បេក្ខជនប្រធានាធិបតីអេក្វាទ័រត្រូវគេធ្វើឃាតនៅក្នុងពេលធ្វើការឃោសនាបោះឆ្នោត
នៅអេក្វាទ័រ លោកប្រធានាធិបតីហ្គីយ៉ែម៉ូ ឡាសូប្រកាសដាក់ប្រទេសក្នុងភាពអាសន្ន ចំនួន៦០ថ្ងៃ នៅបន្ទាប់ពីបេក្ខជនប្រធានាធិបតីមួយរូបត្រូវខ្មាន់កាំភ្លើងបាញ់សម្លាប់នៅក្នុងពេលធ្វើយុទ្ធនាការឃោសនាបោះឆ្នោត កាលពីថ្ងៃពុធ ទី ៩សីហា។ ប្រធានាធិបតីអេក្វាទ័រប្រកាសកាន់ទុក្ខជាតិ៣ថ្ងៃសម្រាប់ជនរួមជាតិ លោកហ្វែរណង់ដូ វីឡាវីសិនស្យូ វ៉ាឡង់ស្យា ដែលត្រូវគេធ្វើឃាតកាលពីថ្ងៃពុធ ប៉ុន្តែ ប្រធានាធិបតីប្រកាសមិនផ្លាស់ប្តូរថ្ងៃបោះឆ្នោតជាតិដែលត្រូវប្រព្រឹត្តទៅនៅថ្ងៃទី ២០សីហាខាងមុខ។
ចុះផ្សាយនៅថ្ងៃ៖
ស្តាប់ - ០៣:១៧
ហេតុការណ៍បាញ់សម្លាប់បេក្ខជនប្រធានាធិបតីអេក្វាទ័រកើតឡើងនៅល្ងាចថ្ងៃពុធ នៅពេលដែល លោកហ្វែរណង់ដូ វីឡាវីសិនស្យូ បេក្ខជនមួយរូបក្នុងចំណោមបេក្ខជនប្រធានាធិបតី៨រូបរបស់អេក្វាទ័រកំពុងធ្វើយុទ្ធនាការឃោសនាបោះឆ្នោតនៅរដ្ឋធានីQuito។
វីដេអូដែលគេបង្ហោះនៅលើបណ្តាញសង្គមកាលពីថ្ងៃពុធបានបង្ហាញលោកហ្វែរណង់ដូ វីឡាវីសិនស្យូ ចាកចេញពីកន្លែងឃោសនា នៅក្រោមការយាមការពាររបស់សន្តិសុខ។ នៅពេល
លោកហ្វែរណង់ដូ វីឡាវីសិនស្យូចូលក្នុងរថយន្តពណ៌ស ភ្លាម គេលឺសំឡេងគ្រាប់កាំភ្លើងបាញ់ជាប់គ្នាជាច្រើនគ្រាប់។
តាមរដ្ឋអាជ្ញាអេក្វាទ័រ បេក្ខជនប្រធានាធិបតី លោកហ្វែរណង់ដូ វីឡាវីសិនស្យូត្រូវគ្រាប់កាំភ្លើង និងស្លាប់នៅកន្លែងកើតហេតុ ចំណែកមនុស្ស៩នាក់ផ្សេងទៀតរងរបួស ដែលក្នុងនោះ ១នាក់ជាបេក្ខជនតំណាងរាស្រ្ត និង២នាក់ជាប៉ូលិស។ តាមរដ្ឋអាជ្ញាដដែល ជនសង្ស័យជាខ្មាន់កាំភ្លើងម្នាក់ដែលរងរបួសនៅក្នុងការបាញ់តទល់ជាមួយកងរក្សាសន្តិសុខ ស្លាប់នៅក្នុងរថយន្តដឹកទៅមន្ទីរពេទ្យ។ ចំណែក មនុស្ស៦នាក់ដែលសង្ស័យជាប់ពាក់ព័ន្ធនឹងការបាញ់ប្រហារកាលពីថ្ងៃពុធ ត្រូវបានប៉ូលិសចាប់ឃាត់ខ្លួន នៅជាយក្រុងQuito។
នៅក្នុងសារវីដេអូផ្សាយតាមបណ្តាញយូធូប ប្រធានាធិបតីផុតអាណត្តិរបស់អេក្វាទ័រ លោកហ្គីយ៉ែម៉ូ ឡាសូ ថ្កោលទោស និងចាត់ទុកឃាតកម្មទៅលើបេក្ខជនប្រធាធិបតីលោកហ្វែរណង់ដូ វីឡាវីសិនស្យូ ថាជាឧក្រិដ្ឋកម្មនយោបាយ ប្រព្រឹត្តដោយភេរវជនដែលមានគោលដៅបំផ្លាញដំណើរការបោះឆ្នោតប្រធានាធិបតីនៅអេក្វាទ័រ។
នៅថ្ងៃពុធ លោកប្រធានាធិបតីប្រកាសរក្សាថ្ងៃបោះឆ្នោតដែលត្រូវរៀបចំនៅ១០ថ្ងៃខាងមុខ ថ្ងៃទី២០សីហា និងប្រកាសដាក់ប្រទេសក្នុងស្ថានភាពអាសន្នចំនួន៦០ថ្ងៃ ដើម្បីអនុញ្ញាតឲ្យ កងកម្លាំងរក្សាសន្តិសុខអាចធានាសុវត្ថិភាព ការពារសន្តិសុខដល់ពលរដ្ឋ នៅក្នុងអំឡុងពេលបោះឆ្នោត។
នៅប៉ុន្មានឆ្នាំមកនេះ អេក្វាទ័រជួបរលកអំពើហិង្សាដែលមានជាប់ពាក់ព័ន្ធនឹងក្រុមជួញដូរគ្រឿងញៀន។ នៅចុងខែកក្កដា ប្រធានាធិបតីប្រកាសស្ថានភាពអាសន្នក្នុងខេត្តជាប់សមុទ្រពីរ បន្ទាប់ពីមានការសម្លាប់រង្គាលនៅក្នុងពន្ធនាគារដោយសារជម្លោះរវាងពួកអ្នកទោស ហើយនិងឃាតកម្មលើចៅហ្វាយក្រុង Duran។
នៅមួយសប្តាហ៍មុនត្រូវគេធ្វើឃាត បេក្ខជនប្រធានាធិបតី លោកហ្វែរណង់ដូ វីឡាវីសិនស្យូបានជូនដំណឹងទៅប៉ូលិសថា លោកនិងក្រុមការងារបានទទួលសំបុត្រគំរាមកំហែងជីវិត២ដង ពីមេក្រុមឧក្រិដ្ឋដែលជាប់ពាក់ព័ន្ធនឹងការជួញដូរគ្រឿងញៀន ហើយដែលកំពុងជាប់ក្នុងពន្ធនាគារ។
លោកហ្វែរណង់ដូ វីឡាវីសិនស្យូ ធ្លាប់ជាអ្នកកាសែតដ៏ល្បីឈ្មោះដែលបានសរសេរអត្ថបទស៊ើបអង្កេតជាច្រើន ដើម្បីបរិហាការប្រព្រឹត្តអំពើពុករលួយរបស់អតីតប្រធានាធិបតីអេក្វាទ័រ លោករ៉ាហ្វាអែល កូរេអា ដែលកំពុងរត់គេចខ្លួននៅប៊ែលហ្សិក នៅក្រោយការសម្រេចផ្តន្ទាទោសរបស់តុលាការ។ ជាសមាជិកសភាមកពីគណបក្សកណ្តាលនិយម ដែលប្តេជា្ញលុបបំបាត់អំពើពុករលួយដែលអាចមានជាប់ពាក់ព័ន្ធនឹងក្រុមហ៊ុនប្រេងនៅអេក្វាទ័រ លោកហ្វែរណង់ដូ វីឡាវីសិនស្យូ ជាបេក្ខជនលេចធ្លោទី២ នៅក្នុងការបោះឆ្នោតប្រធានាធិបតី។ នៅថ្ងៃអង្គារ ពោលមួយថ្ងៃមុនត្រូវគេសម្លាប់ធ្វើឃាត លោកហ្វែរណង់ដូ វីឡាវីសិនស្យូ បានដាក់របាយការណ៍ទាក់ទងនឹងក្រុមហ៊ុនប្រេងមួយ ទៅរដ្ឋអាជ្ញាអេក្វាទ័រ។ ប៉ុន្តែ របាយការណ៍របស់លោកមិនត្រូវបានគេផ្សព្វផ្សាយជាសាធារណៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ