ស៊ុយអែត និងហ្វាំងឡង់ប្តេជ្ញាចាប់ដៃចូលជាសមាជិករបស់អូតង់ ទាំងអស់គ្នា
ហ្វាំងឡង់ និងស៊ុយអែតនៅតែប្តេជ្ញាចូលជាសមាជិករបស់អង្គការអូតង់ ក្នុងពេលជាមួយគ្នា បើទោះបីជាតួកគី បង្ហាញចេតនាគាំទ្រហ្វាំងឡង់ និងបិទខ្ទប់បេក្ខភាពរបស់ស៊ុយអែត។ នាយករដ្ឋមន្រ្តីរបស់ប្រទេសទាំងពីរបានបង្ហាញជំហររួមគ្នា នៅក្នុងសន្និសីទកាសែត នៅទីក្រុងស្តុកខូម កាលពីថ្ងៃព្រហស្បតិ៍ jទី ២កុម្ភៈ ពោលគឺនៅមួយថ្ងៃក្រោយ ប្រធានាធិបតីតួកគី ពន្លយសាជាថ្មី ពីជំហរគាំទ្រ ហ្វាំងឡង់ ប៉ុន្តែ ប្រឆាំងស៊ុយអែត។
ចុះផ្សាយនៅថ្ងៃ៖
ស្តាប់ - ០២:៤២
ប្រធានាធិបតីតួកគី លោករេសេប អ៊ែរដូហ្កានបានបញ្ជាក់សាជាថ្មី កាលពីថ្ងៃពុធ ថា តួកគីនឹងមិនអនុញ្ញាតឲ្យស៊ុយអែតចូលជាសមាជិករបស់អង្គការអូតង់ ដរាបណា ស៊ុយអែតនៅតែអនុញ្ញាតឲ្យមានបាតុកម្ម របស់ក្រុមជ្រុលនិយម ដែលបានដុតគម្ពីកូរ៉ាន របស់សាសនាអ៊ីស្លាម។ បិទខ្ទប់បេក្ខភាពរបស់ស៊ុយអែត ប៉ុន្តែ តួកគីអាចបើកភ្លើងខៀវឲ្យហ្វាំងឡង់ចូលជាសមាជិកអូតង់ មុនស៊ុយអែត។ ការស្ទង់មតិចុះផ្សាយដោយកាសែតហ្វាំងឡង់ កាលពីថ្ងៃព្រហស្បតិ៍បង្ហាញថា ប្រជាជនហ្វាំងឡង់ ៥៣%គាំទ្រចង់ឲ្យហ្វាំងឡង់ចូលជាសមាជិកអូតង់ មុនស៊ុយអែត។
ប្រមុខរដ្ឋាភិបាលស៊ុយអែត និងហ្វាំងឡង់ បានទាត់ចោលសំណើរបស់តួកគី ក្នុងហេតុផលថា សន្តិសុខរបស់ប្រទេសទាំងពីរមានជាប់ពាក់ព័ន្ធគ្នាទៅវិញទៅមក។ នៅក្នុងសន្និសីទកាសែត កាលពីថ្ងៃព្រហស្បតិ៍ នាយករដ្ឋមន្រ្តី ហ្វាំងឡង់ និងស៊ុយអែតបានអះអាងថា ប្រទេសទាំងពីរប្តេជ្ញាចង់ចូលជាសមាជិករបស់អូតង់ក្នុងពេលជាមួយគ្នា គ្មានអ្នកមុន គ្មានអ្នកក្រោយ។
លោកស្រីនាយករដ្ឋមន្រ្តីហ្វាំងឡង់បាននិយាយគាំទ្រស៊ុយអែត ដោយថា ហ្វាំងឡង់មិនចូលចិត្តបរិយាកាសដែលថា ស៊ុយអែត ជាសិស្សមានបញ្ហា។ ស៊ុយអែតមិនមែនជាបញ្ហា ហើយស៊ុយអែតក៏បានឆ្លើយតបគ្រប់លក្ខខណ្ឌ ដើម្បីក្លាយជាសមាជិករបស់អូតង់។ ហ្វាំងឡង់ និងស៊ុយអែតបានធ្វើដំណើរជាមួយគ្នា តាំងពីដំបូងទី ដូច្នេះ ប្រទេសទាំងពីរបន្តចាប់ដៃ ដើម្បីចូលជាសមាជិករបស់អូតង់ទាំងអស់គ្នា។
ដោយសារសង្រ្គាមរុស្ស៊ីឈ្លានពានអ៊ុយក្រែន ស៊ុយអែត ជាពិសេសហ្វាំងឡង់ដែលជាប់ព្រំដែនជាមួយរុស្ស៊ីបានដាក់បេក្ខភាព ដើម្បីសុំចូលជាសមាជិកថ្មីរបស់អូតង់ កាលពីខែ ឧសភាឆ្នាំ ២០២២។ ប៉ុន្តែ តួកគីបានបដិសេធមិនធ្វើសច្ចាប័ន ដើម្បីបើកផ្លូវឲ្យប្រទេសស្កង់ឌីណាវទាំងពីរអាចចូលជាសមាជិករបស់អូតង់។
តួកគីបានចោទប្រកាន់ស៊ុយអែតថា បានផ្តល់សិទ្ធិជ្រកកោនដល់ក្រុមអ្នកប្រឆាំងរដ្ឋាភិបាលតួកគី ដូចជាសមាជិករបស់គណបក្សពលករ គួដឌីស្ថាន ដែលរដ្ឋាភិបាលរបស់អ៊ែរដូហ្កានចាត់ទុកជាក្រុមភេរវនិយម ធ្វើសកម្មភាពពីបរទេស ដើម្បីគំរាមកំហែងសន្តិសុខតួកគី។
ដើម្បីបានភ្លើងខៀវរបស់តួកគី ហ្វាំងឡង់ និងស៊ុយអែត បានចុះកិច្ចព្រមព្រៀងជាមួយតួកគី កាលពីឆ្នាំមុន ដើម្បីប្រយុទ្ធប្រឆាំង ក្រុមភេរវនិយម។ នៅថ្ងៃព្រហស្បតិ៍ ម្សិលមិញ រដ្ឋមន្រ្តីយុត្តិធម៌ស៊ុយអែតបានប្រកាសរឹតបន្តឹងច្បាប់ប្រឆាំងភេរវកម្ម តាមរយៈ ការហាមឃាត់សកម្មភាពជាប់ទាក់ទងនឹងក្រុមជ្រុលនិយម។ សេចក្តីព្រាងច្បាប់ថ្មីរបស់ស៊ុយអែតដើម្បី ប្រឆាំងក្រុមភេរវនិយម ដែលអាចចូលជាធរមាននៅខែមិថុនា ដើរស្របនឹងការទាមទាររបស់តួកគី ប៉ុន្តែ មិនប្រាកដថា នឹងអាចបញ្ចុះបញ្ចូលតួកគី។
ថ្មីៗនេះ រដ្ឋាភិបាលតួកគី បានផ្ទុះកំហឹង ដាក់រដ្ឋាភិបាលស៊ុយអែត ដែលបានបណ្តោយឲ្យអ្នកគាំទ្រក្រុមគួដឌីស្ថានធ្វើបាតុកម្មប្រឆាំងប្រធានាធិបតីតួកគីនៅទីក្រុងស្តុកខូម។ បាតុកម្មកាលពីសប្តាហ៍មុន របស់ក្រុមស្តាំនិយមជ្រុលស៊ុយអែត ដែលបានដុតគម្ពីកូរ៉ាន ប្រៀបបាន នឹងការយកប្រេងទៅចាក់លើភ្លើង ធ្វើឲ្យតួកគីកាន់តែឆេះដុំ ប្រកាសបិទខ្ទប់ មិនឲ្យស៊ុយអែតចូលជាសមាជិករបស់អូតង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ