អាមេរិក៖គ្មានភស្តុតាងដែលបញ្ជាក់ថា មេរោគកូវីដ១៩ ត្រូវបានបង្កើតនៅក្នុងមន្ទីរពិសោធន៍ចិនទេ
នៅអាមេរិក ក្រសួងស៊ើបការណ៍សម្ងាត់បានចេញមុខធានានៅក្នុងរបាយការណ៍មួយចេញផ្សាយក្នុងថ្ងៃសុក្រ ទី២៣ មិថុនាថា គ្មានភស្តុតាងដែលបញ្ជាក់ពីការបង្កើតមេរោគកូវីដ១៩ នៅក្នុងមន្ទីរពិសោធន៍ចិនទេ។ របាយការណ៍នេះបានធ្លាក់មក ៣ខែក្រោយពីក្រុមសមាជិកសភាអាមេរិកបានសុំឲ្យក្រសួងស៊ើបការណ៍សម្ងាត់បំភ្លឺបន្ថែមជុំវិញប្រភពដើមមេរោគកូវីដ១៩។ គួររម្លឹកថា មេរោគកូវីដ១៩ បានលេចរូបរាងនៅចិននាដំណាច់ឆ្នាំ ២០១៩។ តែមកដល់សព្វថ្ងៃ គេនៅមិនទាន់ដឹងពីប្រភពដើមរបស់មេរោគឆ្លងសកលនេះនៅឡើយទេ។
ចុះផ្សាយនៅថ្ងៃ៖
ស្តាប់ - ០២:០៣
នៅក្នុងរបាយការណ៍ដែលបានផ្សព្វផ្សាយជាសាធារណៈ ក្រសួងស៊ើបការណ៍សម្ងាត់អាមេរិកបានបញ្ជាក់ច្បាស់ៗថា គេគ្មានភស្តុងតាងអ្វីដើម្បីអះអាងលើព័ត៌មានលេច ឮថ្មីៗដែលថា ក្រុមអ្នកវិទ្យាសាស្រ្តចំនួន ៣នាក់នៅមន្ទីរពិសោធន៍ចិនវូហានប្រហែលស្ថិតក្នុងចំណោមអ្នកដែលបានឆ្លងមេរោគកូវីដ១៩ មុនគេ និងប្រហែលជាអ្នកដែលបានបង្កើតមេរោគកូវីដ១៩ ដោយខ្លួនឯង។ តាមរបាយការណ៍ដដែល អាមេរិកក៏គ្មានព័ត៌មានណាមួយដែលបង្ហាញពីការធ្វើពិសោធន៍លើមេរោគកូវីដ១៩ របស់អ្នកវិទ្យាសាស្រ្តទាំង ៣នាក់ដែរ។
របាយការណ៍របស់ក្រសួងស៊ើបការណ៍សម្ងាត់អាមេរិកបានធ្លាក់មក ៣ខែបន្ទាប់ពីក្រុមសមាជិកសភាបានស្នើឲ្យក្រសួងស៊ើបការណ៍សម្ងាត់ផ្តល់ព័ត៌មានបន្ថែមដែលមានក្នុងដៃជុំវិញអត្តសញ្ញាណ និងប្រភពដើមរបស់កូវីដ១៩។ គួរបញ្ជាក់ថា តាំងពីកូវីដ១៩ បានលេចរូបរាងដំបូងនាដំណាច់ឆ្នាំ ២០១៩នៅចិនមក គេនៅមិនទាន់មានព័ត៌មានផ្លូវការណាមួយដែលបញ្ជាក់ពីការចាប់កំណើតរបស់មេរោគឆ្លងសកលមួយនេះនៅឡើយទេ។ មានសម្មតិកម្មចំនួនពីរដែលក្រសួងស៊ើបការណ៍សម្ងាត់អាមេរិកខុសៗគ្នាបានបន្តលើកឡើងមកដល់សព្វថ្ងៃ ទី១ ជាមេរោគកើតចេញពីធម្មជាតិ ដូចជាតាមពពួកសត្វព្រៃ និងសម្មតិកម្មទី២ ជាមេរោគធ្លាយចេញពីមន្ទីរពិសោធន៍ចិនវូហាន។
កន្លងមក សម្មតិកម្មទី២ ដែលថាជាមេរោគធ្លាយចេញពីមន្ទីរពិសោធន៍ចិនវូហានបានធ្វើឲ្យចិនខឹងសម្បារមិនតិចទេ។ អ្វីដែលច្បាស់មកដល់បច្ចុប្បន្ន សម្មតិកម្មដែលបានលើកឡើងនៅបន្តជាសម្មតិកម្ម នោះបើទោះបីជាកូវីដ១៩ បានសម្លាប់មនុស្សច្រើនលាននាក់នៅលើលោក និងហាក់បានស្ងប់ស្ងាត់ច្រើនក៏ដោយនៅពេលនេះ។ អ្វីដែលច្បាស់នាចំណែកសហគមន៍អ្នកវិទ្យាសាស្រ្តភាគច្រើនបានបន្តផ្តោតលើសម្មតិកម្មដែលថា កូវីដ១៩ បានឆ្លងចេញពីសត្វព្រៃទៅលើមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ