វ៉ាស៊ីនតោនសន្យាផ្តល់ជំនួយ ១ពាន់លានដុល្លារ សម្រាប់ជួយអាហ្វ្រិក ពីគ្រោះទុរភិក្ស
អាមេរិកសន្យាផ្តល់ជំនួយ ១,១៨ពាន់លានដុល្លារ សម្រាប់ប្រទេសនៅតំបន់ស្នែងអាហ្វ្រិក។ ប្រធានទីភ្នាក់ងារជំនួយអាមេរិក លោកស្រី Samantha Power បានប្រកាសកញ្ចប់ជំនួយបន្ទាន់ ដើម្បីជួយបញ្ជៀសប្រទេសនៅតំបន់ស្នែងអាហ្វ្រិកកុំឲ្យធ្លាក់ខ្លួនក្នុងគ្រោះទុរ្ភិក្ស។ មន្រ្តីអាមេរិកបានអំពាវនាវផងដែរឲ្យប្រទេសដទៃទៀត ជាពិសេសចិន ចូលរួមឲ្យបានច្រើនដើម្បីប្រយុទ្ធប្រឆាំងនឹងវិបត្តិខ្វះស្បៀងអាហារដែលកាន់តែធា្លក់ចុះជ្រៅ ដោយសារសង្រ្គាមរុស្ស៊ី ឈ្លានពានអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
នៅមជ្ឈមណ្ឌលយុទ្ធសាស្រ្ត និងសិក្សាអន្តរជាតិ នៅរដ្ឋធានីវ៉ាស៊ីនតោន ប្រធានទីភ្នាក់ងារជំនួយអាមេរិកUSAID ទាញសញ្ញាអាសន្នពីការរីករាលដាលនៃគ្រោះអត់ឃ្លាន ក្នុងពិភពលោក ដោយសារសង្រ្គាម និងការប្រែប្រួលអាកាសធាតុ។ តាមប្រធានទីភ្នាក់ងារជំនួយអាមេរិក លោកស្រី Samantha Power ពិភពលោកសព្វថ្ងៃកំពុងជួបបញ្ហាដ៏គួរឲ្យខ្លោចចិត្ត។ កុមាររាប់លានមិនត្រឹមប្រឈមខ្លាំងនឹងគ្រោះអត់ឃ្លាន តែប៉ុណ្ណោះទេ ប៉ុន្តែ ពួកគេជាច្រើន អាចស្លាប់ ដោយសារតែគ្មានអាហារចូលពោះ។ តាមប្រធានទីភ្នាក់ងារជំនួយអាមេរិក យ៉ាងហោច មានកុមារអាហ្វ្រិក ១១០៣នាក់ ស្លាប់ចំណែកកុមារជាង ៧លាននាក់កំពុងខ្វះធ្ងន់ធ្ងរអាហារូបត្ថម្ភ។
ស្ថានភាពធ្លាក់ចុះអាក្រក់ ជាពិសេសនៅតំបន់ស្នែងអាហ្វ្រិក ដែលកំពុងជួបគ្រោះរាំងស្ងួតដ៏ធ្ងន់ធ្ងរ ៥ឆ្នាំជាប់គ្នា ដែលបំផ្លាញផលដំណាំ និងសម្លាប់សត្វពាហនៈ។ អង្គការមនុស្សធម៌អន្តរជាតិធ្លាប់បានវាយតម្លៃថា ប្រជាជនប្រមាណ ២០លាននាក់ នៅប្រទេសតំបន់ស្នែងអាហ្វ្រិក ដូចជាអេត្យូពី សូម៉ាលី និងកេនយ៉ាអាចប្រឈមនឹងគ្រោះទុរ្ភិក្ស។
នៅមុនធ្វើដំណើរទៅកាន់តំបន់ស្នែងអាហ្វ្រិក នៅសប្តាហ៍ក្រោយ លោកស្រី Samantha Power បានលម្អិតថា កញ្ចប់ជំនួយរបស់អាមេរិកមានរាប់បញ្ចូល ចំណីអាហារបន្ទាន់ អាហារបំប៉ន សម្រាប់កុមារដែលខ្វះអាហារូបត្ថម្ភ ហើយនិងសម្ភារៈសម្រាប់ព្យាបាលសត្វដែលកំពុងប្រឈមនឹងគ្រោះរាំងស្ងួត។
តម្លៃស្បៀងបានកើនឡើងលឿនដូចព្រួញ ដោយសារសង្រ្គាមនៅអ៊ុយក្រែន ដែលជាប្រភពនាំចេញស្រូវសាលីសំខាន់ នៅក្នុងពិភពលោក។ ប៉ុន្តែស្រូវសាលីរបស់អ៊ុយក្រែន រាប់លានតោនកំពុងនៅជាប់គាំងនៅកំពង់ផែ ដោយសារ វត្តមាននាវាចម្បាំងរុស្ស៊ី និងគ្រាប់មីនពង្រាយដោយអ៊ុយក្រែន ដើម្បីទប់ស្កាត់ការឈ្លានពានរបស់រុស្ស៊ី។
នៅត្រង់ចំណុចនេះ ប្រធានទីភ្នាក់ងារជំនួយអាមេរិកបានរិះគន់រុស្ស៊ីដែលគ្មានចេតនាចង់បើកផ្លូវឲ្យគេដឹកបញ្ចេញស្រូវសាលីអ៊ុយក្រែន ដើម្បីកាត់បន្ថយវិបត្តិស្បៀង។ មន្រ្តីអាមេរិកបានបង្ហាញការខកចិត្តផងដែរ ដែលឃើញមហាអំណាចចិនបិទខ្ទប់ការនាំចេញជីគីមី ហើយនិងគិតតែបង្កើនការស្តុកទុកស្រូវសាលី និងធញ្ញជាតិ ក្នុងប្រទេស។
សម្រាប់ប្រធានទីភ្នាក់ងារអាមេរិក ចិនគួរបង្ហាញខ្លួនជាមហាអំណាចដែលចេះគិតគូរ ជួយប្រទេសក្រីក្រ និងកំពុងអភិវឌ្ឍផ្សេងទៀត។ បើសិនចិនបញ្ចេញលក់ជីគីមី និងស្រូវសាលី ទៅក្នុងទីផ្សារ ឬដាក់បញ្ចូលទៅក្នុងកម្មវិធីស្បៀងអាហាររបស់អង្គការសហប្រជាជាតិ នោះ វិភាគទានរបស់ចិននឹងជួយកាត់បន្ថយតម្លៃស្បៀង បានច្រើន ក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ