អាមេរិកសាកល្បងដោយជោគជ័យមីស៊ីលអន្តរទ្វីប
សហរដ្ឋអាមេរិកបានប្រកាសនៅថ្ងៃពុធទី ៧ កញ្ញា ធ្វើការសាកល្បងមីស៊ីលអន្តរទ្វីប (ICBM) ដោយជោគជ័យ។ ការប្រកាសប្រាប់ដំណឹងនេះ គឺដើម្បីបញ្ចៀសកុំឱ្យមានការយល់ច្រលំ ដែលអាចនាំឱ្យមានភាពតានតឹងកាន់តែខ្លាំងជាមួយនឹងរុស្ស៊ី ក្នុងបរិបទនៃសង្គ្រាមអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ប្រតិបត្តិការបាញ់សាកល្បងមីស៊ីលMinuteman III បានប្រព្រឹត្តទៅនៅថ្ងៃទី ៧ កញ្ញា នៅមូលដ្ឋានទ័ពអាកាស Vandenberg រដ្ឋកាលីហ្វ័រនីញ៉ា វេលាម៉ោង៨និង១៣នាទីម៉ោងសកល។ មីស៊ីលហោះបានចម្ងាយប្រមាណ៦៧៦០គីឡូម៉ែត្រ លើមហាសមុទ្ទប៉ាស៊ីហ្វិក រួចធ្លាក់នៅក្នុងសមុទ្ទក្បែរកោះMarshall។ នេះបើតាមសេចក្តីថ្លែងការណ៍របស់កងទ័ពជើងអាកាសអាមេរិក។
សេចក្តីថ្លែងការណ៍ដដែលបានបញ្ជាក់ទៀតថា នេះ ជាលំហាត់បាញ់សាកល្បង តាមទម្លាប់និងជាប្រតិបត្តិការ ដែលមានកំណត់ក្នុងកាលវិភាគ សម្រាប់បញ្ជាក់សមត្ថភាពនុយក្លេអ៊ែររបស់សហរដ្ឋអាមេរិក ថាពិតជាមានដំណើរការត្រឹមត្រូវ មានប្រសិទ្ធភាព សុវត្ថិភាព និងគួរជាទីទុកចិត្តដោយប្រាកដ។ អាមេរិកបានធ្វើការសាកល្បងបែបនេះចំនួនជាង៣០០ដង និងគ្មានពាក់ព័ន្ធនឹងព្រឹត្តិការណ៍ពិភពលោកបច្ចុប្បន្នទេ។
ជាទូទៅ សហរដ្ឋអាមេរិកមិនដែលប្រកាសឱ្យដឹងជាមុនអំពីសកម្មភាពសាកល្បងមីស៊ីលអន្តរទ្វីបទេ។ ដោយហេតុបរិបទតានតឹងអន្តរជាតិ ការសាកល្បង Minuteman III ដែលជាមីស៊ីលមានបំពាក់ក្បាលគ្រាប់នុយក្លេអ៊ែរផង នៅពេលចេញធ្វើសង្គ្រាមមែនទែន លើកមុន បានពន្យារអស់ពីរដងរួចមកហើយ ។
តាមគម្រោងដំបូង អាមេរិកត្រូវធ្វើការសាកល្បងនៅខែមីនា តែវ៉ាស៊ីនតោនសុខចិត្តលើកពេលវិញ ដោយខ្លាចរុស្ស៊ីដែលចូលឈ្លានពានអ៊ុយក្រែននៅថ្ងៃទី ២៤កុម្ភៈ យកលេសមកពង្រីកជម្លោះឱ្យកាន់តែធំ ទៅប្រទេសផ្សេងទៀត។ ការសាកល្បងត្រូវលើកពេល ជាលើកទីពីរនៅដើមខែសីហា បន្ទាប់ពីលោកស្រីប្រធានសភាអាមេរិក ណាន់ស៊ី ប៉េឡូស៊ី ធ្វើដំណើរទៅកោះតៃវ៉ាន់ ដែលចិនចាត់ទុកជាដែនដីមួយផ្នែករបស់ខ្លួន។ នៅទីបំផុត ការបាញ់សាកល្បងមីស៊ីលបានប្រព្រឹត្តទៅដោយជោគជ័យនៅថ្ងៃទី ១៦សីហា។ ហេតុដូច្នេះ ហើយបានជាដោយចៃដន្យ អាមេរិកមានការបាញ់សាកល្បងមីស៊ីលពីរលើកនេះកៀកៗគ្នា។ នេះបើតាមការពន្យល់របស់អ្នកនាំពាក្យក្រសួងការពារជាតិអាមេរិក លោកឧត្តមសេនីយ៍ Pat Ryder។
មានដំណើរការតាំងពី៥០ឆ្នាំ មីស៊ីលMinuteman III បាញ់ពីដីទៅអាកាស ជាអាវុធនុយក្លេអ៊ែររបស់អាមេរិក តែមួយគត់ គិតចាប់តាំងពីឆ្នាំ២០០៥មក។ មីស៊ីលនេះមានបំពាក់នៅមូលដ្ឋានទ័ពអាមេរិបីកន្លែង Wyoming Dakotaខាងជើង និង Montana។ មីស៊ីល Trident បាញ់ចេញពីសមុទ្ទ មានដាក់ពង្រាយនៅតាមនាវាមុជទឹក ចំណែកគ្រាប់បែកនុយក្លេអ៊ែរ មានផ្ទុកនៅក្នុងយន្តហោះទម្លាក់គ្រាប់បែកយុទ្ធសាស្ត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ