លោកដូណាល់ ត្រាំ និងមនុស្សជំនិត១៨នាក់រងការចោទប្រកាន់ពីតុលាការពីបទចង់ផ្លាស់ប្តូរលទ្ធផលឆ្នោត
លោកដូណាល់ ត្រាំរងការចោទប្រកាន់ពីតុលាការជាលើកទី៤ ក្នុងរយៈពេលតែ៦ខែអតីតប្រធានាធិបតីអាមេរិក លោកដូណាល់ត្រាំ និងទីប្រឹក្សា មនុស្សជំនិតរបស់លោកដូណាល់ត្រាំចំនួន១៨នាក់ត្រូវរដ្ឋអាជ្ញាក្នុងរដ្ឋចរចាចោទប្រកាន់ជាផ្លូវការកាលពីថ្ងៃចន្ទ ក្នុងបទប៉ុនប៉ងផ្លាស់ប្តូរលទ្ធផលបោះឆ្នោតប្រធានាធិបតីអាមេរិកនៅក្នុងរដ្ឋគន្លឹះមួយនេះ កាលពីឆ្នាំ ២០២០។ នេះជាលើកទី៤ ក្នុងរយៈពេល៦ខែ ដែលអតីតប្រធានាធិបតីអាមេរិករងការចោទប្រកាន់ជាផ្លូវការនៅតុលាការក្នុងសំណុំរឿងទាក់ទងនឹងការបោះឆ្នោតប្រធានាធិបតីឆ្នាំ ២០២០ ដែល លោកដូណាល់ ត្រាំទទួលបរាជ័យឆ្នោត នៅចំពោះមុខគូប្រជែង លោកចូ បៃដិន។
ចុះផ្សាយនៅថ្ងៃ៖
ស្តាប់ - ០៣:០២
នៅក្នុងសន្និសីទកាសែតកាលពីថ្ងៃចន្ទ រដ្ឋអាជ្ញាក្នុងរដ្ឋចរចា លោកស្រី Fani Willisបានប្រកាសចោទប្រកាន់ជាផ្លូវការលោកដូណាល់ ត្រាំ និងមនុស្សជំនិតរបស់លោកចំនួន១៨នាក់ផ្សេងទៀតពីបទប៉ុនប៉ងកែប្រែលទ្ធផលបោះឆ្នោតប្រធានាធិបតីឆ្នាំ ២០២០។
លោកដូណាល់ ត្រាំ និងមនុស្សជំនិតរបស់លោកចំនួន១៨នាក់ ត្រូវរងបទចោទប្រកាន់ចំនួន៤១ ដែលមានដូចជា ផ្សព្វផ្សាយព័ត៌មានមិនពិត ការបន្លំឯកសារ ការដណ្តើមអំណាចមន្រ្តីសាធារណៈ និងការដាក់សម្ពាធលើសាក្សីជាដើម។ ការស៊ើបអង្កេតប្រឆាំងលោកដូណាល់ត្រាំ នៅរដ្ឋចរចាចាប់ផ្តើមឡើង បន្ទាប់ពីមានកិច្ចសន្ទនាតាមទូរស័ព្ទនៅខែមករាឆ្នាំ ២០២១ ដែលនៅក្នុងនោះ លោកដូណាល់ ត្រាំបានបញ្ជាឲ្យអ្នកទទួលខុសត្រូវក្នុងរដ្ឋរចរចារកសន្លឹកឆ្នោតជាង១ម៉ឺន២ពាន់ដែលគ្រប់គ្រាន់សម្រាប់ឲ្យលោកទទួលជ័យជំនះនៅរដ្ឋចរចា។
តាមរដ្ឋអាជ្ញាក្នុងរដ្ឋចរចា បទចោទប្រកាន់បង្ហាញថា ជាជាងគោរពនីតិវិធីតុលាការរបស់រដ្ឋចរចាទាក់ទងនឹងជម្លោះប្តឹងផ្តល់ក្នុងពេលបោះឆ្នោត ជនសង្ស័យបានរួមផ្សំគំនិតគ្នាជាក្រុមប្រព្រឹត្តបទឧក្រិដ្ឋក្នុងគោលដៅកែប្រែលទ្ធផលឆ្នោតនៅរដ្ឋចរចាដែលជារដ្ឋគន្លឹះនៅក្នុងការបោះឆ្នោតប្រធានាធិបតីអាមេរិក។
រងការចោទប្រកាន់នៅក្រោមច្បាប់ដែលអាជ្ញាធររដ្ឋចរចាតែងប្រើសម្រាប់ប្រឆាំងក្រុមជនពាលដែលប្រព្រឹត្តបទឧក្រិដ្ឋជាក្រុម លោកដូណាល់ ត្រាំ និងបក្សពួកអាចប្រឈមនឹងការផ្តន្ទាទោសជាប់ពន្ធនាគារពី ៥ ទៅ២០ឆ្នាំ។ តាមរដ្ឋអាជ្ញា លោកដូណាល់ ត្រាំមានរយៈពេលដល់ថ្ងៃទី២៥សីហា ដើម្បីបង្ហាញខ្លួននៅមុខតុលាការក្នុងរដ្ឋចរចា។
នៅក្នុងសារតាមបណ្តាញសង្គមរបស់លោក Truth Social លោកដូណាល់ ត្រាំ បានប្រតិកម្មចាត់ទុកការចោទប្រកាន់របស់រដ្ឋអាជ្ញានៅរដ្ឋចរចាថា ជាការប្រមាញ់ចាប់មេធ្មប់ ពីព្រោះថា វាធ្វើឡើងនៅក្នុងពេលដែលលោកកំពុងធ្វើការឃោសនា សម្រាប់ការបោះឆ្នោតប្រធានាធិបតីឆ្នាំ ២០២៤។
ការចោទប្រកាន់របស់រដ្ឋអាជ្ញាក្នុងរដ្ឋចរចា ជាការចោទប្រកាន់បទល្មើសព្រហ្មទណ្ឌទី៤ ប្រឆាំងអតីតប្រធានាធិបតីអាមេរិក លោកដូណាល់ ត្រាំ នៅក្នុងរយៈពេលតែ៦ខែ។ កំពុងលេចធ្លោ នាំមុខគេនៅក្នុងការស្ទង់មតិស្តីពីបេក្ខជនប្រធានាធិបតីរបស់គណបក្សសាធារណរដ្ឋ លោកដូណាល់ត្រាំទើបត្រូវរដ្ឋអាជ្ញារដ្ឋសហព័ន្ធចោទប្រកាន់ពីបទល្មើសព្រហ្មទណ្ឌទាក់ទងនឹងអំពើហិង្សា ការសម្រុកចូលវិមានកាពីតូលដើម្បីរំខានមិនឲ្យសភាបោះឆ្នោតទទួលស្គាល់ជ័យជំនះរបស់លោកចូ បៃដិនជាប្រធានាធិបតី។ លោកដូណាល់ ត្រាំនឹងត្រូវតុលាការអាមេរិកបើកការជំនុំជម្រះផងដែរ នៅខែមីនា និងខែឧសភាឆ្នាំ ២០២៤ ក្នុងសំណុំរឿងសូកលុយបិទមាត់តារាភាពយន្តអាសអាភៀស និងការធ្វេសប្រហែសរបស់លោកក្នុងការគ្រប់គ្រងឯកសារសម្ងាត់ជាតិ ដែលលោកបានដឹកនាំយកទៅទុកដាក់នៅក្នុងគេហដ្ឋានឯកជន ក្នុងរដ្ឋFlorida៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ