ប្រឈមនឹងវិបត្តិបំណុលក្នុងស្រុក លោកចូ បៃដិន បង្រួញទស្សនកិច្ចនៅអាស៊ី
លោកប្រធានាធិបតីអាមេរិក ចូ បៃដិន បានបង្ហាញសុទិដ្ឋនិយមថាមានលទ្ធភាពដោះស្រាយវិបត្តិបំណុលក្នុងស្រុក មិនឱ្យលេចជារូបរាងបាន នៅ១៥ថ្ងៃទៀតខាងមុខ។ ប៉ុន្តែលោកត្រូវការប្រឹងប្រែងខ្លាំងបន្ថែមទៀត ហេតុដូច្នេះហើយបានជាលោកសម្រេចចិត្តកាត់បន្ថយរយៈពេលបំពេញទស្សនកិច្ចនៅក្នុងតំបន់អាស៊ី។
ចុះផ្សាយនៅថ្ងៃ៖
ស្តាប់ - ០២:០៤
លោក ចូបៃដិន បានជួបជជែកជាមួយប្រធានគណបក្សសាធារណរដ្ឋ ប្រធានក្រុមបក្សប្រជាធិបតេយ្យនៅសភា នាថ្ងៃអង្គារទី ១៦ឧសភាម្សិលមិញ តាមទូរស័ព្ទហើយ នៅតែពុំអាចរកឃើញការព្រមព្រៀងបញ្ចៀសវិបត្តិថវិកាទៀត។ ក្រុមអ្នកសាធារណរដ្ឋដែលមានសំឡេងភាគច្រើននៅសភា បានដាក់លក្ខខណ្ឌថា ពួកគេយល់ព្រមឱ្យអាមេរិកដំឡើងកំរិតអតិបរិមាប្រាក់បំណុលជាតិ ដរាបណាតែរដ្ឋាភិបាលព្រមធ្វើសម្បទានជុំវិញកញ្ចប់ថវិការដ្ឋដែរ។ ឯខាងលោកបៃដិន និងគណបក្សប្រជាធិបតេយ្យមិនចង់ចងភ្ជាប់រឿងពីរនេះចូលគ្នាទេ។ ដូច្នេះនៅមានការលំបាកជាច្រើនទៀត ដែល ក្រុមការងាររបស់ប្រធានាធិបតី និងក្រុមអ្នកសាធារណរដ្ឋ ត្រូវបន្តចរចា។ ហើយលោកប្រធានាធិបតី បៃដិន នឹងទទួលជួប ដោយផ្ទាល់ទល់មុខគ្នាជាថ្មី នៅថ្ងៃអាទិត្យ ពេលលោកត្រលប់មកពីប្រជុំG៧ នៅប្រទេសជប៉ុនវិញ។
ទោះជាទទួលស្គាល់ថានៅមានចំណុចខ្ទាស់គ្នាច្រើនក្តី ក៏បើតាមសេតវិមាន លោកប្រធានាធិបតីចូបៃដិន នៅតែមានសុទិដ្ឋនិយមថានឹងរកឃើញកិច្ចព្រមព្រៀងថវិកាដ៏សមរម្យមួយ បញ្ចៀសមិនឱ្យវិបត្តិជាប់គាំងថវិកាទេ។ ប៉ុន្តែភាពបន្ទាន់ផ្នែកថវិកា និងការលំបាកនៃការចរចា បានជំរុញឱ្យលោកប្រធានាធិបតីអាមេរិក មិនអាចចេញទៅបំពេញទស្សនកិច្ចនៅអាស៊ី ដោយស្ងប់ចិត្តនិងតាមគម្រោងឡើយ។ លោកប្រធានាធិបតី ត្រូវបង្រួញពេលបំពេញទស្សនកិច្ចនៅតំបន់ឥណ្ឌូប៉ាស៊ីហ្វិក និងបានលុបចោលជំនួបការទូតសំខាន់ៗមួយចំនួន ដើម្បីផ្តល់អាទិភាពដល់តែជំនួបកំពូលហ្សេ៧ ដែលប្រព្រឹត្តទៅនៅប្រទេសជប៉ុនប៉ុណ្ណោះ។
ដូច្នេះលោកប្រធានាធិបតី បៃដិន មិនអញ្ជើញទៅអូស្ត្រាលី និងប៉ាពូអាស៊ីនូវែលហ្គីណេ ដែលគ្រោងប្រព្រឹត្តទៅនៅសប្តាហ៍ក្រោយទេ។ ជំនួបចតុភាគី Quad អាមេរិក ជប៉ុន អូស្ត្រាលី និងឥណ្ឌានៅក្រុងស៊ីដនី ត្រូវលុបចោល ដោយឆ្លៀតទៅជួបជុំគ្នានៅជប៉ុន នាឱកាសជំនួបកំពូលហ្សេ៧វិញ។ នេះបើតាមសេចក្តីជូនដំណឹងរបស់នាយករដ្ឋមន្ត្រីអូស្ត្រាលី ដោយអះអាងថា ជំនួបទ្វេភាគីអូស្ត្រាលី-ឥណ្ឌាត្រូវរក្សាទុកនៅដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ