អាមេរិក និងគុយបាទាល់ចោលការចុះផ្សាយដែលថាគុយបាផ្តល់កន្លែងឲ្យចិនបើកការិយាល័យលួចស្តាប់ការសម្ងាត់
ចិន និងគុយបាបានចុះកិច្ចព្រមព្រៀងដើម្បីអនុញ្ញាតឲ្យចិនបើកកន្លែងយកការណ៍សម្ងាត់នៅក្នុងទឹកដីគុយបា ដូចការចុះផ្សាយរបស់កាសែតអាមេរិក Wall Street Journal? ក្រសួងការពារជាតិអាមេរិក កាលពីថ្ងៃព្រហស្បតិ៍ បានចេញមុខបដិសេធការចុះផ្សាយរបស់កាសែតអាមេរិក ចំណែកគុយបា តាមរយៈអនុរដ្ឋមន្រ្តីការបទេសចាត់ទុក ព័ត៌មានចុះផ្សាយ ក្នុងកាសែត Wall Street Journal ថា ជាព័ត៌មានភូតកុហក គ្មានមូលដ្ឋានច្បាស់លាស់។
ចុះផ្សាយនៅថ្ងៃ៖
ស្តាប់ - ០២:៤៦
ឧត្តមសេនីយ៍ Pat Ryder អ្នកនាំពាក្យរបស់ក្រសួងការពារជាតិអាមេរិក និយាយថា ជាមួយនឹងព័ត៌មានដែលគេទទួលបាន វាមិនមែនជារឿងពិតនោះទេ ដែលថា អាមេរិកបានដឹងពីគម្រោង ចិនចង់អភិវឌ្ឍបង្កើតមូលដ្ឋានស៊ើបការណ៍សម្ងាត់នៅគុយបា។ ប៉ុន្តែ យ៉ាងណាក៏ដោយ អាមេរិកតាមដានជាប់ជាអចិន្រ្តៃយ៍ទំនាក់ទំនងរវាងចិន និងគុយបា។
ដោយដកស្រង់ប្រភពមន្រ្តីអាមេរិក ដែលសុំមិនបញ្ចេញឈ្មោះ កាសែតសេដ្ឋកិច្ច របស់អាមេរិក កាសែត Wall Street Journal បានចុះផ្សាយកាលពីថ្ងៃព្រហស្បតិ៍ម្សិលមិញ ថា ចិន និងគុយបា បានចុះកិច្ចព្រមព្រៀងដែលនៅក្នុងនោះ ចិនត្រូវផ្តល់ទៅឲ្យគុយបានូវទឹកប្រាក់រាប់ពាន់លានដុល្លារដើម្បីសាងសង់ ទីតាំងអេឡិចត្រូនិកលួចស្តាប់របស់ចិន នៅក្នុងទឹកដីគុយបា។
ប្រតិកម្មនឹងការចុះផ្សាយរបស់កាសែតអាមេរិក អ្នកនាំពាក្យរបស់សេតវិមាន លោកJohn Kirbyបាននិយាយប្រាប់ទូរទស្សន៍ MSNBC ថា ព័ត៌មានរបស់កាសែត Wall Street Journal ជាព័ត៌មានមិនពិត។
នៅថ្ងៃព្រហស្បតិ៍ ទូរទស្សន៍ CNN ក៏បានចុះផ្សាយព័ត៌មាននេះ ដោយបានដកស្រង់ប្រភពស្និទ្ធទីភ្នាក់ងារស៊ើបការណ៍អាមេរិក។ តាមCNN អាមេរិកទើបដឹង ពីគម្រោងចិន គុយបា នៅប៉ុន្មានសប្តាហ៍មុននេះ ប៉ុន្តែ មិនច្បាស់ថា តើចិនបានចាប់ផ្តើមការដ្ឋានសាងសង់ហើយឬនៅ។
ទាំងអាមេរិក និងគុយបា បានចេញមុខទាត់ចោលការចុះផ្សាយរបស់កាសែត Wall Street Journal ដែលថា ចិនមានគម្រោងបង្កើតមូលដ្ឋានទ័ព លួចស្តាប់យកការណ៍ នៅក្នុងទឹកដីគុយបា។
ពីទីក្រុងឡាហាវ៉ាន អនុរដ្ឋមន្រ្តីការបរទេសគុយបា លោក Carlos Fernandez de Cossioបានចេញសេចក្តីថ្លែងការណ៍ ទាត់ចោលការចុះផ្សាយរបស់កាសែតអាមេរិក។ តាមអនុរដ្ឋមន្រ្តីការបរទេសគុយបា គុយបាប្រឆាំងរាល់វត្តមានទ័ពបរទេស នៅអាមេរិកឡាទីន ដែលនៅក្នុងនោះមានផងដែរ មូលដ្ឋាន និងកម្លាំងទ័ពអាមេរិក។
ប្រធានដឹកនាំគណៈកម្មការស៊ើការណ៍សម្ងាត់ របស់ព្រឹទ្ធសភាអាមេរិក កាលពីថ្ងៃព្រហស្បតិ៍ បានទាមទារឲ្យរដ្ឋាភិបាលចាត់វិធានការឆ្លើយតបនឹងគំរាមកំហែងរបស់ចិន ទៅលើសន្តិសុខជាតិអាមេរិក។ សម្រាប់សមាជិកព្រឹទ្ធសភាអាមេរិក វត្តមានមូលដ្ឋានទ័ពរបស់ចិន នៅគុយបា ដែលស្ថិតនៅចម្ងាយតែ ១៦០គីឡូម៉ែត្រ ពីរដ្ឋFlorida គឺជារឿងដែលមិនអាចទទួលយកបាន ព្រោះវា ជាគំរាមកំហែងដោយផ្ទាល់ទឹកដីអាមេរិក។
នៅក្នុងសម័យសង្រ្គាមត្រជាក់ សហភាពសូវៀត បានបង្កើតទីតាំងលួចស្តាប់យកការណ៍ នៅគុយបា។ អាមេរិក និងសហភាពសូវៀតវិះតែនឹងផ្ទុះសង្រ្គាមនុយក្លេអ៊ែរនឹងគ្នា នៅក្រោយ អាមេរិកដំឡើងសំឡេងប្រឆាំងវត្តមានមីស៊ីលរបស់សហភាពសូវៀតនៅគុយបា ដែលបែរសំដៅទឹកដីអាមេរិក។ នៅទីបំផុត សហភាពសូវៀតបានបញ្ឈប់គំរោងរបស់ខ្លួនវិញ ចំណែកអាមេរិកសុខចិត្តដកមីស៊ីលពីទឹកដីតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ