បារាំងចាប់ផ្តើមបញ្ជូនយន្តហោះចម្បាំងរ៉ាហ្វាល់ទៅឱ្យឥណ្ឌា
យន្តហោះចម្បាំងរ៉ាហ្វាល់ Rafale បិទទង់ជាតិឥណ្ឌា បៃតងសនិងលឿងទុំ បើកបញ្ជាដោយកងកម្លាំងយោធាជើងអាកាសឥណ្ឌា Indian Air Force ចំនួន៥គ្រឿង ដំបូង បានចាកចេញពីប្រទេសបារាំង ហោះសំដៅទៅប្រទេសឥណ្ឌាហើយ នៅថ្ងៃចន្ទទី ២៧កក្កដា ២០២០។ បើតាមការគូសបញ្ជាក់របស់យោធាជើងអាកាសឥណ្ឌាយន្តហោះចម្បាំងនេះនឹងត្រូវចេញធ្វើប្រតិបត្តិការបានយ៉ាងឆាប់រហ័ស ពោលគឺតែប៉ុន្មានសប្តាហ៍ក្រោយឧប្បត្តិហេតុនៅតាមព្រំដែនជាមួយចិន។
ចុះផ្សាយនៅថ្ងៃ៖
ស្តាប់ - ០២:៤៤
រ៉ាហ្វាល់ត្រូវចុះចតនៅមូលដ្ឋានទ័ពបារាំងនៅប្រទេសអេមីរ៉ាត់អារ៉ាប់រួម និងត្រូវចាក់សាំងពេលកំពុងហោះហើរជាច្រើនដង មុននឹងដល់ប្រទេសឥណ្ឌា ដើម្បីចូលតម្រង់ជួរនៅថ្ងៃពុធទី២៩កក្កដា២០២០ ក្នុងមូលដ្ឋានកងទ័ពអាកាស អំបាឡា Ambala ដែលស្ថិតនៅភាគខាងជើងប្រទេស ចម្ងាយប្រមាណតែ២០០គីឡូម៉ែត្រពីព្រំដែនប៉ាគីស្ថាននិងចិន។
បញ្ជាទិញនៅឆ្នាំ២០១៦ពីបារាំង ចំនួន៣៦គ្រឿង ឥណ្ឌាត្រូវចាប់ផ្តើមទទួលយន្តហោះរ៉ាហ្វាល់ប៉ុន្មានគ្រឿងដំបូង នៅខែតុលា ២០១៩ តែយន្តហោះទាំង៥គ្រឿង ព្រមទាំងក្រុមការងារត្រូវស្ថិតនៅប្រទេសបារាំងសិនដើម្បីបានទទួលការបំពាក់បំប៉ន។ ទីបំផុត ទោះបីមានវិបត្តិកូវីដ១៩ក្តី ក៏បារាំងគ្រប់កិច្ចសន្យាបានយ៉ាងត្រឹមត្រូវ។ អ្នកបើកបររ៉ាហ្វាល់ និងអ្នកបច្ចេកទេស ព្រមទាំងបុគ្គលិកសម្របសម្រួលនៅលើដី បានទទួលការបំពាក់បំប៉ន ពីរបៀបប្រើប្រាស់បើកនិងបញ្ជាបាញ់ ព្រមទាំងការជួលជុលថែទាំយ៉ាងពេញលេញ គ្មានខ្វះចន្លោះឡើយ ពីក្រុមហ៊ុនយន្តហោះ។
យន្តហោះចម្បាំងគ្រឿងផ្សេងទៀត នឹងត្រូវបញ្ជូនទៅឥណ្ឌាបន្តិចៗម្តងៗ រហូតដល់គ្រប់ នៅត្រឹមឆ្នាំ២០២២។
« លឿន រហ័ស ពហុជំនាញ និងជាយន្តហោះចម្បាំងដ៏ខ្លាំងក្លា រ៉ាហ្វាល់នឹងមកពង្រឹងអំណាចយោធាផ្លូវអាកាសឥណ្ឌាផង សមត្ថភាពការពារខ្លួនផង និងក៏ជានិម្មិត្តរូបដ៏អស្ចារ្យនៃភាពជាដៃគូបារាំង-ឥណ្ឌា »។ នេះជាប្រសាសន៍អបអររបស់ឯកគ្គរដ្ឋទូតឥណ្ឌាប្រចាំទីក្រុងប៉ារីស។
សូមបញ្ជាក់ថា ឥណ្ឌារង់ចាំបំពាក់រ៉ាហ្វាល់ខ្លាំងណាស់ ដើម្បីអាចធ្វើទំនើបកម្មកងទ័ពអាកាសរបស់ខ្លួន ដែលមានតែយន្តហោះចម្បាំងកញ្ចាស់ៗ និងដើម្បីអាចដំឡើងសាច់ដុំដាក់ឥណ្ឌានិងប៉ាគីស្ថាន ដែលតែងមានភាពតានតឹងព្រំដែនជាញឹកញយដាក់គ្នា។
កាលពីខែកុម្ភៈ២០១៩ ឥណ្ឌានិងប៉ាគីស្ថានបានប៉ះទង្គិចគ្នាមួយប្រាវ តាមផ្លូវអាកាស បង្កឱ្យមានការព្រួយបារម្ភខ្លាំងខ្លាចប្រទេសជិតខាងទាំងពីរផ្ទុះសង្គ្រាមនឹងជាថ្មី។ នៅថ្ងៃទី ១៥មិថុនា២០២០ ឥណ្ឌាបានប៉ះទង្គិចយោធាជាមួយចិន ជាលើកទីមួយគិតចាប់តាំងពីឆ្នាំ១៩៧៥មក ស្លាប់ទាហានឥណ្ឌាយ៉ាងហោច២០នាក់។
ចំណែកខាងបារាំងអ្នកផលិតយន្តហោះ ដែលមានឥណ្ឌាជាអតិថិជនបរទេសទីមួយ តាំងពីឆ្នាំ១៩៥៣មកនោះ សង្ឃឹមថានឹងអាចលក់រ៉ាហ្វាល់បានបន្ថែមទៀតទៅឱ្យញូវដេលី។ មហាយក្សឥណ្ឌាធ្លាប់បានមូលពាក្យធ្វើសំណើផ្លូវការម្តងកាលពីខែឧសភា២០១៧ សុំព័ត៌មានចង់ទិញយន្តហោះចម្បាំងសម្រាប់ទៅបំពាក់ឱ្យកងទ័ពជើងទឹកចំនួន ៥៧គ្រឿង និងម្តងទៀតនៅខែកក្កដា២០១៨ ដើម្បីរកទិញយន្តហោះចម្បាំង ១១០គ្រឿង ទៅបំពាក់ឱ្យកងទ័ពអាកាស Indian Air Force៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ