អាមេរិកសន្យាជួយកម្លាំងទ័ពបរទេសដែលចេញទៅបង្រ្កាបក្រុមជនពាលនៅប្រទេសហៃទី
នៅក្រោយកិច្ចប្រជុំថ្នាក់រដ្ឋមន្រ្តីសម្រាប់បញ្ហាហៃទីដែលរៀបចំឡើងដោយក្រសួងការបរទេសអាមេរិក នៅក្រៅក្របខ័ណ្ឌមហាសន្និបាតអង្គការសហប្រជាជាតិកាលពីថ្ងៃសុក្រ ប្រទេសជាង១០បានស្ម័គ្រចិត្តចូលរួមក្នុងបេសកកម្មស្តារសន្តិសុខនៅ ប្រទេសហៃទី។ តាមអនុរដ្ឋមន្រ្តីការបរទេសអាមេរិក លោកស្រីVictoria Nuland ប្រទេសពី១០ ទៅ១២ប្រទេសសន្យាចូលរួមក្នុងបេសកកម្មជួយហៃទីដែលដឹកនាំប្រទេសកេនយ៉ា។
ចុះផ្សាយនៅថ្ងៃ៖ កែប្រែថ្ងៃទី៖
បន្ទាប់ពីទាមទារស្នើសុំជិត១ឆ្នាំរបស់អាជ្ញាធរហៃទី កងកម្លាំងបរទេសដើម្បីជួយស្តារសន្តិសុខហៃទីចាប់ផ្តើមលេចរូបរាងបណ្តើរៗ។ នៅក្រោយកិច្ចប្រជុំថ្នាក់រដ្ឋមន្រ្តីប្រទេសពាក់ព័ន្ធដែលរៀបចំឡើងដោយក្រសួងការបរទេសអាមេរិកនៅទីក្រុងញូវយក៉ក្រៅក្របខ័ណ្ឌមហាសន្និបាតអង្គការសហប្រជាជាតិ កាលពីថ្ងៃសុក្រ អាមេរិកបានប្រកាសថា មានប្រទេសជាង១០ស្ម័គ្រចិត្តចូលរួមក្នុងបេសកកម្មជួយហៃទី។
នៅចំពោះមុខនៃការកើនឡើងអំពើហិង្សាឧក្រិដ្ឋកម្មរបស់ក្រុមជនពាលនៅហៃទី និងសមត្ថភាពមានកំណត់របស់ប៉ូលិសហៃទី នាយករដ្ឋមន្រ្តីហៃទីនិងអគ្គលេខាធិការអង្គការសហប្រជាជាតិ លោកអង់តូនីញ៉ូ ហ្គុយទែរស៍បានអំពាវនាវស្វែងរកជំនួយពីកងកម្លាំងអន្តរជាតិ ។ ប៉ុន្តែ រហូតមកដល់ពេលនេះ គ្មានប្រទេសណាស្ម័គ្រចិត្តបញ្ជូនកម្លាំងទ័ពរបស់ខ្លួនទៅជួយហៃទី ដោយសារតែបទពិសោធន៍កន្លងមកបង្រៀនឲ្យដឹងថា គេងាយនឹងធ្លាក់ជាប់ក្នុងវិបត្តិហៃទីដែលរួបរឹតដោយបញ្ហាសេដ្ឋកិច្ច ភាពក្រីក្រ បញ្ហាអនាម័យ ហើយនិងជម្លោះផ្ទៃក្នុងរវាងអ្នកនយោបាយហៃទី។
ប៉ុន្តែ នៅខែកក្កដាកន្លងទៅ កេនយ៉ាដែលបានស្ម័គ្រចិត្តដឹកនាំកងកម្លាំងបរទេសនៅហៃទី បានស្នើបញ្ជូនកងកម្លាំងកេនយ៉ាប្រមាណ ១០០០នាក់ ដើម្បីទៅជួយបណ្តុះបណ្តាល និងកៀកស្មាជាមួយប៉ូលិសហៃទីដើម្បីបង្ក្រាបក្រុមជនពាលនៅហៃទី។ ជាអន្តរការីដើម្បីវិបត្តិហៃទីដែលជួបវិបត្តិអសន្តិសុខដ៏ធ្ងន់ធ្ងរបង្កឡើងដោយក្រុមជនពាល រដ្ឋបាលអាមេរិកតាមរយៈរដ្ឋមន្រ្តីការបរទេសអង់តូនី ប្លីងកិនប្រកាសបញ្ជូនជំនួយថ្នាំពេទ្យ កន្លែងស្នាក់នៅ ការដឹកជញ្ជូនតាមផ្លូវអាកាស ប៉ុន្តែ មិនបញ្ជូនមនុស្សផ្ទាល់ទៅហៃទី។
យ៉ាងណាក៏ដោយ កងកម្លាំងអន្តរជាតិដើម្បីជួយប៉ូលិសហៃទីអាចចេញរូបរាងទៅបានលុះត្រាមានការបោះឆ្នោត ផ្តល់ភ្លើងខៀវពីក្រុមប្រឹក្សាសន្តិសុខអង្គការសហប្រជាជាតិ។
នៅមហាសន្និបាតអង្គការសហប្រជាជាតិកាលពីថ្ងៃសុក្រ នាយករដ្ឋមន្រ្តីហៃទី លោក Ariel Henryបានទទូចសុំសាជាថ្មីឲ្យពិភពលោក ជាពិសេសក្រុមប្រឹក្សាសន្តិសុខស្តាប់សំឡេងទួញទុក្ខរបស់ប្រជាជនហៃទីដែលលែងអាចរស់នៅដោយស្ងប់សុខ ដោយសារតែអំពើហិង្សា ការឆក់ប្លន់ប្រដាប់អាវុធ មនុស្សឃាត ការចាប់រំលោភ និងការចាប់ជំរិតរបស់ក្រុមជនពាលដែលកំពុងគ្រប់គ្រងស្ទើរទាំងស្រុង Porte au prince រដ្ឋធានីរបស់ហៃទី។
ធ្លាក់ក្នុងវិបត្តិនយោបាយ ដោយសារឃាតកម្មសម្លាប់ប្រធានាធិបតី ហៃទីដែលជាប្រទេសក្រីក្រជាងគេបំផុតនៅ សមុទ្រការ៉ាអ៊ីប ធ្លាក់ខ្លួនក្នុងអំពើហិង្សាបង្កឡើងដោយក្រុមជនពាល និងខកខានមិនបានរៀបចំការបោះឆ្នោតតាំងពីឆ្នាំ ២០១៦។
តាមអង្គការសហប្រជាជាតិ អំពើឧក្រិដ្ឋរបស់ក្រុមជនពាលបានសម្លាប់មនុស្សជាង២៤០០នាក់គិតចាប់តាំងពីដើមឆ្នាំនេះ ពោលគឺកើនឡើងប្រមាណ ៣០%បើប្រៀបធៀបនឹងឆ្នាំមុន។ អង្គការសហប្រជាជាតិធ្លាប់បញ្ជូនក្រុមរក្សាសន្តិភាពទៅបំពេញបេសកកម្មនៅហៃទី ពីឆ្នាំ ២០០៤ ដល់ឆ្នាំ ២០១៧ មុននឹងត្រូវចាកចេញដោយបង្ខំពីហៃទី ដោយសារជំងឺរាតត្បាតអាសន្នរោគដែលឆ្លងនិងសម្លាប់បុគ្គលិករបស់អង្គការសហប្រជាជាតិជាច្រើននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ