តុលាការញូវយ៉កសម្រេចចោទប្រកាន់លោកដូណាល់ ត្រាំពីបទព្រហ្មទណ្ឌ
លោកដូណាល់ ត្រាំត្រូវតុលាការចោទប្រកាន់ ក្នុងបទព្រហ្មទណ្ឌ ដែលជារឿងមិនធ្លាប់កើតមាន សម្រាប់អតីតប្រធានាធិបតីអាមេរិក។ តាមការអះអាងរបស់មេធាវីលោកដូណាល់ ត្រាំ កាលពីព្រហស្បតិ៍ ម្សិលមិញ អតីតប្រធានាធិបតីអាមេរិកត្រូវចូលខ្លួនទៅស្តាប់ការចោទប្រកាន់ នៅតុលាការក្នុងទីក្រុងញូវយ៉ក នៅថ្ងៃអង្គារសប្តាហ៍ក្រោយ។ តុលាការក្រុងញូវញ៉កមិនទាន់ប្រកាសផ្លូវការ បទចោទប្រកាន់ប្រឆាំងលោកដូណាល់ ត្រាំ ប៉ុន្តែ អតីតប្រធានាធិបតីអាមេរិកអាចត្រូវតុលាការចោទប្រកាន់ ក្នុងសំណុំរឿងប្រព្រឹត្តអំពើពុករលួយ ក្នុងអំឡុងពេលឃោសនាបោះឆ្នោតប្រធានាធិបតី កាលពីឆ្នាំ ២០១៦។ នៅក្នុងសេចក្តីថ្លែងការណ៍ នៅថ្ងៃម្សិលមិញ លោកដូណាល់ ត្រាំដែលសង្ឃឹមត្រលប់មកកាន់សេតវិមានសាជាថ្មី នៅឆ្នាំ ២០២៤ បានបរិហារ ការធ្វើទុក្ខបុកម្នេញនយោបាយ។
ចុះផ្សាយនៅថ្ងៃ៖
ស្តាប់ - ០២:២៥
ក្រោយជួបប្រជុំជាមួយគណៈវិនិច្ឆ័យ និងរដ្ឋអាជ្ញាក្រុងញូវយ៉ក កាលពីថ្ងៃព្រហស្បតិ៍ លោកស្រី Susan Necheles មេធាវីរបស់លោកដូណាល់ ត្រាំ បាននិយាយថា លោកដូណាល់ ត្រាំ ត្រូវរដ្ឋអាជ្ញាចោទប្រកាន់ជាផ្លូវការពីបទព្រហ្មទណ្ឌ នៅក្នុងរឿងប្រព្រឹត្តអំពើពុករលួយ នៅក្នុងអំឡុងពេលឃោសនាបោះឆ្នោតប្រធានាធិបតី អាមេរិក។
ដំណឹងចោទប្រកាន់អតីតប្រធានាធិបតី ដែលមិនធ្លាប់កើតមាន នៅក្នុងប្រវត្តិនយោបាយអាមេរិក កើតឡើង នៅក្រោយ រដ្ឋអាជ្ញាក្រុងញូវយ៉ក ដែលទើបចូលកាន់តំណែងនៅខែមករាដើមឆ្នាំនេះ សម្រេចសើរើសំណុំរឿងក្តី ដែលនៅក្នុងនោះ លោកដូណាល់ត្រាំ ត្រូវសង្ស័យថា បានប្រើប្រាស់ថវិកា ១សែន ៣ម៉ឺនដុល្លារ ដើម្បីឲ្យទិញភាពស្ងៀមស្ងាត់របស់ស្រ្តីតារាភាពយន្តអាសអាភៀសម្នាក់ មិនឲ្យនិយាយបរិហារលោក នៅក្នុងពេលអំឡុងឃោសនាបោះឆ្នោតប្រធានាធិបតីឆ្នាំ ២០១៦។
សំណុំរឿងក្តីនេះត្រូវតុលាការញូវយ៉កបើកការស៊ើបអង្កេតតាំងពីឆ្នាំ ២០១៨ នៅបន្ទាប់ពី អតីតមេធាវីម្នាក់របស់លោកដូណាល់ ត្រាំ ដែលក្រោយមកបានក្លាយជាសត្រូវរបស់លោកដូណាល់ ត្រាំ និងត្រូវផ្តន្ទាទោសនៅតុលាការ បានសារភាពថា លោកដូណាល់ ត្រាំ បានបញ្ជាឲ្យលោកយកលុយ ១សែន ៣ម៉ឺនដុល្លារ ទៅសូកប៉ាន់ នាងតារាភាពយន្ត Stormy Daniel ដើម្បីកុំឲ្យនាងលើកយករឿងទំនាក់ទំនងផ្លូវភេទជាមួយលោក ទៅនិយាយនៅក្នុងពេលឃោសនាបោះឆ្នោត។
សម្រាប់គណៈវិនិច្ឆ័យក្រុងញូវយ៉ក លោកដូណាល់ ត្រាំ បានរំលោភច្បាប់បោះឆ្នោត ដែលជាបទល្មើសព្រហ្មទណ្ឌ ពីព្រោះលោកមិនបាននិយាយពីការចាយលុយ ជាង ១សែនដុល្លារ ទៅក្នុងបញ្ជីប្រកាសប្រាក់ចំណាយសម្រាប់ការបោះឆ្នោត។ តាមប្រព័ន្ធចុះផ្សាយអាមេរិក លោកដូណាល់ ត្រាំ ត្រូវតុលាការក្រុងញូវយ៉កកោះហៅឲ្យទៅបង្ហាញខ្លួន នៅសប្តាហ៍ក្រោយ ដើម្បីស្តាប់បទចោទប្រកាន់ផ្លូវការ។ ក្នុងករណីលោកបដិសេធមិនបង្ហាញខ្លួន តុលាការក្រុងញូវយ៉កអាចទាមទារការធ្វើបត្យប័នពីរដ្ឋFlorida ជាទីដែលមហាសេដ្ឋីអាមេរិក ដូណាល់ ត្រាំ ធ្វើការ និងស្នាក់នៅ ភាគច្រើននៅក្រោយ ចប់អាណត្តិប្រធានាធិបតីអាមេរិកនៅឆ្នាំ ២០២១។
នៅក្នុងសេចក្តីថ្លែងការណ៍នៅថ្ងៃព្រហស្បតិ៍ អតីតប្រធានាធិបតីទី៤៥របស់អាមេរិក ដែលចាប់ផ្តើមឃោសនាតាំងពីខែវិច្ឆិកាឆ្នាំមុន សម្រាប់ត្រៀមការបោះឆ្នោតប្រធានាធិបតីឆ្នាំ ២០២៤ បានបរិហារគូប្រជែងនយោបាយរបស់លោក ថា កំពុងធ្វើទុក្ខបុកម្នេញនយោបាយ ដែលលោកប្រៀបប្រដូចទៅនឹងការប្រមាញ់តាមចាប់មេធ្មប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ