អង្គការមនុស្សធម៌អង់គ្លេស រាប់ឃើញមានគ្រោះមហន្តរាយធម្មជាតិ ចំនួន ១៩ នៅឆ្នាំ ២០១៩
នៅពេលព្យុះសង្ឃរា Phanfone កំពុងបោកបក់ និងសម្លាប់មនុស្សយ៉ាងតិច ៤១នាក់ នៅហ្វីលីពីន នៅថ្ងៃអាទិត្យទី ២៩ ធ្នូ អង្គការអង់គ្លេសមួយ ដែលមានឈ្មោះថា Christian aid បានរាប់រកឃើញថា មានគ្រោះមហន្តរាយធម្មជាតិចំនួន ១៥ នៅក្នុងពិភពលោក ដែលកើតឡើង ដោយសារកត្តាប្រែប្រួលអាកាសធាតុ នៅឆ្នាំ ២០១៩។ គ្រោះមហន្តរាយធម្មជាតិ ដែលបានបណ្តាលឲ្យមានការខូចខាត ខាតបង់ថវិកាជាច្រើនពាន់លានដុល្លារ។
ចុះផ្សាយនៅថ្ងៃ៖
ស្តាប់ - ០២:០១
ដោយផ្អែក លើទិន្នន័យ ដែលប្រមូលបានមកពីគ្រប់ប្រភពដូចជារបាយការណ៍អង្គការសហប្រជាជាតិ របាយការណ៍របស់រដ្ឋាភិបាល ការចុះផ្សាយរបស់ប្រព័ន្ធផ្សព្វផ្សាយ និងការសិក្សារបស់អ្នកវិទ្យាសាស្រ្ត អង្គការផ្តល់ជំនួយមនុស្សធម៌ អង់គ្លេស Chritian Aid បានរាប់រកឃើញមាន គ្រោះមហន្តរាយធម្មជាតិធំៗ ចំនួន ១៩ ដែលបានកើតឡើង នៅគ្រប់ទ្វីប ក្នុងពិភពលោក នៅឆ្នាំ ២០១៩។
តាមរបាយការណ៍របស់អង្គការអង់គ្លេស គ្រោះធម្មជាតិ ដូចជា ទឹកជំនន់ ព្យុះសង្ឃរា ហើយនិងភ្លើងឆេះព្រៃ បានបណ្តាលឲ្យមានការបាត់បង់ជីវិតមនុស្ស និងការខាតបង់ទឹកប្រាក់រាប់ពាន់លានដុល្លារ។ សម្រាប់អ្នកនិពន្ធរបាយការណ៍របស់អង្គការChristian Aid គ្រោះមហន្តរាយធម្មជាតិនីមួយៗ មានជាប់ទាក់ទងនឹងកត្តាប្រែប្រួលអាកាសធាតុ។ ឧទាហរណ៍ នៅអាហ្សង់ទីន និងអ៊ុយរ៉ូហ្កាយ ទឹកជំនន់ ដែលបានបង្កឲ្យមានការខាតបង់ទឹកប្រាក់ ២ពាន់លានដុល្លារ កាលពីខែមករាដើមឆ្នាំនេះ បានកើតមាននៅតំបន់ ដែល ទទួលទឹកភ្លៀងច្រើនខុសពីធម្មតា បន្ទាប់ពីបានជួបគ្រោះរាំងស្ងួត ពេញមួយឆ្នាំមុន។ ក្នុងករណីព្យុះIdai ដែលបានជន់លិច ទឹកដីមួយផ្នែករបស់ប្រទេសម៉ូសំប៊ិក អ្នកវិទ្យាសាស្រ្តបានវាយតម្លៃថា វាកើតឡើងដោយសារការឡើងកំដៅទឹកសមុទ្រ នៅមហាសមុទ្រឥណ្ឌា បូកផ្សំនឹងការឡើងកំពស់ទឹកសមុទ្រ ដែលជំរុញឲ្យមានការជន់លិចខ្លាំង នៅក្រោយ ខ្យល់ព្យុះ។
ជាការកត់សំគាល់របស់អង្គការមនុស្សធម៌ អង់គ្លេស គ្រោះមហន្តរាយធម្មជាតិ ដូចជាទឹកជំនន់ និងព្យុះសង្ឃរា បានសម្លាប់ជីវិត ភាគច្រើន នៅតាមប្រទេសក្រីក្រ ប្រទេស កំពុងអភិវឌ្ឍន៍ ដូចជាឥណ្ឌា ជាដើម ជាទី ដែលគ្រោះទឹកជំនន់នៅភាគខាងជើងប្រទេស បានសម្លាប់មនុស្ស ជាង ១៩០០នាក់ នៅពេលគ្រោះទឹកជំនន់ និងព្យុះសង្ឃរាIdai សម្លាបមនុស្ស១៣០០នាក់។
ចំណែកនៅបណ្តាប្រទេសអ្នកមាន ការបាត់បង់ជីវិតមានតិចតួច ប៉ុន្តែ ការខូចខាត គិតជាទឹកប្រាក់មានទំហំច្រើន ដូចជានៅអាមេរិក ជាដើម ការខាតបង់ ដោយសារ ភ្លើងឆេះព្រៃ នៅរដ្ឋកាលីហ្វនីញ៉ា មាន ប្រមាណ ២៥ពាន់លានដុល្លារ ក្នុងពេលជប៉ុនបានខាតបង់ប្រាក់ប្រមាណ ១៥ពាន់លានដុល្លារដោយសារគ្រោះទឹកជំនន់ Hagibis៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ