នាយករដ្ឋមន្រ្តីហៃទី ត្រូវរដ្ឋអាជ្ញាកោះហៅ ក្នុងសំណុំរឿងឃាតកម្មសម្លាប់ប្រធានាធិបតី
នៅប្រទេសហៃទី ២ខែក្រោយ ឃាតកម្មដោយអាថ៌កំបាំង សម្លាប់ ប្រធានាធិបតី លោកហ្សូវឺណែល ម៉ូអ៊ីស៍ រដ្ឋអាជ្ញាបានចេញលិខិត នៅថ្ងៃសុក្រ កោះហៅ នាយករដ្ឋមន្រ្តីឲ្យទៅបង្ហាញខ្លួននៅ អាយ្យការ នៅថ្ងៃអង្គារ ទី ១៤ កញ្ញា។ នៅថ្ងៃសៅរ៍ម្សិលមិញ នាយករដ្ឋមន្រ្តីហៃទី លោក អារីយែល អង់រី បានប្រតិកម្ម ព្រមានរាល់ការប៉ុនប៉ងបង្វែរសាច់រឿងស៊ើបអង្កេតរបស់តុលាការ។
ចុះផ្សាយនៅថ្ងៃ៖
ស្តាប់ - ០២:៥៧
នៅក្នុងលិខិត កាលពីថ្ងៃសុក្រ រដ្ឋអាជ្ញាហៃទី លោក Bed Ford Claude បានកោះហៃ លោកនាយករដ្ឋមន្រ្តី អារីយែល អង់រី ឲ្យទៅឆ្លើយបំភ្លឺ នៅថ្ងៃអង្គារ ពោលគឺនៅបន្ទាប់ អាយ្យការមានព័ត៌មានថា លោកនាយករដ្ឋមន្រ្តីអារីយែល អង់រី មាននិយាយទូរស័ព្ទ ជាមួយជនសង្ស័យម្នាក់ដែលតុលាការ កំពុងតាមរក ចាប់ខ្លួន នៅក្នុងឃាតកម្មសម្លាប់ប្រធានាធិបតី ហៃទី លោក ហ្សូវឺណែល ម៉ូអ៊ីស៍ កាលពីថ្ងៃទី ៧ ខែកក្កដាកន្លងទៅ។
តាម រដ្ឋអាជ្ញាហៃទី គេចង់ឲ្យលោកនាយករដ្ឋមន្រ្តី ពន្យល់ពីកិច្ចសន្ទនា តាមទូរស័ព្ទ ដែលលោកបានធ្វើជាមួយ ជនសង្ស័យ ឈ្មោះ Joseph Felix Badio នៅយប់ថ្ងៃទី ៧កក្កដា ពោលគឺនៅប៉ុន្មានម៉ោងក្រោយ ប្រធានាធិបតីលោក ហ្សូវឺណែល ម៉ូអ៊ីស៍ ត្រូវឃាតករបាញ់សម្លាប់។ តាម អាយ្យការហៃទី ជនសង្ស័យ Badio អតីតមន្រ្តីអង្គភាពប្រឆាំងអំពើពុករលួយ ដែលប៉ូលិសកំពុងតាមរកចាប់ខ្លួន ក្នុងសំណុំរឿងឃាតកម្មសម្លាប់ប្រធានាធិបតី បានទូរស័ព្ទ ទៅលោកនាយករដ្ឋមន្រ្តីអង់រី ដល់ទៅ ពីរដង នៅម៉ោង ៤ និង៣នាទី និងនៅម៉ោង ៤ និង២០នាទី។ នៅវេលាទូរស័ព្ទទៀតសោត គេកំណត់ឃើញទីតាំងទូរស័ព្ទរបស់ជនសង្ស័យ Badio នៅក្បែរវិមានប្រធានាធិបតី នៅយប់ថ្ងៃកើតហេតុ។
ប្រតិកម្ម បរិហាររិះគន់ នៅថ្ងៃសៅរ៍ លោកនាយករដ្ឋមន្រ្តីហៃទី អារីយែល អង់រី បានចាត់ទុក ដីការកោះហៅថា ជាវិធីសាស្រ្តបង្វែររឿង ដើម្បីបង្កើតការភ័ន្តច្រលំ និងបន្ទុចបង្អាក់ មិនឲ្យតុលាការធ្វើការដោយរលូន។ សម្រាប់លោក អ្នកដែលមានទោសកំហុសពិតប្រាកដ មេខ្លោង អ្នករៀបចំ និងអ្នកបញ្ជាឲ្យសម្លាប់ប្រធានាធិបតីនឹងត្រូវគេវែកមុខឲ្យឃើញ និងត្រូវចាប់មកផ្តន្ទាទោសនៅតុលាការ។
គួររំលឹកជូនថា លោកហ្សូវឺណែល ម៉ូអ៊ីស៍ ត្រូវឃាតករចូលសម្លាប់ដល់ក្នុងវិមានប្រធានាធិបតី នៅយប់ថ្ងៃទី ៧កក្កដា ក្នុងពេលដែលប៉ូលិស អង្គរក្ស ការពារសន្តិសុខឲ្យលោក គ្មានរងរបួស ស្លាប់ម្នាក់សោះ។ នៅ ៥ថ្ងៃក្រោយឃាតកម្ម សម្លាប់ប្រធានាធិបតី ប៉ូលិសហៃទី បានចាប់ខ្លួនជនជាតិអាមេរិកដើមកំណើតហៃទីម្នាក់ឈ្មោះគ្រីស្យង់ អេម៉ានុយអែល សាណុងដែលជាមេខ្លោងរៀបចំផែនការសម្លាប់លោកម៉ូអ៊ីស៍។ ចំណែក មនុស្ស៤៣នាក់ ផ្សេងទៀត ដែលនៅក្នុងនោះ មាន ១៨នាក់ជាជនជាតិកូឡុំប៊ី ដែលជាទាហាន កងកុម្ម៉ង់ដូរ ស៊ីឈ្នួល ត្រូវបានប៉ូលិសហៃទី ចាប់ឃុំខ្លួន។
ដោយសារ ចៅក្រមស៊ើបអង្កេត ត្រូវបានជ្រើសរើសរួចហើយ សម្រាប់ការស៊ើបអង្កេត លើសំណុំរឿងឃាតកម្មសម្លាប់ប្រធានាធិបតី រដ្ឋអាជ្ញាហៃទី គ្មានអំណាចផ្លូវច្បាប់ ដើម្បី អាចកោះហៃ មន្រ្តីរដ្ឋាភិបាលមកសាកសួរនោះទេ។ ម្យ៉ាង រាល់ការកោះហៃ មន្រ្តីរដ្ឋាភិបាលទៅសាកសួរនៅតុលាការ គឺត្រូវឆ្លងកាត់ការអនុញ្ញាតរបស់ប្រធានាធិបតី។ ប៉ុន្តែ នៅក្រោយ ឃាតកម្មសម្លាប់លោកហ្សូវឺណែល ម៉ូរីស៍ ហៃទី កំពុងជួបវិបត្តិគ្មានប្រធានាធិបតី។
សម្រាប់ រដ្ឋអាជ្ញាហៃទី លោក Bed Ford Claude គេរំពឹងទៅលើការស្ម័គ្រចិត្តចូលខ្លួន របស់លោកនាយករដ្ឋមន្រ្តី អង់រី តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ