ចៅក្រមញូវយ៉កចេញដីកាកោះហៅលោកដូណាល់ ត្រាំឲ្យឆ្លើយបំភ្លឺពីរឿងប្រកាសពន្ធ
អតីតប្រធានាធិបតីអាមេរិក លោកដូណាល់ ត្រាំកំពុងជាប់រុំដោយសំណុំរឿងក្តីក្តាំនៅតុលាការ។ នៅថ្ងៃព្រហស្បតិ៍ ម្សិលមិញ ចៅក្រមនៅទីក្រុងញូវយ៉កបានសម្រេចចេញដីកាកោះហៅ អតីតប្រធានាធិបតីឲ្យមកផ្តល់សក្ខីកម្ម ឆ្លើយបំភ្លឺពីរឿងប្រកាសពន្ធរបស់ លោក និងក្រុមហ៊ុនរបស់លោក Trump Organization។ រដ្ឋអាជ្ញាក្រុងញូវយ៉កដែលជាម្ចាស់ដើមបណ្តឹងសំដែងការត្រេកអរ និងថា ការសម្រេចរបស់ចៅក្រមបញ្ជាក់ថា គ្មានអ្នកណាម្នាក់ដែលនៅលើហួស ខ្ពស់ជាងច្បាប់។
ចុះផ្សាយនៅថ្ងៃ៖
ស្តាប់ - ០២:២៦
នៅក្នុងសវនាការវីដេអូ កាលពីថ្ងៃព្រហស្បតិ៍ ចៅក្រមក្រុងញូវយ៉ក លោក Arthur Engoron ទាត់ចោលសំណើរបស់មេធាវីរបស់លោកដូណាល់ ត្រាំ ដោយបានសម្រេចកោះហៅ លោកដូណាល់ ត្រាំ និងកូនប្រុសស្រីពីរនាក់របស់លោកត្រាំ ឲ្យចូលខ្លួនមកធ្វើជាសាក្សី ឆ្លើយបំភ្លឺ ទៅនឹងពាក្យបណ្តឹងចោទប្រកាន់របស់រដ្ឋអាជ្ញាក្រុងញូវយ៉ក។
លោកដូណាល់ ត្រាំ និងកូនអាចប្រើយុទ្ធសាស្រ្តតែមួយដដែលៗ គឺជៀស ឲ្យអស់សមត្ថភាព ឆ្លើយសំណួររបស់ក្រុមស៊ើបអង្កេត ឬរដ្ឋអាជ្ញា។ ប៉ុន្តែ ចៅក្រមក្រុងញូវយ៉កបានសង្កត់ធ្ងន់ហើយថា លោកដូណាល់ត្រាំ និងកូនទាំងពីរ (Don Junior និងនាង Ivanka) មានរយៈពេល ២១ថ្ងៃ ដើម្បីបង្ហាញខ្លួន និងដាក់ជូនឯកសារគណនេយ្យ ទៅតាមការទាមទាររបស់រដ្ឋអាជ្ញា។
ជាប់ខ្លួនក្នុងការស៊ើបអង្កេតរបស់តុលាការ ទាក់ទងនឹងតួនាទីរបស់លោកនៅក្នុងរឿងសម្រុកចូលវិមានកាពីតូល កាលពីដើមឆ្នាំមុន អតីតប្រធានាធិបតី ទី ៤៥ របស់អាមេរិកត្រូវរដ្ឋអាជ្ញាក្រុងញូវយ៉កបើកការស៊ើបអង្កេតមួយទៀត ទាក់ទងនឹងរឿងប្រកាសពន្ធរបស់លោក និងក្រុមហ៊ុនTrump Organization នៅទីក្រុងញូវយ៉ក។
នៅក្នុងការស៊ើបអង្កេតស្តីពីការគ្រប់គ្រងជំនួញ របស់គ្រួសារដូណាល់ ត្រាំ រដ្ឋអាជ្ញាក្រុងញូវយ៉ក លោកស្រី Letitia James សង្ស័យថា ក្រុមហ៊ុនត្រាំ បានប្រកាស តម្លៃទ្រព្យសម្បត្តិ មិនត្រឹមត្រូវ ក្នុងគោលដៅកេងចង់បានប្រាក់ចំណេញ។ ឧទាហករណ៍ លោកដូណាល់ ត្រាំ និងក្រុមហ៊ុនត្រាំ បានប្រកាសបំប៉ោង ចំនួនទ្រពសម្បត្តិ និងបង្កើនតម្លៃ អចលទ្រព្យរបស់ខ្លួនច្រើនហួស ដើម្បីចង់បានប្រាក់កម្ចីពីធនាគារ ឬ ផ្ទុយទៅវិញ ប្រកាសតិចតួចពីចំនួនទ្រព្យសម្បត្តិដែលខ្លួនមាន ដើម្បីគេចរួចផុត ពីការបង់ពន្ធ។
នៅប៉ុន្មានថ្ងៃមកនេះ ក្តីសង្ស័យរបស់រដ្ឋអាជ្ញាកាន់តែរឹងមាំ នៅបន្ទាប់ពី ក្រុមហ៊ុនMazars ទទួលបន្ទុកគណនេយ្យរបស់ក្រុមហ៊ុនត្រាំ ជាច្រើនឆ្នាំមកហើយនោះបានពន្យល់ថា ការប្រកាសពន្ធរបស់ ក្រុមហ៊ុនត្រាំនៅប៉ុន្មានទសវត្សរ៍ មកនេះ មិនគួរឲ្យជឿទុកចិត្តនោះទេ។
អតីតប្រធានាធិបតីអាមេរិក និងកូននៅតែអាចប្តឹងឧទ្ធរណ៍ នឹងការសម្រេចចិត្តរបស់ចៅក្រម។ ក្នុងករណី ត្រូវបង្ហាញខ្លួន ដើម្បី ផ្តល់សក្ខីកម្ម ពួកគេនៅតែអាចរក្សាសិទ្ធិមិននិយាយស្តី ទៅតាមកំណែទម្រង់ទី៥នៃរដ្ឋធម្មនុញ្ញ។ បើលោកដូណាល់ ត្រាំ និងកូនៗ សម្រេចចិត្តប្រើយុទ្ធសាស្រ្តមួយនេះ មន្ទិលសង្ស័យដែលថា គ្រួសារត្រាំ លួចបន្លំពន្ធ កាន់តែធំ ដែលជារូបភាពមិនល្អ សម្រាប់លោកដូណាល់ ត្រាំ ដែលចង់ឈរឈ្មោះសាជាថ្មី សម្រាប់ការបោះឆ្នោតប្រធានាធិបតី នៅឆ្នាំ ២០២៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ