ចិនទាមទារឲ្យអាមេរិកលុបកិច្ចសន្យាលក់អាវុធឲ្យតៃវ៉ាន់ក្នុងទឹកប្រាក់ជាង ១ ០០០លានដុល្លារ
សហរដ្ឋអាមេរិកបានប្រកាសក្នុងថ្ងៃសុក្រ ទី២ កញ្ញាពីការលក់អាវុធឲ្យតៃវ៉ាន់ជាថ្មីដែលមានទឹកប្រាក់ជាង ១ ០០០លានដុល្លារ។ នេះជាកិច្ចសន្យាលក់អាវុធដ៏ធំជាងគេឲ្យតៃវ៉ាន់តាំងពីការឡើងកាន់តំណែងប្រធានាធិបតីរបស់លោកចូ បៃដិន។ តែក៏ដូចជាសព្វមួយដង ចិនដែលបានចាត់ទុកកោះតៃវ៉ាន់ជាខេត្តឧទ្ទាមរបស់ខ្លួនបានបញ្ចេញប្រតិកម្មខឹងសម្បារ និងបានទាមទារឲ្យអាមេរិកលុបកិច្ចសន្យានេះជាបន្ទាន់។ បើមិនដូច្នោះទេ ចិននឹងចាត់វិធានការសងសឹកវិញ។
ចុះផ្សាយនៅថ្ងៃ៖
ស្តាប់ - ០២:០៦
១ ១០០លានដុលា្លរ នេះទឹកប្រាក់សរុបដែលរដ្ឋបាលអាមេរិកបានយល់ព្រមលក់អាវុធជាថ្មីឲ្យតៃវ៉ាន់។ ក្រសួងការបរទេសអាមេរិកបានបញ្ជាក់នៅក្នុងសេចក្តីប្រកាសព័ត៌មានថា នៅក្នុងទឹកប្រាក់សរុបទាំង ១ ១០០លានដុល្លារ មាន ៣៥៥លានដុល្លារជាថ្លៃទិញគ្រាប់មីស៊ីល Harpoon ដែលអាចបាញ់ពន្លិចនាវាសង្រ្គាមចំនួន ៦០ដើម មាន ៨៥លាន ៦សែនដុល្លារជាថ្លៃទិញគ្រាប់មីស៊ីល Sidewinder ដែលបាញ់ចម្ងាយជិតចំនួន ១០០ដើម និងថ្លៃជួសជុលប្រព័ន្ធរ៉ាដាតៃវ៉ាន់ដែលមានទឹកប្រាក់ប្រមាណជា ៦៦៥លានដុល្លារ។
ដោយមិនបង្អែរបង្អង់យូរ ចិនតាមរយៈអ្នកនាំពាក្យស្ថានទូតប្រចាំក្រុងវ៉ាស៊ីតោនលោកលីវ ផេងយូបានប្រឆាំងយ៉ាងដាច់អាហង្ការនឹងទង្វើរបស់អាមេរិក និងបានទាមទារឲ្យអាមេរិកលុបកិច្ចសន្យាលក់អាវុធឲ្យតៃវ៉ាន់ពេលនេះជាបន្ទាន់។ តាមលោកលីវ ផេងយូ ទង្វើរបស់អាមេរិកនឹងធ្វើឲ្យប៉ះពាល់បន្ថែមទៀតនៅក្នុងទំនាក់ទំនងរវាងក្រុងវ៉ាស៊ីនតោន និងក្រុងប៉េកាំង រួមទាំងប៉ះពាល់ដល់សន្តិភាព និងស្ថិរភាពនៅច្រកសមុទ្រតៃវ៉ាន់។ តែអ្វីដែលលោកលីវ ផេងយូមិនភ្លេចបញ្ជាក់នោះ គឺចិននឹងចាត់វិធានការវាយបកវិញត្រឹមត្រូវ និងចាំបាច់ ប្រសិនបើអាមេរិកមិនលុបកិច្ចសន្យាលក់អាវុធឲ្យតៃវ៉ាន់ពេលនេះទេ។
គួរបញ្ជាក់ថា ដើម្បីឲ្យការលក់អាវុធឲ្យតៃវ៉ាន់អាចសម្រេចទៅបាន លុះត្រាណាតែមានការយល់ព្រមពីសភាអាមេរិកទាំងពីរសិន។ តែរឿងនេះមិនសូវជាចំណោតប៉ុន្មានទេ ព្រោះការគាំទ្រផ្លូវយោធាចំពោះតៃវ៉ាន់តែងទទួលបានការគាំទ្រពីក្រុមសមាជិកសភាអាមេរិកទាំងពីរគណបក្ស។ អ្វីជាការកត់សម្គាល់ ការប្រកាសលក់លក់អាវុធជាថ្មីឲ្យតៃវ៉ាន់បានធ្វើឡើង មួយខែក្រោយទស្សនកិច្ចរបស់ប្រធានសភាអាមេរិកលោកស្រីណាន់ស៊ី ប៉េឡូស៊ីនៅតៃវ៉ាន់។ ទស្សនកិច្ចកាលណោះបានធ្វើឲ្យចិនផ្ទុះកំហឹងខ្លាំងរហូតធ្វើសមយុទ្ធទ្រង់ទ្រាយធំមិនធ្លាប់មាននៅជុំវិញតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ