ហេតុអ្វី អេក្វាទ័រធ្លាក់លង់ខ្លួនក្នុងអំពើហិង្សាប្រដាប់អាវុធ និងឧក្រិដ្ឋកម្មជួញដូរគ្រឿងញៀន?
ប្រជាជនអេក្វាទ័រប្រមាណ១៣លាននាក់បានចេញទៅបោះឆ្នោតជ្រើសរើសប្រធានាធិបតីនៅថ្ងៃអាទិត្យទី២០សីហា។ នៅអេក្វាទ័រដែលរងរញ្ជួយដោយអំពើហិង្សាប្រដាប់អាវុធ និងឧក្រិដ្ឋកម្មជួញដូរគ្រឿង ការបោះឆ្នោតប្រធានាធិបតីមុនកាលកំណត់ត្រូវបានរៀបចំឡើងនៅក្រោមបរិយាកាសតានតឹង និងការយាមការពារសន្តិសុខយ៉ាងតឹងរ៉ឹង នៅបន្ទាប់ពីបេក្ខជនប្រធានាធិបតីលេចធ្លោមួយរូបត្រូវខ្មាន់កាំភ្លើងបាញ់សម្លាប់នៅក្នុងថ្ងៃឃោសនាបោះឆ្នោតកាលពីថ្ងៃទី ៩ខែសីហា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៧
នៅអេក្វាទ័រ ការបោះឆ្នោតជ្រើសរើសប្រធានាធិបតីត្រូវបានរៀបចំឡើងនៅក្នុងពេលដែលប្រទេសកំពុងស្ថិតក្នុងស្ថានភាពប្រកាសអាសន្ន នៅបន្ទាប់ពីបេក្ខជនប្រធានាធិបតីដ៏មានប្រជាប្រិយម្នាក់គឺលោក វីឡាវីសង់ស្យូ ត្រូវខ្មាន់កាំភ្លើងបាញ់សម្លាប់នៅក្នុងពេលឃោសនា។ នៅថ្ងៃអាទិត្យប៉ូលិស ទាហានជាច្រើនម៉ឺននាក់ត្រូវបានពង្រាយនៅគ្រប់កន្លែងក្នុងប្រទេស ដើម្បីការពារសន្តិសុខនៅការិយាល័យបោះឆ្នោត និងសុខសុវត្ថិភាពរបស់បេក្ខជនអ្នកនយោបាយនៅថ្ងៃបោះឆ្នោត។
អេក្វាទ័ររៀបចំការបោះឆ្នោតប្រធានាធិបតីមុនកាលកំណត់នៅក្នុងកាលៈទេសៈមួយ ដែលប្រទេសកំពុងជួបរលកអំពើហិង្សាប្រដាប់អាវុធដ៏ធ្ងន់ធ្ងរដែលមានជាប់ទាក់ទងនឹងការជួញដូរគ្រឿងញៀន មិនធ្លាប់មាននៅក្នុងប្រវត្តិរបស់ខ្លួន។ ធ្លាប់ជាប្រទេសស្ងប់សុខសន្តិភាព និងល្បីឈ្មោះខាងការនាំចេញផ្លែចេក បង្គារ និងកោះធម្មជាតិស្អាតៗ អេក្វាទ័រនៅប៉ុន្មានឆ្នាំមកនេះបានក្លាយជាគោលដៅរបស់ក្រុមជួញដូរគ្រឿងញៀនដែលឆ្លងចេញមកពីប្រទេសជិតខាង កូឡុំប៊ី និងប៉េរូ ដែលជាជង្រុកផលិតគ្រឿងញៀនកូកាអ៊ីន។ ការជួញដូរគ្រឿងដែលស្ថិតក្រោមការចាត់ចែងគ្រប់គ្រងរបស់ពួកមេឈ្មួញគ្រឿងញៀននៅម៉ិចស៊ិក បានរីកមុខកាន់តែធំ រហូតដល់ថ្នាក់អាចគំរាមកំហែងស្ថិរភាពស្ថាប័នអេក្វាទ័រ និងធ្វើឲ្យអេក្វាទ័រធ្លាក់ក្នុងសភាពដូចកូឡុំប៊ីកាលពីឆ្នាំ ១៩៩០ដែលញាំញីដោយអំពើហិង្សាឃាតកម្មសម្លាប់គ្នារវាងពួកឈ្មួញជួញដូរគ្រឿងញៀន។
នៅឆ្នាំ ២០២២ អេក្វាទ័ររាប់ឃើញមានអត្រា ឧក្រិដ្ឋកម្មសម្លាប់មនុស្ស ២៦នាក់ ក្នុងចំណោមមនុស្ស១សែននាក់ ដែលជាអត្រាខ្ពស់ជាងម៉ិកស៊ិក ប្រេស៊ីល និងកូឡុំប៊ី។ នៅក្នុងរដ្ឋធានី Quito អត្រាឃាតកម្មសម្លាប់មនុស្សបានកើនឡើងទ្វេដង។ គិតចាប់តាំងពីឆ្នាំ ២០២១ អ្នកទោសជាង៤០០នាក់បានកាប់សម្លាប់គ្នានៅក្នុងពន្ធនាគារ នៅក្នុងជម្លោះសម្លាប់រង្គាលរវាងក្រុមជនពាលដែលមានជាប់ទាក់ទងនឹងការជួញដូរគ្រឿងញៀន។
សម្រាប់អ្នកជំនាញ ប្រជាជនអេក្វាទ័រប្រមាណ១៣លាននាក់ចេញទៅបោះឆ្នោតនៅថ្ងៃអាទិត្យ ជាមួយអារម្មណ៍៣ គឺ បារម្ភខ្លាចពីបញ្ហាអសន្តិសុខ ទុទិដ្ឋនិយមពីរឿងសេដ្ឋកិច្ច និងការអស់ជំនឿលើអ្នកនយោបាយ។ នៅមុនត្រូវឃាតករបាញ់សម្លាប់ កាលពីថ្ងៃទី ៩សីហា លោក វីឡាវីសង់ស្យូ ជាបេក្ខជនប្រធានាធិបតីលេចធ្លោទីពីរ បន្ទាប់ពីលោកស្រី ល្វីសា ហ្កុងហ្សាឡេ Luisa Gonzalez មេធាវីនិងជាមនុស្សជំនិតរបស់លោក រ៉ាហ្វាអែល កូរ៉េអា អតីតប្រធានាធិបតីដែលរត់ទៅបរទេសដើម្បីគេចចេញពីសំណាញ់ទោសរបស់តុលាការអេក្វាទ័រ។ លោកស្រីហ្កុងហ្សាឡេផ្ទាល់ធ្លាប់និយាយថា បើសិនលោកស្រីឈ្នះឆ្នោត នោះលោកស្រីនឹងយកអតីតប្រធានាធិបតី រ៉ាហ្វាអែល កូរ៉េអាដែលត្រូវតុលាការកាត់ទោសឲ្យជាប់ពន្ធនាគារ៨ឆ្នាំពីបទប្រព្រឹត្តអំពើពុករលួយឲ្យធ្វើជាទីប្រឹក្សារបស់លោកស្រី។
អ្នកជំនាញវាយតម្លៃថា ឃាតកម្មសម្លាប់បេក្ខជនប្រធានាធិបតី គឺលោកវីឡាវីសង់ស្យូ បានធ្វើឲ្យទិដ្ឋភាពបោះឆ្នោតនៅអេក្វាទ័រផ្លាស់ប្តូរទាំងស្រុង។ ដោយសារកើតមានរលកស្អប់លោកអតីតប្រធានាធិបតីកូរ៉េអា លោកស្រីហ្កុងហ្សាឡេដែលធ្លាប់ជាទីប្រឹក្សារបស់លោកកូរ៉េអាលែងទទួលសំឡេងគាំទ្រនាំមុខគេ ប៉ុន្តែ បេក្ខជនដែលជាអ្នកជំនួញ ដែលសន្យាលុបបំបាត់អំពើហិង្សា ឧក្រិដ្ឋកម្ម តាមរយៈការបង្កើនសាងសង់ពន្ធនាគារ បែរជាចាប់លេចមុខត្រដែតទៅវិញ។ ដោយសារបេក្ខជនអាចទទួលសំឡេងប្រហាក់ប្រហែលគ្នា អេក្វាទ័រនឹងអាចរៀបចំការបោះឆ្នោតជុំទី២ នៅខែតុលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ