រកឃើញបំណែកនាវាមុជទឹកទេសចរណ៍ ទីតាន អ្នកដំណើរស្លាប់ទាំងអស់
កងឆ្មាំសមុទ្ទអាមេរិក បានប្រកាសនៅថ្ងៃព្រហស្បតិ៍ រកឃើញបំណែកនាវាមុជទឹកទេសចរណ៍ ទីតាន នៅមិនឆ្ងាយប៉ុន្មានពីខ្មោចនាវាទីតានិក។ បាត់ខ្លួនតាំងពីថ្ងៃអាទិត្យទី ១៨មិថុនា ទីតាន ទំនងជាត្រូវបែកដោយមិនអាចធន់នឹងសម្ពាធទឹកបាន ហើយអ្នកដំណើរទាំង៥នាក់ ក៏ត្រូវស្លាប់ភ្លាមក្នុងពេលនោះដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
នៅក្នុងសន្និសីទកាសែត ឧត្តមនាវីទោអាមេរិក ចន ម៉ូហ្គឺរ John Mauger ដែលជាអ្នកដឹកនាំប្រតិបត្តិការរុករកសង្គ្រោះ បានបញ្ជាក់អំពីការរកឃើញបំណែកនាវាមុជទឹកទេសចរណ៍ទីតាន ចំនួន ៥ដុំធំៗ ក្នុងនោះមួយផ្ទាំងជាផ្នែកក្បាល មួយផ្ទាំងជាផ្នែកកន្ទុយរបស់នាវា នៅចម្ងាយប្រមាណ៥០០ម៉ែត្រពីបំណែកខ្មោចនាវាទីតានិក និងក្នុងជម្រៅ ៣៨០០ម៉ែត្រ។ តាមរយៈបំណែកនេះ លោក ឧត្តមនាវីទោអាមេរិក បានបង្ហើបសេចក្តីសន្និដ្ឋានថា នាវា ទីតាន ទំនងបែក ដោយរងសម្ពាធទឹក។ ក្នុងជម្រៅទឹកជិតបួនពាន់ម៉ែត្រ សម្ពាធមានខ្លាំង អ្នកដំណើរទាំង៥នាក់ ទំនងជាត្រូវដាច់ខ្យល់ស្លាប់ភ្លាមតែម្តង។
អ្នកដំណើរទាំង៥នាក់នោះគឺ ម្ចាស់ក្រុមហ៊ុន OceanGate លោក Stockton Rush អ្នកជំនួញអង់គ្លេស Hamish Harding (៥៨ឆ្នាំ) អតីតអ្នកមុជទឹកនិងយោធាជើងទឹកបារាំង Paul Henri Nargeolet ព្រមទាំងមហាសេដ្ឋីប៉ាគីស្ថាន Shahzada Daxood និងកូនប្រុសអាយុ១៩ឆ្នាំ ដែលក៏មានសញ្ជាតិអង់គ្លេសមួយទៀតដែរ។ OceanGate និងកងឆ្មាំសមុទ្ទអាមេរិក បានចូលរួមរំលែកទុក្ខជាមួយគ្រួសារសព ដែលសុទ្ធសឹងជាអ្នកចូលចិត្តផ្សងព្រេងនិងមានជំនក់ចិត្តក្នុងការរុករកនិងអភិរក្សមហាសមុទ្ទ។
គ្រាន់តែមានដំណឹងរកឃើញបំណែកទីតានភ្លាម កាសែតអាមេរិក Wall Street Journal និង CNN បានផ្សព្វផ្សាយថា យោធាអាមេរិកចាប់បានសញ្ញាដែលសង្ស័យថាទីតាន ផ្ទុះបែក តាំងពីថ្ងៃអាទិត្យ ប៉ុន្មានម៉ោងក្រោយការបាត់ដាននាវាមុជទឹកបន្តិចប៉ុណ្ណោះ។ តែCNNថា ខាងទាហានអាមេរិកបដិសេធ ដោយបញ្ជាក់ថាស្នូរនោះបានជួយកំណត់តំបន់ត្រូវស្វែងរក។
គ្រោះបែក នាវាមុជទឹកទេសចរណ៍ ទីតាន ក្រោយពីមុជចូលក្នុងទឹកបាន១ម៉ោងនិង៤៥នាទី កំពុងបំផុសចំណោទជាច្រើនជុំវិញបញ្ហាសុវត្ថិភាពដែលអាចបណ្តាលមកពីការធ្វេសប្រហែសផ្នែកបច្ចេកទេស។ មានព័ត៌មានជាច្រើនដាក់បន្ទុកលើក្រុមហ៊ុនOceanGate។ បើតាមអតីតប្រធានក្រុមហ៊ុនដែលត្រូវគេបណ្តាញចេញ កាលពីឆ្នាំ២០១៨ ព្រោះបញ្ចេញភាពសង្ស័យខ្លាំងលើសុវត្ថិភាពរបស់នាវា បង្អួចមុខរបស់ទីតាន អាចធន់នឹងសម្ពាធទឹកជម្រៅ១៣០០ម៉ែត្រ មិនមែនសម្រាប់ចុះក្នុងជម្រៅ៤០០០ម៉ែត្រឡើយ។ ក្រៅអំពីចំណុចខ្សោយនេះ នាវាក៏អាចផ្ទុះបែកដោយរងសម្ពាធទឹកដែរ បើមានស្នាមប្រេះ ឬស្នាមនៃភាពចាស់សឹក ណាមួយ ដ៏តូចឆ្មារក៏ដោយចុះ នៅលើតួ ឬ នៅបង្អួច។ ការស្រាវជ្រាវនឹងអាចបំភ្លឹបានថ្ងៃក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ