រដ្ឋមន្ត្រីមហាផ្ទៃបារាំងទៅញូវយ៉ក ដើម្បីពង្រឹងកិច្ចសហការផ្នែកប្រឆាំងភេរវកម្ម
ពីទីក្រុងញូវយ៉ក រដ្ឋមន្ត្រីក្រសួងមហាផ្ទៃបារាំង បានក្រើនរំលឹកពីការគំរាមកំហែងធ្វើអំពើភេរវកម្មពីសំណាក់ពួកក្រុមជីហាតអ៊ីស្លាម នៅប្រទេសបារាំងនិងអឺរ៉ុប។ ការលើកឡើងរបស់រដ្ឋមន្ត្រីមហាផ្ទៃបារាំង បែបនេះ គឺធ្វើឡើងនៅថ្ងៃសុក្រ នៅក្នុងឱកាសដំណើរទស្សនកិច្ច ចំនួន២ថ្ងៃ នៅសហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:៣៨
សញ្ញាណគំរាមកំហែងអំពើភេវរកម្ម ចាប់ផ្តើមកម្រើកឡើងវិញហើយ នៅបារាំងនិងនៅអឺរ៉ុប។ ប្រភពគ្រោះថ្នាក់ធំ ទី១ គឺពួកភេរវជនជីហាត អ៊ីស្លាមជ្រុលនិយម។ អាស្រ័យហេតុនេះ ការពង្រឹងកិច្ចការជាមួយគ្នា រវាងសហរដ្ឋអាមេរិកនិងបារាំង ដើម្បីចែករំលែកព័ត៌មានសម្ងាត់ទប់ទល់នឹងអំពើភេរវកម្ម គឺជាកត្តាចាំបាច់ មិនអាចខ្វះបាន។ នេះគឺប្រសាសន៍របស់លោក Gérald Darmanin រដ្ឋមន្ត្រីក្រសួងមហាផ្ទៃបារាំង ដែលបានផ្តល់សម្ភាសទៅឲ្យទីភ្នាក់ងារព័ត៌មានបារាំងAFP នៅសហរដ្ឋអាមេរិក។ សហរដ្ឋអាមេរិក ជាទីដែល រដ្ឋមន្ត្រីមហាផ្ទៃបារាំង បំពេញទស្សនកិច្ច នៅទីក្រុង ញូវយ៉ក វ៉ាស៊ីនតោន និងការិយាល័យអង្គការសហប្រជាជាតិ។
លោក Gérald Darmanin រដ្ឋមន្ត្រីក្រសួងមហាផ្ទៃបារាំង បានដាស់តឿនថា ការកម្រើកសញ្ញាណអាសន្ននេះ ក៏ព្រោះតែស្ថានភាពអំណោយផល តួយ៉ាង អាមេរិកដកទ័ពពីអាហ្វហ្កានីស្ថាន ហើយបារាំងក៏ដកទ័ពពីតំបន់អាហ្វ្រិកសាហែល ដែលធ្វើឲ្យពួកភេររនិយម កាន់តែបានចិត្ត បង្កបង្កើនកម្លាំង។ រដ្ឋមន្ត្រីបារាំង សង្កត់សម្តីបន្ថែម ពីស្ថានភាពសន្តិសុខអាមេរិក ដែលហាក់កំពុងផ្តោតការយកចិត្តទុកដាក់ខ្លាំងទៅលើបញ្ហាអសន្តិសុខនៅក្នុងជាតិខ្លួន ដូចជាត្រូវទប់ទល់នឹងអំពើហិង្សាបាញ់រះសម្លាប់មនុស្សជាញឹកញយ អំពើហិង្សាជាតិសាសន៍ខ្មៅស តែក៏មិនត្រូវភ្លេចទេ ពីការគំរាមកំហែងភេរវកម្មអន្តរជាតិ។ នេះបើតាមលោក Gérald Darmanin។
ក្នុងដំណើរ២ថ្ងៃរបស់មន្ត្រីជាន់ខ្ពស់បារាំងនៅអាមេរិកនេះ ឋិតក្នុងក្របខណ្ឌទ្វេភាគី ដែលចងគ្នាដោយកិច្ចព្រមព្រៀង១ ចុះពីឆ្នាំ២០១៦ ស្តីពី កិច្ចសហការប្រយុទ្ធប្រឆាំងអំពើភេរវកម្មនិងបទល្មើសឧក្រិដ្ឋកម្មធំៗ។ រដ្ឋមន្ត្រីក្រសួងមហាផ្ទៃបារាំង បានជួបពិភាក្សាជាមួយ លោក អាឡេហាន់ដ្រូ ម៉ាយ៉រកាស រដ្ឋមន្រ្តីក្រសួងសន្តិសុខផ្ទៃក្នុង របស់អាមេរិក និងអនុរដ្ឋមន្ត្រីក្រសួងយុត្តិធម៌អាមេរិក អ្នកស្រីលីស្សា ម៉ូណាកូ ព្រមទាំងពិភាក្សាជាមួយ អគ្គនគរបាលសហព័ន្ធអាមេរិក ។
ជំនួបទាំងនេះ គឺសំខាន់ណាស់ ដើម្បីជជែកគ្នាពីដំណើររៀបចំព្រឹត្តការណ៍អន្តរជាតិសំខាន់ៗដែលបារាំងត្រូវរៀបចំនៅក្នុងពេលឆាប់ៗខាងមុខនេះ។ ជាក់ស្តែង ខែកញ្ញា-តុលា ឆ្នាំនេះ បារាំង ត្រូវរៀបចំការប្រកួតកីឡាបាល់ឱបពិភពលោក ហើយនិងក្នុងឆ្នាំនេះដែរ បារាំងត្រូវទទួលព្រះមហាក្សត្រអង់គ្លេស ហើយនិង សម្តេចប៉ាបកាតូលិក ហ្វ្រង់ស័រ ជាដើម ហើយនៅឆ្នាំថ្មីខាងមុខ ឆ្នាំ២០២៤ បារាំង ក៏ត្រូវ ធ្វើជាម្ចាស់ផ្ទះប្រកួតកីឡាអូឡាំពិកពិភពលោក ទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ