ជប៉ុន និងអាមេរិកចុះកិច្ចព្រមព្រៀងស្តីពីការផ្គត់ផ្គង់រ៉ែយុទ្ធសាស្រ្ត
អាមេរិក និងជប៉ុនចុះហត្ថលេខាលើកិច្ចព្រមព្រៀងស្តីពីការដោះដូរ ផ្គត់ផ្គង់រ៉ែកម្រ ដែល សំខាន់សម្រាប់ការផលិតរថយន្តអគ្គិសនី។ បើតាមសេចក្តីថ្លែងការណ៍របស់អ្នកតំណាងពាណិជ្ជកម្មអាមេរិកកាលពីយប់ថ្ងៃចន្ទ ការពង្រឹងសហប្រតិបត្តិការជប៉ុន និងអាមេរិកជុំវិញបណ្តាញផ្គត់ផ្គង់រ៉ែយុទ្ធសាស្រ្តនឹងជួយជំរុញឲ្យអាមេរិក ជាមួយប្រទេសសម្ព័ន្ធមិត្តអាចអភិវឌ្ឍផលិតរថយន្តអគ្គិសនីដោយមិនចាំបាច់ពឹងអាស្រ័យខ្លាំងដូចមុនទៅលើរ៉ែកម្ររបស់ប្រទេសចិន។
ចុះផ្សាយនៅថ្ងៃ៖
ស្តាប់ - ០២:៤០
កិច្ចព្រមព្រៀងអាមេរិក និងជប៉ុនផ្តោតសំខាន់ទៅលើការផ្គត់ផ្គង់រ៉ែយុទ្ធសាស្រ្ត ជាពិសេសលោហៈកម្រលីចូម ដែលគេត្រូវការចាំបាច់សម្រាប់ផលិតអាគុយរថយន្តអគ្គិសនី។ កិច្ចព្រមព្រៀង ដែលភាគីអាមេរិក និងជប៉ុនបានចុះហត្ថលេខាជាមួយគ្នា កាលពីថ្ងៃចន្ទ មានគោលដៅផងដែរសម្រួលការដោះដូររវាងភាគីទាំងពីរ នូវផលិតផលមួយចំនួនផ្សេងទៀតដែលសំខាន់សម្រាប់ការអភិវឌ្ឍថាមពលស្អាតស្អំ។
នៅក្នុងក្របខ័ណ្ឌនៃច្បាប់កាត់បន្ថយអតិផរណារបស់អាមេរិក Inflation Reduction Act រដ្ឋបាលលោកចូ បៃដិនបានបង្កើតកញ្ចប់ថវិកាដ៏ច្រើនសម្បើម ប្រមាណ ៣៧៥ពាន់លានដុល្លារ សម្រាប់ជំរុញការប្រើប្រាស់ថាមពលស្អាតស្អំ ដែលជាផ្នែកមួយនៃនយោបាយប្រយុទ្ធប្រឆាំងនឹងការប្រែប្រួលអាកាសធាតុ។ ប៉ុន្តែ ដើម្បីធានាការផលិតថាមពលស្អាតស្អំទាំងនោះដែលមានដូចជា ថាមពលបានមកពីផ្ទាំងសូឡា វាយោអគ្គិសនី និងដើម្បីអាចប្រកួតប្រជែងជាមួយឧស្សាហកម្មផលិតរថយន្តអគ្គិសនីរបស់ចិនដែលនាំមុខគេនៅក្នុងពិភពលោក អាមេរិកត្រូវការចាប់ដៃគូជាមួយបរទេស ជាពិសេសប្រទេសសម្ព័ន្ធមិត្តដូចជាជប៉ុន ដែលធ្លាប់បារម្ភពីការបាត់បង់ផលប្រយោជន៍ ដោយសារច្បាប់កាត់បន្ថយអតិផរណារបស់អាមេរិក។
ច្បាប់កាត់បន្ថយអតិផរណារបស់អាមេរិកចែងថា រ៉ែកម្រដែលគេប្រើសម្រាប់ផលិតអាគុយរថយន្តអគ្គិសនី ចំនួន៤០%ត្រូវតែមានប្រភពចេញមកពីប្រទេស ដែលបានចុះកិច្ចព្រមព្រៀងដោះដូរពាណិជ្ជកម្មសេរីជាមួយអាមេរិក។ ជប៉ុន និងសហភាពអឺរ៉ុបផ្ទាល់ដែលមិនស្ថិតក្នុងចំណោមប្រទេសទាំង២០ដែលបានចុះហត្ថលេខាជាមួយអាមេរិក បារម្ភខ្លាចថា ឧស្សាហកម្មផលិតរថយន្តអគ្គិសនីរបស់ខ្លួននឹងអាចប៉ះពាល់ដោយសារច្បាប់កាត់បន្ថយអតិផរណាអាមេរិក។ នៅក្នុងសេចក្តីថ្លែងការណ៍កាលពីថ្ងៃចន្ទ អ្នកតំណាងពាណិជ្ជកម្មអាមេរិកលោកស្រី Katherine Taiពន្យល់ថា កិច្ចព្រមព្រៀង ជប៉ុន និងអាមេរិកសបញ្ជាក់ពីការប្តេជ្ញាចិត្តរបស់អាមេរិកដើម្បី បន្តធ្វើការជាមួយសម្ព័ន្ធមិត្ត ជាមួយប្រទេសដៃគូ ដើម្បីជំរុញបណ្តាញផ្គត់ផ្គង់រ៉ែកម្រ ដូចជា លីចូម នីគែល ជាដើម ដែលសំខាន់សម្រាប់ផលិតអាគុយរថយន្តអគ្គិសនី។
ការចុះកិច្ចព្រមព្រៀងជប៉ុន អាមេរិកដែលនឹងអាចបើកផ្លូវឲ្យរថយន្តអគ្គិសនីរបស់ជប៉ុនអាចទទួលប្រយោជន៍ពីច្បាប់កាត់បន្ថយអតិផរណារបស់អាមេរិក ជាសញ្ញាវិជ្ជមានផងដែរសម្រាប់សហភាពអឺរ៉ុបដែលកំពុងជួបបញ្ហាដូចជប៉ុន។ នៅក្នុងទស្សនកិច្ចនៅសេតវិមាននៅខែមីនានេះ ប្រធានគណៈកម្មការអឺរ៉ុបជាមួយប្រធានាធិបតីអាមេរិកបានប្រកាសចាប់ផ្តើមការចរចា ដើម្បីធ្វើយ៉ាងណាឲ្យរ៉ែកម្រ ឬអាគុយរថយន្តអគ្គិសនីដែលផលិតនៅទឹកដីអឺរ៉ុបអាចទទួលបានប្រយោជន៍ពីច្បាប់អនុគ្រោះពន្ធរបស់អាមេរិក(ច្បាប់កាត់បន្ថយអតិផរណារបស់អាមេរិក)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ