លោកចូ បៃដិន៖អាមេរិកនឹងប្រើកម្លាំងទ័ពការពារតៃវ៉ាន់ក្នុងករណីដែលមានការវាយប្រហារចូលឈ្លានពានពីចិន
ប្រធានាធិបតីអាមេរិកលោកចូ បៃដិនបានបញ្ជាក់នៅយប់ថ្ងៃអាទិត្យ ទី១៨ កញ្ញាថា ទ័ពអាមេរិកនឹងការពារតៃវ៉ាន់បើកោះមួយនេះរងការវាយប្រហារចូលឈ្លានពានពីចិន។ ដោយមិនបង្អង់យូរ ចិនបានឆ្លើយតបវិញក្នុងថ្ងៃចន្ទ ទី១៩ កញ្ញាដោយចាត់ទុកការលើកឡើងរបស់លោកបៃដិនថាជាការបំពានធ្ងន់ធ្ងរលើការសន្យារបស់អាមេរិកដែលមិនគាំទ្រឯករាជ្យរបស់តៃវ៉ាន់។ ដោយឡែក អ្នកនាំពាក្យសេតវិមានដែល AFP បានសុំការសុំបំភ្លឺជុំវិញការលើកឡើងរបស់លោកបៃដិនបែរជាបានអះអាងថា នយោបាយរបស់អាមេរិកចំពោះតៃវ៉ាន់មិនមានការផ្លាស់ប្តូរទេ។
ចុះផ្សាយនៅថ្ងៃ៖
ស្តាប់ - ០២:៣៣
គឺនៅក្នុងបទសម្ភាសន៍ឲ្យកាណាល់ទូរទស្សន៍ CBS ដែលប្រធានាធិបតិអាមេរិកលោកបៃដិនបានឆ្លើយដោយមិនអល់អែកថា អាមេរិកនឹងប្រើកម្លាំងទ័ពដើម្បីការពារតៃវ៉ាន់ បើចិនបើកការវាយប្រហារមិនធ្លាប់មានលើតៃវ៉ាន់។ តែលោកបៃដិនមិនភ្លេចគូសបញ្ជាក់ថា អ្វីដែលលោកបានលើកឡើងនេះមិនមែនជាការលើកទឹកចិត្តឲ្យតៃវ៉ាន់ប្រកាសឯករាជ្យឡើយ និងថា ការសម្រេចចិត្តយ៉ាងណាជារឿងរបស់តៃវ៉ាន់ខ្លួនឯង។ ទោះជាយ៉ាងនេះក្តី ចិនមិនបានទុកឲ្យការលើកឡើងរបស់លោកបៃដិនលើសពេល ២៤ម៉ោងទេ។
« សម្តីលោកបៃដិនជាការបំពានធ្ងន់ធ្ងរលើការសន្យារបស់អាមេរិកដែលមិនគាំទ្រឯករាជ្យរបស់តៃវ៉ាន់។ អ្វីដែលលោកបៃដិនបានលើកឡើង ជាការបញ្ជូនសញ្ញាអាក្រក់ដល់ក្រុមសកម្មជនទាមទារឯករាជ្យនៅតៃវ៉ាន់ » នេះជាប្រតិកម្មរបស់អ្នកនាំពាក្យក្រសួងការបរទេសចិនលោកស្រីម៉ាវ នីង។ គួរបញ្ជាក់ថា នាដំណាច់ខែឧសភាថ្មីៗកន្លងទៅនេះ លោកបៃដិនធ្លាប់បានធ្វើឲ្យចិនក្តៅស្លឹកត្រចៀកម្តងដោយអះអាងពីអន្តរាគមន៍ផ្លូវយោធារបស់អាមេរិកដើម្បីគាំទ្រតៃវ៉ាន់នៅក្នុងករណីដែលមានការវាយប្រហារពីចិនកម្មុយនិស្ត។
គេមិនដឹងថា តើអាមេរិកហ៊ានប្រើកម្លាំងទ័ពជួយតៃវ៉ាន់ឬអត់ទេ និងថា តើចិនហ៊ានប្រើកម្លាំងទ័ពវាយយកតៃវ៉ាន់ឬអត់ទេ។ អ្វីដែលគេបានមើលឃើញ អាមេរិកកំពុងបន្តប្រើយុទ្ធសាស្រ្តស្រពិចស្រពិល និងកំញើញដោយនៅម្ខាង អាមេរិកបន្តប្រកាន់ជំហរគាំទ្រតៃវ៉ាន់ និងនៅម្ខាងទៀត អាមេរិកកំពុងបន្តអនុវត្តនូវនយោបាយចិនតែមួយដោយទទួលស្គាល់ជាផ្លូវការនូវរដ្ឋាភិបាលចិនតែមួយនៅក្រុងប៉េកាំង។មួយវិញទៀត អាមេរិកក៏យល់ឃើញដូចចិនដីគោកដែលថា តៃវ៉ាន់ជាដែនដីមួយដែលមិនអាចផ្តាច់ចេញពីចិន និងត្រូវរួបរួមគ្នានៅថ្ងៃណាមួយ។
តែអាមេរិកទុករឿងនេះឲ្យចិនដីគោក និងចិនតៃវ៉ាន់ជាអ្នកដោះស្រាយគ្នាដោយសន្តិវិធី និងប្រឆាំងដាច់ខាតនឹងការប្រើកម្លាំងបាយដើម្បីក្រសោបយកតៃវ៉ាន់។ គួររម្លឹកថាសម្រាប់ក្រុងប៉េកាំង តៃវ៉ាន់ដែលមានប្រជាជនរស់នៅប្រមាណ ២៣លាននាក់ជាខេត្តមួយរបស់ខ្លួនដែលចិននៅមិនទាន់អាចបង្រួបបង្រួមបាននៅឡើយតាំងពីសង្រ្គាមស៊ីវិលក្នុងឆ្នាំ ១៩៤៩។ តែក្នុងពេលជាមួយនេះ ក្រុងប៉េកាំងមិនភ្លេចព្រមានប្រើកម្លាំង បើតៃវ៉ាន់ហ៊ានប្រកាសឯករាជ្យនៅថ្ងៃណាមួយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ