ទីភ្នាក់ងារស៊ើបការណ៍សម្ងាត់អាមេរិក៖ សង្គ្រាមអ៊ុយក្រែន អាចត្រូវថមថយកម្លាំង
នៅសៅរ៍ទី៣ធ្នូ ទីភ្នាក់ងារស៊ើបការណ៍សហរដ្ឋអាមេរិក ប្រកាសឲ្យដឹងថា សង្គ្រាមរុស្ស៊ីនៅអ៊ុយក្រែន អាចនឹងថមថយឥទ្ធិពលច្រើន នៅប៉ុន្មានខែខាងមុខនេះ។ នេះបើតាមការបញ្ជាក់របស់ នាយិកា នៃទីភ្នាក់ងារស៊ើបការណ៍សម្ងាត់អាមេរិក ដែលថ្លែងក្នុងសន្និសីទមួយ ស្តីពីវិស័យការពារសន្តិសុខជាតិ នៅក្នុងរដ្ឋកាលីហ្វ័រញ៉ា។
ចុះផ្សាយនៅថ្ងៃ៖
ស្តាប់ - ០២:២១
ពីពេលនេះ ទៅប៉ុន្មានខែខាងមុខទៀត សន្ទុះសម្រុកប្រយុទ្ធច្បាំងគ្នា រវាងរុស្ស៊ីនិងអ៊ុយក្រែន អាចនឹងថមថយកម្លាំងច្រើន។ ការប្រយុទ្ធចុះថយសន្ទុះខ្លាំង ក៏ព្រោះតែការឆ្លងកាត់ឱកាសធាតុរដូវរងាត្រជាក់ដល់ឆ្អឹង ដែលជាចំណែកធំមួយ ធ្វើឲ្យទឹកចិត្តយុទ្ធជនអ៊ុយក្រែន ធ្លាក់ចុះយ៉ាងគំហុក។ ការធ្លាក់ចុះឆន្ទៈច្បាំងនៃយុទ្ធជនអ៊ុយក្រែននេះ គឺអាចនឹងបន្តទៅច្រើនខែផង។ នេះបើតាមការពន្យល់របស់អ្នកស្រី Avril Danica Haines នាយិកា នៃទីភ្នាក់ងារស៊ើបការណ៍សម្ងាត់ជាតិអាមេរិក ថ្លៃងពីថ្ងៃសៅរ៍ដែលត្រូវបណ្តាព័ត៌មានបច្ចិមប្រទេសចុះផ្សាយព្រោងព្រាត។
អ្នកស្រីប្រធានទីភ្នាក់ងារស៊ើបការណ៍អាមេរិក ក៏សង្កត់ធ្ងន់ចំពោះការបំផ្លាញហេដ្ឋារចនាសម្ព័ន្ធអ៊ុយក្រែន ពីសំណាក់ទាហានរុស្ស៊ី គឺជាបច្ច័យចម្បងធ្វើឲ្យកម្លាំងទឹកចិត្តទ័ពអ៊ុយក្រែនធ្លាក់ចុះខ្លាំង ហើយការធ្លាក់ទឹកចិត្តនេះ គឺអ្នកស្រីហាក់គ្មានឃើញសញ្ញាថាអាចនឹងមានសន្ទុះឆន្ទៈ ស្ទុះឡើងវិញ នៅក្នុងគ្រាដ៏ខ្លីនោះឡើយ។
តាមប្រភពដដែល ចាប់ពីពេលឥលូវនេះទៅហើយ គេសម្គាល់ឃើញស្រេចពីភាពថមថយស្រកស្រុតនៃការច្បាំងប្រមុខប្រយុទ្ធគ្នា។ ដ្បិតថា ភាគអ៊ុយក្រែន រវល់តែនឹងដោះស្រាយការលំបាក ដរចេញពីភាពត្រជាក់ ហើយខាងភាគីរុស្ស៊ី ក៏កំពុងតែរៀបចំក្បួនទ័ព និងគ្រឿងសព្វាវុធបន្ថែម ហើយនិងរៀបចំត្រៀមខ្លួនប្រុងប្រៀបប្រើយុទ្ធសាស្ត្រថ្មី ដើម្បីវាយសម្រុកជាថ្មី នៅក្រោយបញ្ចប់រដូវរងា។
ទីភ្នាក់ងារស៊ើបការណ៍សម្ងាត់អាមេរិក ក៏បានប្រមើលមើលពី វត្ថុបំណងផ្នែកនយោបាយ របស់ប្រធានាធិបតីរុស្ស៊ី វ្ល៉ាឌីមៀរ ពូទីន គឺហាក់ដូចជាគ្មានអ្វីផ្លាស់ប្តូរទេ ប៉ុន្តែមន្ត្រីចារកិច្ចអាមេរិក យល់ថា ប្រមុខរដ្ឋរុស្ស៊ី អាចនឹងប្តូរយុទ្ធសាស្ត្រយោធា អាចដូរញឹកញាប់ផង ក្នុងរយៈពេលខ្លីខាងមុខ។
ក្នុងសំណុំរឿងសង្គ្រាមអ៊ុយក្រែននេះ គឺ កាលពីថ្ងៃសុក្រ ទីប្រឹក្សាសន្តិសុខជាតិអាមេរិក បានចេញមុខគូសបញ្ជាក់ជាថ្មី ថាលោកប្រធានាធិបតី ចូ បៃដិន គ្មានចេតនានឹងប្រាស្រ័យឆ្លើយឆ្លងជាមួយនឹងលោកប្រធានាធិបតី វ្ល៉ាឌីមៀរ ពូទីន ពាក់ព័ន្ធនឹងរឿងអ៊ុយក្រែនទេ។ ការបញ្ជាក់នៅថ្ងៃសុក្រ បែបនេះ គឺខុសផ្ទុយពីថ្ងៃព្រសហ្បតិ៍ ដែលលោក បៃដិន ថាចង់និយាយជាមួយលោក ពូទីន ដើម្បីបញ្ចប់សង្គ្រាមអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ