អាមេរិកបង្ហាញគម្រោងអ៊ីរ៉ង់ចង់លបធ្វើឃាតអតីតទីប្រឹក្សាសន្តិសុខជាតិអាមេរិក
ក្រសួងយុត្តិធម៌អាមេរិកបានបង្ហើបឱ្យដឹង នៅថ្ងៃពុធទី ១០ សីហា ២០២២នេះ អំពីផែនការចង់លបធ្វើឃាតអតីតទីប្រឹក្សាសន្តិសុខជាតិ របស់សេតវិមាន លោក ចន ប៉ុលតុន John Bolton។ ជាគម្រោងរបស់អ៊ីរ៉ង់ ដឹកនាំដោយសមាជិកឆ្មាំបដិវត្តម្នាក់ ដែលតុលាការអាមេរិកបានធ្វើការចោទប្រកាន់ជាផ្លូវការពីបទបានផ្តល់ប្រាក់៣០ម៉ឺនឱ្យអ្នកទៅធ្វើឃាតលោក ចន ប៉ុលតុន។
ចុះផ្សាយនៅថ្ងៃ៖
ស្តាប់ - ០២:២៤
នៅក្នុងសេចក្តីថ្លែងការណ៍ រដ្ឋមន្ត្រីក្រសួងយុត្តិធម៌អាមេរិកបានបញ្ជាក់ថា មានអាយុ៤៥ឆ្នាំ សមាជិកឆ្មាំបដិវត្តអ៊ីរ៉ង់ស្ហារ៉ាម ពួរសាហ្វី Shahram Poursafi ហៅ Mehdi Rezayi បានដឹកនាំគម្រោងលបធ្វើឃាតអតីតទីប្រឹក្សាសន្តិសុខជាតិអាមេរិក និងជាអតីតឯកអគ្គរដ្ឋទូតអាមេរិកប្រចាំអង្គការសហប្រជាជាតិ ចន ប៉ុលតុន ដើម្បី សងសឹកឱ្យឧត្តមសេនីយ៍អ៊ីរ៉ង់ ឈ្មោះ កាសឹម សូឡីម៉ានី Qassem Soleimani ដែលបានស្លាប់ដោយការវាយប្រហាររបស់អាមេរិកកាលពីខែមករា២០២០។ វ៉ាស៊ីនតោន បានដឹងអំពីគម្រោងធ្វើឃាតនេះ តាមរយៈជនដែលត្រូវទៅធ្វើឃាតលោកចនប៉ុលតុន ដែលអាមេរិកសូមមិនបញ្ចេញអត្តសញ្ញាណ។
បើតាមបទចោទប្រកាន់នៅចុងឆ្នាំ២០២១ ស្ហារ៉ាម ពួរសាហ្វី បានទាក់ទងមនុស្សម្នាក់ឱ្យទៅសម្រេចផែនការ ឱ្យបានមុខថ្ងៃខួបមួយឆ្នាំនៃមរណភាពរបស់ឧត្តមសេនីយ៍សូឡីម៉ានី ដែលជាអតីតមេទ័ពជើងឆើតអ៊ីរ៉ង់។ ហួសខួបមួយឆ្នាំ ពួរសាហ្វីបានដំឡើងកិច្ចសន្យាដល់មួយលាន ... មានការឆ្លើយឆ្លងជាច្រើនខែ តែជននោះជារនុកក្នុងរបស់FBIប៉ូលិសអាមេរិក។
ប៉ូលិសអាមេរិកបានចេញដីកាតាមស្វែងរកចាប់ ពួរសាហ្វី ដោយមានបង្ហាញរូបថតជាច្រើន។ ប្រសិនបើអាមេរិកអាចចាប់ ពួរសាហ្វី អាចនឹងត្រូវជាប់ពន្ធនាគារចំនួន២៥ឆ្នាំ តែទំនងជាមិនអាចទៅរួចទេ ព្រោះពួរសាហ្វីប្រហែលនៅក្នុងប្រទេសអ៊ីរ៉ង់ឯណោះ។
ការចោទប្រកាន់របស់តុលាការអាមេរិកធ្លាក់មកជួនចំពេលដែលរបបដឹកនាំអ៊ីរ៉ង់កំពុងសិក្សាសំណើរបស់សហភាពអឺរ៉ុប ដើម្បីស្តារកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥ ដែលជាប់គាំងស្តូក តាំងពីលោកដូណាល់ ត្រាំ នៅជាប្រធានាធិបតីសហរដ្ឋអាមេរិក និងមានលោក ចន បុលតុន ជាទីប្រឹក្សាសន្តិសុខ បានប្រកាសដកខ្លួនចេញនៅឆ្នាំ២០១៨មក។ តាំងពីជាច្រើនខែមកនេះ អ៊ីរ៉ង់ បានចងភ្ជាប់ ការដក ក្រុមឆ្មាំបដិវត្តអ៊ីរ៉ង់ចេញពីបញ្ជីខ្មៅអាមេរិកជាក្រុមភេរវនិយម ជាលក្ខខណ្ឌនៃរាល់គ្រប់កិច្ចព្រមព្រៀង។
បានដឹងនិងសហការបំបែកផែនការអ៊ីរ៉ង់ លោក ចន បុលតុន បានអំពាវនាវនៅក្នុងសេចក្តីថ្លែងការណ៍ មិនឱ្យប្រធានាធិបតីអាមេរិក ចូបៃដិន ត្រលប់ទៅទទួលយកកិច្ចព្រមព្រៀងនុយក្លេអ៊ែរជាមួយអ៊ីរ៉ង់វិញទេ។
ក្រសួងយុត្តិធម៌អាមេរិកមិនបានបញ្ជាក់ថាអ៊ីរ៉ង់មានគម្រោងលបសម្លាប់ទីពីរទេ ប៉ុន្តែបើតាមវេបសាយAxios អ៊ីរ៉ង់ប៉ងធ្វើឃាតលោក មៃ ប៉ុមប៉េអូ ដែរ។ ក្នុងរដ្ឋាបាលលោកត្រាំ លោក ចន បុលតុន និងលោក ម៉ៃ ប៉ុមប៉េអូ ជាស្ថាបនិកនយោបាយដែលមានជំហរដាក់គំនាបជាអតិបរិមាលើអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ