ជប៉ុន មានស្លាប់ជាច្រើននាក់នៅក្នុងគ្រោះព្យុះភ្លៀង
ព្យុះភ្លៀងដ៏កំណាចបានបោកបក់លើតំបន់ភាគពាយ័ព្យប្រទេស នៃកោះ គីអុស្ហូ KYUSHU របស់ជប៉ុន តាំងពីថ្ងៃសៅរ៍ទី ៤កក្កដាមក បង្កឱ្យមានទឹកជំនន់ និងការហូរបាក់ដីយ៉ាងខ្លាំង។ មនុស្ស១៦នាក់ទំនងជាបានស្លាប់និងជាងច្រើននាក់ផ្សេងទៀតបានបាត់ខ្លួន។ នេះបើតាមការជូនដំណឹងរបស់ប្រព័ន្ធឃោសនាព័ត៌មានជប៉ុន នៅព្រឹកថ្ងៃអាទិត្យ ទី ៥ កក្កដា ២០២០។
ចុះផ្សាយនៅថ្ងៃ៖
ស្តាប់ - ០១:៥២
ភ្នាក់ងារឧតុនិយមជប៉ុន បានប្រកាសដាក់កោះគីអុស្ហូ ឱ្យស្ថិតក្រោមការប្រុងប្រយ័ត្នខ្ពស់បំផុត ប្រឈមនឹងគ្រោះទឹកជំនន់និងការហូរបាក់ដី។ ភ្លៀងបានធ្លាក់ខ្លាំង ដូចគេចាក់ទឹក។ នៅខេត្ត Kumamoto និងខេត្ត Kagoshima កម្ពស់ទឹកភ្លៀងបានឡើង១០០មីល្លីម៉ែត្រជារៀងម៉ោង នៅពេលធ្លាក់ខ្លាំង។ កម្លាំងទឹកភ្លៀងហាក់ចាប់ផ្តើមថយឥទ្ធិពលបន្តិចនៅថ្ងៃអាទិត្យនេះ។
ប៉ុន្តែតំបន់នេះមានមជ្ឈមណ្ឌលនុយក្លេអ៊ែរពីរផង។ ទូរទស្សន៍ជាតិ បានបង្ហាញរូបភាពនៃការលិចលង់ ភូមិស្ថាន ផ្លូវថ្នល់ត្រូវកាត់ផ្តាច់ ស្ពានជាច្រើនត្រូវប្រេះបែក ... ទឹកជំនន់បានជន់លិចមណ្ឌលចាស់ជរា បង្កឱ្យលង់ស្លាប់មនុស្ស១៤នាក់។ បើតាមទូរទស្សន៍ NHK ជនរងគ្រោះ១៤នាក់ផ្សេងទៀតកំពុងស្ថិតក្នុងស្ថានភាពធ្ងន់ធ្ងរបេះដូងលែងដើរ (ស្លាប់ តែមិនទាន់បញ្ជាក់ជាផ្លូវការដោយគ្រូពេទ្យ)។
មានយ៉ាងហោចមនុស្ស៦នាក់ផ្សេងទៀតបានបាត់ខ្លួន។ ក្រុមសង្គ្រោះ និងយោធានៃកងកម្លាំងស្វ័យការពារជប៉ុន កំពុងសស្រាក់សស្រាំ ស្វែងរកជនបាត់ខ្លួន និងប្រជាពលរដ្ឋដែលជាប់កុននៅក្នុងផ្ទះ។ ប៉ុន្តែអាជ្ញាធរតំបន់ និងឃុំស្រុក មិនអាចបញ្ជាក់អំពីចំនួនអ្នកស្លាប់ ដែលសារព័ត៌មានបានជូនដំណឹងនៅព្រឹកថ្ងៃអាទិត្យនេះបានទេ តែបានអះអាងថាកំពុងចាត់វិធានការចាំបាច់មួយចំនួនទៀត ដើម្បីជួយជម្លៀសជនរងគ្រោះពីគ្រោះធម្មជាតិទឹកជំនន់នេះផង និងការពារកុំឱ្យមានការចម្លងរីករាលដាលមេរោគកូរ៉ូណាវីរុសថ្មីផង។
ថ្វីបើអាជ្ញាធរមិនបានចេញបទបញ្ជាឱ្យមានការជម្លៀសប្រជាជនដោយបង្ខំក៏ដោយ ក៏ពលរដ្ឋប្រមាណជាង២សែននាក់បានទទួលអនុសាសន៍ឱ្យចាកចេញពីផ្ទះ ទៅរកជម្រកសុវត្ថិភាព ដើម្បីងាយទប់ស្កាត់នឹងកូវីដ១៩។ ពលរដ្ឋម្នាក់ៗត្រូវពាក់ម៉ាស់ និងត្រូវរក្សាគម្លាតសុវត្ថិភាព នៅឱ្យឆ្ងាយពីគ្នា ពីរម៉ែត្រ ពីគ្រួសារមួយទៅគ្រួសារមួយទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ