អាមេរិក ជឿថា លទ្ធភាពបង្កើតរដ្ឋប៉ាឡេស្ទីន នៅតែមាន
កាលពីយប់ថ្ងៃសុក្រឈានចូលថ្ងៃសៅរ៍ កងទ័ពអ៊ីស្រាអែល បានវាយប្រហារបន្ថែមទៀតលើតំបន់ហ្កាហ្សា និងបានបណ្តាលឲ្យស្លាប់ជីវិតមនុស្ស យ៉ាងតិច ៩០ នាក់។ នេះបើតាមការប្រកាសរបស់ អាជ្ញាធរសុខាភិបាលក្រុមហាម៉ាស។ ជម្លោះហាម៉ាសប៉ាឡេស្ទីននិងអ៊ីស្រាអែល នេះ គឺត្រូវថ្នាក់ដឹកនាំអាមេរិក លើកឡើងជាថ្មី អំពីដំណោះស្រាយបង្កើតរដ្ឋពីរ។ ចំណែក ប្រមុខការទូតសហភាពអឺរ៉ុប បង្ហាញជំហរគាំទ្រការបង្កើតរដ្ឋពីរ តែបានរិះគន់ អ៊ីស្រាអែល មិនសំចៃមាត់។
ចុះផ្សាយនៅថ្ងៃ៖
ស្តាប់ - ០២:២៥
នៅថ្ងៃសុក្រ ទី១៩ មករា លោកប្រធានាធិបតីសហរដ្ឋអាមេរិក ចូ បៃដិន មានប្រសាសន៍ថា រូបលោក នៅតែជឿជាក់អំពីលទ្ធភាពបង្កើតរដ្ឋប៉ាឡេស្ទីននៅពេលខាងមុខ។ នេះគឺជាអ្វីដែល ថ្នាក់ដឹកនាំអាមេរិក បានជម្រាបប្រាប់តាមទូរសព្ទទៅកាន់ នាយករដ្ឋមន្ត្រីអ៊ីស្រាអែល លោក បេនចាមិន នេតាន់យ៉ាហ៊ូ ដែលជាសម្ព័ន្ធមិត្ត។
ទន្ទឹមនេះ អ្នកនាំពាក្យសេតវិមានអាមេរិក លោក ចន ឃឺប៊ី បានបញ្ជាក់បន្ថែមអំពីជំនឿជាក់ចាក់របស់ប្រធានាធិបតីសហរដ្ឋអាមេរិក ក្រោយពីថ្នាក់ដឹកនាំទាំងពីរប្រទេសបានសន្ទនាគ្នាតាមទូរសព្ទរយៈពេល ៣០-៤០នាទី។ នេះគឺជាការជជែកគ្នាជាថ្មី បន្ទាប់ពីថ្ងៃទី២៣ធ្នូមក។
ចំពោះជម្លោះអ៊ីស្រាអែល-ហាម៉ាសប៉ាឡេស្ទីន គឺ លោក ចូ បៃដិន បញ្ជាក់ប្រាប់ក្រុមអ្នកកាសែត ទៀតថា អាចមានដំណោះស្រាយ«បង្កើតរដ្ឋពីរ» និងថា «ប្រទេសជាច្រើនជារដ្ឋសមាជិករបស់អង្គការសហប្រជាជាតិ ដែលគ្មានកងទ័ពផ្ទាល់ខ្លួនទេ»។
លោក ចូ បៃដិន ក៏បានទទួលស្គាល់ដែរថា គេត្រូវធ្វើកិច្ចការជាច្រើនណាស់ ដើម្បីនឹងសម្រេចដំណោះស្រាយនេះទៅបាន ហើយថ្នាក់ដឹកនាំអាមេរិក ក៏ដឹងដែរថា ការបង្កើតរដ្ឋប៉ាឡេស្ទីន គឺជាដំណោះស្រាយ លំបាកធ្វើទៅបាន ល្គឹកណា លោក បេនចាមិន នេតាន់យ៉ាហ៊ូ នៅតែបន្តកាច់ចង្កូតដឹកនាំអ៊ីស្រាអែល។ ដ្បិត លោក នេតាន់យ៉ាហ៊ូ បានបញ្ជាក់ជាញឹកញយហើយនិងបានប្រាប់យ៉ាងច្បាស់និងត្រង់ទៅកាន់លោក ចូ បៃដិន ថា «អ៊ីស្រាអែល ត្រូវតែគ្រប់គ្រងសន្តិសុខទាំងមូល នៅតំបន់ប៉ែកខាងលិចជ្រលងហ្ស័កដង់»។ នេះគឺឃើញថាផ្ទុយអំពីដែនអធិបតេយ្យរបស់ប៉ាឡេស្ទីនស្រេចទៅហើយ។
សំណុំរឿងសង្គ្រាមនៅតំបន់ហ្កាហ្សានេះ សហភាពអឺរ៉ុប នឹងត្រូវអញ្ជើញភាគីពាក់ព័ន្ធទាំងឡាយ ទៅប្រជុំគ្នា នៅច័ន្ទខាងមុខ។ នៅផ្នែកម្ខាង សហភាពអឺរ៉ុប ចង់រៀបចំដាក់ទណ្ឌកម្មបន្ថែមចំពោះថ្នាក់ដឹកនាំចលនាអ៊ីស្លាមហាម៉ាស់ ហើយនៅម្ខាងទៀត សហភាពអឺរ៉ុប ក៏បានបន្តរិះគន់អ៊ីស្រាអែល។ ចំពោះការរិះគន់នេះដែរ កាលពីថ្ងៃសុក្រ ប្រមុខទូតអឺរ៉ុប លោក ហ្សូសេព បូរែល បានចោទប្រកាន់អ៊ីស្រាអែល ថាជា«អ្នកបង្កើតក្រុមហាម៉ាស» នៅឆ្នាំ១៩៨៧ និងបានជួយ«ផ្គត់ផ្គង់លុយកាក់»ពួកនេះ ដើម្បីទប់ទល់«បន្ថយបន្សាបឥទ្ធិពល»របស់ ពួកអាជ្ញាធរប៉ាឡេស្ទីន។ ប៉ុន្តែ ការរិះគន់ត្រង់ចំណុចនេះ គឺពុំមែនជារឿងថ្មីទេ ហើយរាល់លើក គឺត្រូវថ្នាក់ដឹកនាំអ៊ីស្រាអែលច្រានចោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ