អាមេរិក៖លោកចូ បៃដិនចូលរួមគោរពវិញ្ញាណក្ខន្ទជនរងគ្រោះក្នុងព្រឹត្តិការណ៍ ១១ កញ្ញា ២០០១
នៅសហរដ្ឋអាមេរិក ថ្ងៃអាទិត្យ ទី១១ កញ្ញាជាខួបគម្រប់ ២១ឆ្នាំនៃមហាព្រឹត្តិការណ៍ភេរវកម្មថ្ងៃ ១១ កញ្ញា ២០០១ ដែលបានបណ្តាលឲ្យមានមនុស្សស្លាប់ជិត ៣ ០០០នាក់។ នាឱកាសខួប ២១ឆ្នាំនៅឆ្នាំ ២០២២ នេះ ពិធីគោរពវិញ្ញាណក្ខន្ទបានរៀបចំធ្វើនៅទីតាំងចំនួន ៣កន្លែង។ ប្រធានាធិបតីលោកចូ បៃដិនបានចូលរួមគោរពវិញ្ញាណក្ខន្ទនៅក្រសួងការពារជាតិ អនុប្រធានាធិបតីលោកស្រីខាម៉ាឡា ហារីសនៅទីក្រុងញូយ៉ក ហើយលោកស្រីជីល បៃដិនដែលជាភរិយារបស់លោកបៃដិនបានធ្វើដំណើរទៅរដ្ឋ Pennsylvania។
ចុះផ្សាយនៅថ្ងៃ៖
ស្តាប់ - ០២:០៩
ទោះបីជាខួប ២១ឆ្នាំនៃមហាព្រឹត្តិការណ៍ភេរវកម្មថ្ងៃ១១ កញ្ញា ២០០១ មិនត្រូវបានរដ្ឋបាលអាមេរិករៀបចំធំដុំក៏ដោយក៏អាមេរិកមិនបានបំភ្លេចព្រឹត្តិការណ៍ដ៏សោកសៅមួយនេះទេ។ ប្រធានាធិបតិលោកចូ បៃដិនបានចូលរួមគោរពវិញ្ញាណក្ខន្ទនៅមុខក្រសួងការពារជាតិដែលកាលពី ២១ឆ្នាំមុនក្នុងថ្ងៃទី១១ កញ្ញា ២០០១ មានយន្តហោះមួយគ្រឿងក្នុងចំណោមយន្តហោះទាំង ៤គ្រឿងដែលក្រុមភេរវជនពង្វាងបានធ្លាក់ផ្ទុះឆេះនៅទីនោះ។ ថ្លែងនាឱកាសនោះ លោកបៃដិនបានបញ្ជាក់ជាថ្មីថា អាមេរិកបានត្រៀមខ្លួន និងប្រុងប្រយ័ត្នជានិច្ចដើម្បីបង្ការនឹងគ្រប់ការវាយប្រហារភេរវកម្មទាំងអស់។
« យើងនឹងមិនបំភ្លេច យើងនឹងមិនបោះបង់ចោលជាដាច់ខាតនូវការប្តេជ្ញាចិត្តរបស់យើងក្នុងការទប់ស្កាត់នឹងការវាយប្រហារថ្មីទៀតប្រឆាំងសហរដ្ឋអាមេរិក » នេះជាការថ្លែងរបស់លោកបៃដិន។
បន្ទាប់មក ប្រធានាធិបតីអាមេរិកបានចេញមុខការពារលទ្ធិប្រជាធិបតេយ្យដែលលោកមិនភ្លេចបញ្ជាក់ថា លទ្ធិប្រជាធិបតេយ្យជាតម្លៃមួយនៅក្នុងបេះដូងនៃរចនាសម្ព័ន្ធរបស់អាមេរិក។
« ការការពារលទ្ធិប្រជាធិបតេយ្យក្នុងមួយឆ្នាំម្តង ឬការពារម្តងម្កាល គឺមិនគ្រប់គ្រាន់ទេ។ យើងត្រូវការពារលទ្ធិប្រជាធិបតេយ្យជារៀងរាល់ថ្ងៃ។ ដូច្នេះថ្ងៃនេះ វាមិនត្រឹមជាថ្ងៃនៃការចងចាំប៉ុណ្ណោះទេ តែវាក៏ជាថ្ងៃនៃការបន្ត និងការប្តេជ្ញាចិត្តសម្រាប់ជនជាតិអាមេរិកគ្រប់រូបក្នុងការលះបង់របស់យើងចំពោះប្រទេសនេះ និងចំពោះគោលការណ៍ដែលតំណាងឱ្យលទ្ធិប្រជាធិបតេយ្យរបស់យើង » នេះជាការបន្ថែមរបស់លោកបៃដិន។
ចុងក្រោយ លោកបៃដិនមិនភ្លេចរម្លឹកប្រាប់ពលរដ្ឋអាមេរិកគ្រប់រូបពីការដែលព្រឹត្តិការណ៍មហាភេរវកម្មថ្ងៃ១១ កញ្ញា ២០០១ របស់ពួកអាល់កៃដាបានធ្វើឲ្យអាមេរិករួបរួមកាន់ខ្លាំង ខណៈដែលនៅប៉ុន្មានថ្ងៃមុន លោកបានព្រមានពីការបែកបាក់ដែលកំពុងញាំញីនៅក្នុងសង្គមអាមេរិកសព្វថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ