នាយករដ្ឋមន្រ្តីកាណាដា៖ចិនកំពុងលេងល្បែងឈ្លានពានជាមួយលទ្ធិប្រជាធិបតេយ្យ និងស្ថាប័នរបស់កាណាដា
នៅក្នុងប្រទេសកាណាដា នាយករដ្ឋមន្រ្តីលោកហ្សូសស្តាំង ទ្រុយដូបានព្រមានក្នុងថ្ងៃចន្ទ ទី៧ វិច្ឆិកាថា ចិនកំពុងលេងល្បែងឈ្លានពានជាមួយលទ្ធិប្រជាធិបតេយ្យ និងស្ថាប័នរបស់កាណាដា។ ការព្រមានរបស់លោកទ្រុយដូបានធ្វើឡើង ក្រោយពីមានការផ្សព្វផ្សាយរបាយការណ៍មួយដែលបញ្ជាក់ពីការលូកដៃរបស់បរទេសទៅក្នុងការបោះឆ្នោតនៅកាណាដានាពេលថ្មីៗនេះ។
ចុះផ្សាយនៅថ្ងៃ៖
ស្តាប់ - ០២:២៨
ប្រតិកម្មរបស់នាយករដ្ឋមន្រ្តីកាណាដាលោកហ្សូសស្តាំង ទ្រុយដូបានធ្វើឡើង ក្រោយពីមានលេចចេញនូវព័ត៌មានចំនួនពីរបន្តបន្ទាប់គ្នា។ ព័ត៌មានទី១ ជាព័ត៌មានផ្សព្វផ្សាយដោយកាណាល់ទូរទស្សន៍កាណាដាឈ្មោះ Global News ដែលថា មានបណ្តាញលួចលាក់មួយបានផ្តល់លុយទៅឲ្យបេក្ខជនឈរឈ្មោះបោះឆ្នោតនាការបោះឆ្នោតនៅកាណាដាថ្មីៗនេះ និងព័ត៌មានទី២ ជាព័ត៌មានស្តីពីការបើកការស៊ើបអង្កេតរបស់រដ្ឋអំណាចក្រុងអូតាវ៉ាលើវត្តមានប៉ុស្តិ៍ប៉ូលិសចិនខុសច្បាប់នៅក្នុងតំបន់ Grand Toronto។ ថ្លែងទៅកាន់ក្រុមអ្នកកាសែត លោកហ្សូសស្តាំង ទ្រុយដូបានលើកឡើងពីវិធានការសំខាន់ៗរបស់រដ្ឋាភិបាលដើម្បីពង្រឹងនីតិវិធី និងប្រព័ន្ធបោះឆ្នោតរបស់កាណាដា។
ទន្ទឹមគ្នានេះ លោកទ្រុយដូក៏បានសន្យាពីការបន្តវិនិយោគលើផ្នែកប្រយុទ្ធប្រឆាំងនឹងការជ្រៀតជ្រែកក្នុងប្រព័ន្ធបោះឆ្នោត និងប្រឆាំងនឹងការលូកដៃរបស់បរទេសនៅក្នុងលទ្ធិប្រជាធិបតេយ្យ និងស្ថាប័នរបស់កាណាដា។ តាមនាយករដ្ឋមន្រ្តីកាណាដារូបនេះដដែល មានបណ្តាប្រទេស និងរដ្ឋបរទេសក្នុងលោក មិនថាចិន ឬប្រទេសផ្សេងកំពុងបន្តលេងល្បែងឈ្លានពានជាមួយលទ្ធិប្រជាធិបតេយ្យ និងស្ថាប័នរបស់កាណាដា។ ផ្អែកតាមទូរទស្សន៍កាណាដា Global News ចិនបានបញ្ជូនលុយតាមរយៈអ្នកតំណាងរាស្រ្តម្នាក់ និងក្រុមមនុស្សផ្សេងទៀតទៅឲ្យបេក្ខជនឈរឈ្មោះបោះឆ្នោតយ៉ាងតិច ១១នាក់ និងភ្នាក់ងារចិនដែលធ្វើការជួយឃោសនាបោះឆ្នោតឲ្យបេក្ខជនឈរបោះឆ្នោតទាំងនោះ។
មួយវិញទៀត និងបើតាម Global News ដដែរ ក្រុងប៉េកាំងបានព្យាយាមដាក់បញ្ចូលភ្នាក់ងាររបស់ខ្លួនជាមួយក្រុមអ្នកតំណាងរាស្រ្តកាណាដាដើម្បីដាក់ឥទ្ធិពលចិនទៅលើពួកគេ។ ការថ្លែងរបស់លោកទ្រុយដូពេលនេះត្រូវបានអ្នកនាំពាក្យក្រសួងការបរទេសចិនលោកហ្សាវ លីជាំងឆ្លើយតបវិញក្នុងថ្ងៃអង្គារ ទី៨ វិច្ឆិកាដោយស្នើឲ្យកាណាដាបញ្ឈប់ការថ្លែងដែលបង្កឲ្យមានផលវិបាកដល់ទំនាក់ទំនងកាណាដា ចិន។ តាមលោកហ្សាវ លីជាំង ចិនមិនចាប់អារម្មណ៍នឹងកិច្ចការផ្ទៃក្នុងរបស់កាណាដា និងបានអះអាងជាទូទៅថា ទំនាក់ទំនងរវាងប្រទេសអាចកសាងឡើងបានដោយឈរលើមូលដ្ឋាននៃការគោរពគ្នាទៅវិញទៅមក សមភាព និងផលប្រយោជន៍រួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ