ៉ង់រូបនេះដដែលបានរម្លឹកពីជំហរមិនផ្លាស់ប្តូររបស់អ៊ីរ៉ង់ដែលប្រឆាំងនឹងសង្រ្គាមនៅអ៊ុយក្រែន និងអំពាវនាវឲ្យមានដំណោះស្រាយតាមផ្លូវនយោបាយ។ យ៉ាងណាក៏ដោយ ទីប្រឹក្សាសន្តិសុខជាតិអាមេរិកលោកជេក ស៊ូលីវ៉ាន់បានបន្ថែមថា អ៊ីរ៉ង់ក៏កំពុងត្រៀមហ្វឹកហ្វឺនទាហានរុស្ស៊ីឲ្យប្រើដ្រូនដែរ។ តែលោកមិនបានបញ្ជាក់ទេថា តើអ៊ីរ៉ង់បានបញ្ជូនដ្រូនទៅឲ្យរុស្ស៊ីហើយ ឬនៅ។
ចុះផ្សាយនៅថ្ងៃ៖
ស្តាប់ - ០១:២១
ប្រសាសន៍លោកជេក ស៊ូលីវ៉ាន់៖ « យោងតាមព័ត៌មានរបស់យើង រដ្ឋាភិបាលអ៊ីរ៉ង់ត្រៀមបញ្ជូនដ្រូនច្រើនរយគ្រឿងទៅឲ្យរុស្ស៊ី។ គឺជាដ្រូនប្រយុទ្ធដែលអ៊ីរ៉ង់បញ្ចូននៅពេលឆាប់ៗ។ ទីភ្នាក់ងារស៊ើបការណ៍សម្ងាត់របស់យើងក៏បានប្រាប់យើងឲ្យដឹងផងដែរថា អ៊ីរ៉ង់នឹងបើកការហ្វឹកហ្វឺនកម្លាំងទ័ពរុស្ស៊ីឲ្យចេះប្រើដ្រូនទាំងអស់នោះ។ ការហ្វឹកហ្វឺនជាលើកទី១ ត្រូវបានអ៊ីរ៉ង់គ្រោងចាប់ផ្តើមនៅដើមខែកក្កដាខាងមុខ។
តែអ្វីដែលយើងមិនទាន់បានដឹងនោះគឺថា តើអ៊ីរ៉ង់មានបានបញ្ជូនដ្រូនខ្លះទៅឲ្យរុស្ស៊ីហើយឬនៅ។ ទោះជាយ៉ាងនេះក្តី នេះស បញ្ជាក់ឲ្យឃើញថា រុស្ស៊ីកំពុងងាកទៅរកប្រទេសផ្សេងដើម្បីបំពាក់ដ្រូនប្រភេទនេះ។ គួរបញ្ជាក់ថា ដ្រូនប្រភេទនេះរបស់អ៊ីរ៉ង់ធ្លាប់ត្រូវបានគេប្រើនៅក្នុងសង្រ្គាមយេម៉ែនដើម្បីវាយបកនឹងប្រទេសអារ៉ាប៊ីសាអូឌីត មុននឹងមានកិច្ចព្រមព្រៀងបទឈប់បាញ់។ តែយ៉ាងណាក៏ដោយ យើងនឹងបន្តការគាំទ្ររបស់យើងដើម្បីការពារប្រទេស និងប្រជាជនអ៊ុយក្រែន។
ការគាំទ្ររបស់យើងនេះដើម្បីបង្ហាញថា ការប្រឹងប្រែងរបស់រុស្ស៊ីក្នុងគោលដៅលុបអ៊ុយក្រែនចេញពីផែនទីពិភពលោកនឹងមិនអាចទទួលជោគជ័យឡើយ »។
គួរបញ្ជាក់ថា ការបន្តគាំទ្ររបស់អាមេរិកចំពោះអ៊ុយក្រែនមាននៅក្នុងផ្នែកយោធា និងសេដ្ឋកិច្ច។ ក្នុងថ្ងៃអង្គារ ទី១២ កក្កដា រដ្ឋមន្រ្តីក្រសួងហិរញ្ញវត្ថុអាមេរិកលោកចានែត យេលែនបានប្រកាសពីការផ្តល់ជំនួយសេដ្ឋកិច្ចដំណាក់កាលថ្មីចំនួន ១ ៧០០លានដុល្លារឲ្យរដ្ឋាភិបាលអ៊ុយក្រែន។ តាមលោកចានែត យេលែន ទឹកប្រាក់ ១ ៧០០លានដុល្លារនេះនឹងវេតាមធនាគារពិភពលោក ហើយថា ជំនួយសេដ្ឋកិច្ចដំណាក់កាលថ្មីនេះធ្វើឡើងនៅក្នុងក្របខណ្ឌនៃកញ្ចប់ទឹកប្រាក់ជំនួយសេដ្ឋកិច្ចទាំង ៧ ៥០០លានដុល្លារដែលសន្យាដោយលោកចូ បៃដិនកាលពីខែឧសភា។ បើគិតសរុបតាំងពីថ្ងៃផ្ទុះសង្រ្គាមមកទល់ពេលនេះ អាមេរិកបានផ្តល់ជំនួយសេដ្ឋកិច្ចឲ្យអ៊ុយក្រែនគិតជាប្រាក់ចំនួន ៤ ០០០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ