មូលនិធិរូបិយវត្ថុអន្តរជាតិ បញ្ចុះការព្យាករកំណើនសេដ្ឋកិច្ចពិភពលោកឆ្នាំ២០២៣
បើប្រៀបទៅនឹងការព្យាករ កាលពីខែមករា កំណើនសេដ្ឋកិច្ចពិភពលោកសម្រាប់ឆ្នាំ២០២៣បានធ្លាក់ចុះបន្តិច ប៉ុន្តែប្រទេសជាតំបន់សេដ្ឋកិច្ចសំខាន់ ទំនងជាអាចគេចផុតពីវិបត្តិសេដ្ឋកិច្ចដើរថយក្រោយបាន។ នេះបើតាមទិន្នន័យព្យាករថ្មីរបស់ អង្គការមូលនិធិរូបិយវត្ថុអន្តរជាតិ FMI/IMF ចេញផ្សាយនាឱកាសបើកជំនួបប្រជុំជាមួយធនាគារពិភពលោក នៅថ្ងៃអង្គារទី ១១មេសា២០២៣។
ចុះផ្សាយនៅថ្ងៃ៖
ស្តាប់ - ០២:២៦
សេដ្ឋកិច្ចពិភពលោកឆ្នាំ ២០២៣មានកំណើនត្រឹម២,៨% មិនមែន២,៩%ដូចការព្យាករកាលពីដើមឆ្នាំទេ ព្រោះសេដ្ឋកិច្ចនៅបន្តរងចំណាយឥទ្ធិពលនៃវិបត្តិកូវីដ១៩ និងថែមដោយសង្គ្រាមរុស្ស៊ីចូលឈ្លានពានអ៊ុយក្រែនទៀត។ ប៉ុន្តែមូលនិធិរូបិយវត្ថុមិនប្តូរផ្លាស់ការព្យាករសម្រាប់ឆ្នាំ២០២៤ឡើយ គឺនៅ៣%ដដែល និងសម្រាប់រយៈពេល៥ឆ្នាំទៅមុខទៀត។
គេសង្កេតឃើញសេដ្ឋកិច្ចចាប់រើបឡើងវិញជាដំណាក់ៗ។ ទស្សនៈវិស័យសេដ្ឋកិច្ចអាចអាក្រក់ខ្លាំងជាងនេះ ប្រសិនបើចិនបន្តបិទប្រទេស ឬគ្មានឥណ្ឌាដែលមានសន្ទុះសេដ្ឋកិច្ចលឿនខ្លាំងទេនោះ។ នេះបើតាមការពន្យល់របស់សេដ្ឋវិទូ លោកPierre-Olivier Gourinchas នាយកដេប៉ាតឺម៉ង់ស្រាវជ្រាវនៃមូលនិធិរូបិយវត្ថុអន្តរជាតិ ដោយលម្អិតថា ប្រទេសមួយចំនួនធំ មិនទាន់អាចត្រលប់មកស្ថានភាពធម្មតាវិញបានទេ ដោយហេតុតែវិបត្តិផ្សេងទៀត គឺអតិផរណា។ ពិភពលោកបន្តមានបញ្ហាអតិផរណាខ្លាំង កំរិតប្រមាណ ៧% នៅឆ្នាំ២០២៣ ជាពិសេសអតិផរណាក្នុងវិស័យដែលមិនមែនជាថាមពលនិងចំណីអាហារ។ ការដួលរំលំនៃធនាគារតំបន់របស់អាមេរិក និងធនាគារឯកជនមួយរបស់ស្វីស មិនត្រឹមតែបានអង្រួនវិស័យហិរញ្ញវត្ថុទេ តែថែមទាំងជាបន្ទុកដ៏ធ្ងន់នាំឱ្យកំណើនសេដ្ឋកិច្ចត្រូវធ្លាក់ចុះ។
ទោះជាយ៉ាងដូច្នេះក្តី ក៏មូលនិធិរូបិយវត្ថុ ព្យាករឃើញថា អាមេរិកមានកំណើនសេដ្ឋកិច្ច ១,៦%នៅឆ្នាំ២០២៣នេះ និង១,១%នៅឆ្នាំ២០២៤។ ចំណែកបារាំងនៅដដែល ០,៧%នៅឆ្នាំនេះ និងត្រឹមតែ១,៣%នៅឆ្នាំក្រោយមិនមែន១,៦%ដូចការព្យាករកាលពីខែមករាទេ។ បើនិយាយអំពីតំបន់អឺរ៉ូ កំណើនសេដ្ឋកិច្ចបានប្រសើរជាងការព្យាករមុន ព្រោះអេស្ប៉ាញនិងអ៊ីតាលីស្ទុះឡើងខ្លាំងជាងការគិត។ អង់គ្លេសក៏ប្រសើរដែរ សេដ្ឋកិច្ចដើរថយក្រោយមែនតែតិចជាងគម្រោងក្នុងខែមករា។ អាល្លឺម៉ង់មហាអំណាចសេដ្ឋកិច្ចទីមួយអឺរ៉ុប បន្តលង់ក្នុងវិបត្តិសេដ្ឋកិច្ចដើរថយក្រោយដដែលបើទោះជាឧស្សាហកម្មកំរើកខ្លាំងក៏ដោយ។
ជាមួយកំណើន៥,២%នៅឆ្នាំ២០២៣ ចិននៅតែក្បាលម៉ាស៊ីនអូសទាញកំណើនសេដ្ឋកិច្ចពិភពលោកដដែល ប៉ុន្តែដោយឃើញមានសញ្ញាទន់ខ្សោយខ្លាំង IMF ព្យាករថា ចិននឹងកំណើនសេដ្ឋកិច្ចត្រឹមតែ៤,៥%នៅឆ្នាំ២០២៤ ដែលជាអត្រាទាបបំផុតក្នុងរយៈ៣០ឆ្នាំនេះ។
ជាថ្មីម្តងទៀត ទោះបីជារងទណ្ឌកម្មយ៉ាងធ្ងន់ធ្ងរក៏ដោយ ក៏មូលនិធិរូបិយវត្ថុព្យាករថាសេដ្ឋកិច្ចរុស្ស៊ីដែលទ្រទ្រង់ដោយវត្ថុធាតុដើម នឹងមានកំណើន ០,៧%នៅឆ្នាំនេះ និង១,៣%នៅ២០២៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ