ប្រធានាធិបតីតៃវ៉ាន់បន្តទស្សនកិច្ចនៅក្នុងប្រទេសសម្ព័ន្ធមិត្តសេសសល់នៅតំបន់អាមេរិកឡាទីន
ប្រធានាធិបតីតៃវ៉ាន់លោកស្រីសៃ អ៊ីងវេនបន្តទស្សនកិច្ចនៅតំបន់អាមេរិកឡាទីនដោយធ្វើដំណើរទៅកាន់ប្រទេសបេលីក្នុងថ្ងៃអាទិត្យ ទី២ មេសានេះ។ ក្នុងថ្ងៃសៅរ៍ ទី១ មេសា និងថ្ងៃសុក្រ ទី៣១ មីនា លោកស្រីសៃ អ៊ីងវេនបានទៅទស្សនកិច្ចនៅក្នុងប្រទេសក្វាតេម៉ាឡា។ នៅក្វាតេម៉ាក្នុងជំនួបជាមួយសមភាគីក្វាតេម៉ាឡាលោកអាឡិចហាន់ដ្រូ យីមម៉ាតេ លោកស្រីសៃ អ៊ីងវេនបានបញ្ជាក់ថា ក្វាតេម៉ាឡាជាសម្ព័ន្ធមិត្តការទូតរឹងមាំរបស់តៃវ៉ាន់។ គួររម្លឹកថា វត្តមានរបស់ប្រធានាធិបតីតៃវ៉ាន់នៅអាមេរិកឡាទីនបានធ្វើឡើង ចំពេលដែលមានប្រទេសម្តងមួយៗក្នុងតំបន់បានរត់ចោលតៃវ៉ាន់ទៅគាំទ្រចិនវិញ។ ថ្មីៗចុងក្រោយនេះ គឺប្រទេសហុងឌូរ៉ាស។
ចុះផ្សាយនៅថ្ងៃ៖
ស្តាប់ - ០២:១៦
ដើម្បីបញ្ជាក់ពីសម្ព័ន្ធមិត្តការទូតរឹងមាំដែលក្វាតេម៉ាឡាមានជាមួយតៃវ៉ាន់ ប្រធានាធិបតីតៃវ៉ាន់លោកស្រីសៃ អ៊ីងវេនបានលើកឡើងពីកិច្ចសហប្រតិបត្តិការរវាងប្រទេសទាំងពីរដែលបានបន្តកាន់តែខ្លាំងនៅក្នុងវិស័យសុខាភិបាល សេដ្ឋកិច្ច ពាណិជ្ជកម្ម រួមទាំងហេដ្ឋារចនាសម្ព័ន្ធថ្នាក់ក្រោមនារយៈពេលប៉ុន្មានឆ្នាំចុងក្រោយនេះ។ ត្រង់ចំណុចនេះ លោកស្រីសៃ អ៊ីងវេនបាននិយាយពីជំនួយរបស់តៃវ៉ាន់ចំនួន ២២លានដុល្លារដើម្បីសាងសង់មន្ទីរពេទ្យមួយដែលទើបបើកឲ្យដំណើរការកាលពីថ្ងៃទី២០ កុម្ភៈកន្លងទៅនៅប៉ែកខាងលិចប្រទេស។
ចំណែកប្រធានាធិបតីក្វាតេម៉ាឡាលោកអាឡិចហាន់ដ្រូ យីមម៉ាតេបានឆ្លើយតបវិញថា ទស្សនកិច្ចរបស់លោកស្រីសៃ អ៊ីងវេនមានសារៈសំខាន់ខ្លាំងណាស់ដើម្បីបញ្ជាក់ឡើងវិញពីការគាំទ្រពេញទំហឹងរបស់តៃវ៉ាន់ចំពោះក្វាតេម៉ាឡា។ យោងតាមស្ថិតិផ្លូវការ ជំនួយរបស់តៃវ៉ាន់ចំពោះក្វាតេម៉ាឡាចន្លោះឆ្នាំ ២០១៣ និងឆ្នាំ ២០២១ មានទឹកប្រាក់ចំនួន ៨៩ ០៦១ ០០០ដុល្លារ ពោលច្រើនជាងជំនួយរបស់សហភាពអឺរ៉ុបដែលមានចំនួន ៨៦ ០៩៩ ០០០ដុល្លារ។ ក្នុងឆ្នាំ ២០២១ ក្រុងតៃវ៉ាន់ និងក្រុងក្វាតេម៉ាឡាបានចុះហត្ថលេខាលើកិច្ចព្រមព្រៀងសហប្រតិបត្តិការថ្មីមួយសម្រាប់ជំនួយចំនួន ៦០លានដុល្លារពីតៃវ៉ាន់ក្នុងរយៈពេល ៤ឆ្នាំ។
បន្ទាប់ពីក្វាតេម៉ាឡា លោកស្រីសៃ អ៊ីងវេនបន្តដំណើរទៅប្រទេសបេលីក្នុងថ្ងៃអាទិត្យ ទី២ និងថ្ងៃចន្ទ ទី៣ មេសា។ វត្តមានរបស់ប្រធានាធិបតីតៃវ៉ាន់នៅតំបន់អាមេរិកឡាទីនពេលនេះបានធ្វើឡើង ចំពេលដែលមានប្រទេសម្តងមួយៗក្នុងតំបន់បានផ្តាច់ទំនាក់ទំនងជាមួយចិនតៃវ៉ាន់ទៅភ្ជាប់ទំនាក់ទំនងជាមួយចិនដីគោកវិញ។ ថ្មីៗនេះ ប្រទេសហុងឌូរ៉ាសបានបែរងាករកចិនវិញ បន្ទាប់ពីបានរួមសុខ រួមទុក្ខជាមួយតៃវ៉ាន់អស់រយៈពេលជាង ៨០ឆ្នាំ។ គិតត្រឹមថ្ងៃអាទិត្យ ទី២ មេសា នៅសល់តែ ១៣ប្រទេសក្នុងលោកដែលកំពុងបន្តទទួលស្គាល់តៃវ៉ាន់ ក្នុងនោះ មាន ៧ប្រទេសស្ថិតនៅតំបន់អាមរិកឡាទីន និងតំបន់ការ៉ាអ៊ីប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ