ហ្វីលីពីន៖ ភ្នំភ្លើងតាអាល់បន្តគំរាម ដោយគ្មាននរណាអាចស្មានដឹង ថាអាចស្ងប់នៅពេលណា
ភ្នំភ្លើង តាអាល់ (Taal) នៅហ្វីលីពីន បានចាប់ផ្តើមកំរើក បញ្ចេញផ្សែងនឹងផេះ កាលពីថ្ងៃអាទិត្យ ទី១២មករា ហើយនៅតែបន្តសកម្មភាពដដែល។ ការកំរើករបស់ភ្នំភ្លើងនេះ បានបង្ខំឲ្យប្រជាជនរាប់ម៉ឺននាក់ ដែលរស់នៅក្នុងតំបន់ក្បែរភ្នំភ្លើង ត្រូវភៀសខ្លួនចេញ។ ភ្នំភ្លើងតាអាល់ ស្ថិតនៅកណ្តាលបឹងធំមួយ ដែលជាតំបន់ទេសចរណ៍ដ៏ល្បី នៅមិនឆ្ងាយប៉ុន្មាន ពីទីក្រុងមីនីល រដ្ឋធានីហ្វីលីពីន។ វិស័យទេសចរណ៍ របស់តំបន់នេះ ត្រូវរាំងស្ទះទាំងស្រុង បន្ទាប់ពីភ្នំភ្លើងបានកម្រើក។
ចុះផ្សាយនៅថ្ងៃ៖ កែប្រែថ្ងៃទី៖
វិទ្យុបារាំងអន្តរជាតិ បានជួបសម្ភាសន៍ជាមួយ លោក Orly Oboza តំណាងរបស់អង្គការ Accord ដែលបានទៅដល់តំបន់ក្បែរភ្នំភ្លើង ដើម្បីជួយសង្រ្គោះ និងជម្លៀសប្រជាជន។
តំបន់នេះ គឺជាតំបន់ទេសចរណ៍ ល្បីខ្លាំងណាស់ របស់ប្រទេសយើង។ ចាប់តាំងពីថ្ងៃអាទិត្យមក ទីក្រុង Tagaytay បានបាត់បង់រូបរាងដើមអស់ទៅហើយ។ ទីក្រុងទាំងមូល ត្រូវគ្របដណ្តប់ដោយ ផេះភ្នំភ្លើង។ សង្កាត់ដែលសំបូរទេសចរណ៍ បានរងការខូចខាតច្រើនណាស់។ មិនមានអ្នកទេសចរណ៍ណា ធ្វើដំណើរមកតំបន់នេះ ដើម្បីគយគន់មើលទេសភាពភ្នំភ្លើងនេះទៀតឡើយ។សូម្បីតែតំបន់ដីចំការដំណាំ កសិករដាំផ្កា ដែលធ្លាប់តែលក់ផ្កាឲ្យទេសចរណ៍ ពេលនេះបានរងផលប៉ះពាល់ខ្លាំងណាស់ដែរ ដោយសារតែការកំរើកឡើងរបស់ភ្នំភ្លើង។ ប្រជានេសាទ ដែលរស់នៅលើកោះ ត្រូវបង្ខំចិត្តផ្អាកការចេញទូកទៅនេសាទ ដែលជាប្រភពចំណូលតែមួយគត់របស់ពួកគេ។បញ្ហាចោទនោះ គឺថា យើងមិនដឹងថា តើគ្រោះធម្មជាតិនេះ នឹងនៅបន្តគំរាមរហូតរយៈពេលប៉ុន្មានទៀតនោះទេ។ តើប្រជាជនដែលបានភៀសខ្លួន ទៅស្នាក់នៅបណ្តោះអាសន្នតាមមណ្ឌលសង្រ្គោះនោះ អាចត្រលប់មកផ្ទះសម្បែង ភូមិស្រុកវិញ នៅពេលណា ក៏យើងមិនដឹង។ គ្មាននរណាអាចឆ្លើយបានទេ អាជ្ញាធររដ្ឋាភិបាលក៏មិនដឹង ក្រុមការងារដែលឃ្លាំមើលភ្នំភ្លើងនេះ ក៏ថាមិនដឹង។ គ្មាននរណាអាចដឹងបានទេ ថាភ្នំភ្លើងនេះ នឹងឈប់កំរើក ហើយស្ងប់ទៅវិញនៅពេលណានោះ។
ប្រសាសន៍លោក Orly Oboza តំណាងរបស់អង្គការ Accord ប្រែសម្រួលដោយ ម៉ម ពិសី
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ