ជិត៣ខែដែលជាប់ឃុំ លោកស្រីអ៊ុងសាន ស៊ូជី នៅតែមិនអាចជួបក្រុមមេធាវីការពារលោកស្រីទេ
គិតមកទល់ពេលនេះ គឺជាតិ៣ខែហើយ ដែលលោកស្រីអ៊ុងសាន ស៊ូជី ត្រូវគេដាក់ឃុំនៅក្រុងណៃពីដាវ។ លោកស្រីបានទាមទារសុំជួប ក្រុមមេធាវីដែលការពារក្តីជូនលោកស្រី តែរហូតមកទល់ពេលនេះ ក្រុមកងទ័ពភូមានៅតែមិនអនុញ្ញាត។ កាលពីថ្ងៃចន្ទ ទី២៦មេសា មេធាវីរបស់លោកស្រីអ៊ុងសាន ស៊ូជី បានអះអាងថា បានឃើញលោកស្រីតាមវីដេអូខុនហ្វេរិនស៍ នៅក្នុងអង្គសវនាកា តុលាការក្រុងណៃពីដាវ។
ចុះផ្សាយនៅថ្ងៃ៖
ស្តាប់ - ០២:២៨
លោក Min Min Soe មេធាវីម្នាក់ នៃក្រុមការងារការពារក្តីជូនលោកស្រី អ៊ុងសាន ស៊ូជី បានអះអាងថា លោកស្រីអ៊ុងសាន ស៊ូជី ត្រូវបានគេអនុញ្ញាតឲ្យបង្ហាញមុខ តាមប្រព័ន្ធវីដេអូខុនហ្វឺរិនស៍ ជាថ្មីម្តងទៀត ក្នុងអង្គសវនាការ តុលាការក្រុងណៃពីដាវ កាលពីថ្ងៃចន្ទ ទី២៦មេសា។ តាមរយៈរូបភាពវីដេអូ គឺលោកស្រីហាក់មានសុខភាពធម្មតាទេ តែមានរូបរាង្គចុះស្គមច្រើន។
នៅក្នុងអង្គសវនាកា លោកស្រីបានទាមទារសុំជួប ជាមួយក្រុមមេធាវីដែលការពារក្តីជូនលោកស្រី ព្រោះថាជិត៣ខែមកហើយ លោកស្រីមិនដែលបានជួបនរណាម្នាក់ទាល់តែសោះ។ សមត្ថកិច្ចភូមា បានឆ្លើយតបថា សម្រាប់ពេលនេះគេមិនទាន់អាចអនុញ្ញាតបានទេ ព្រោះគេកំពុងតែធ្វើការ មួយជំហានម្តង មួយជំហានម្តង។
លោក Min Min Soe បានលើកឡើងផងដែរថា លោកស្រី អ៊ុងសាន ស៊ូជី មិនត្រូវគេអនុញ្ញាត ឲ្យទទួលបានព័ត៌មាននានា និងមានទូរទស្សន៍មើលទេ។ មានន័យថា ជិត៣ខែមកនេះ ប្រហែលជាលោកស្រី មិនបានដឹង អំពីស្ថានការណ៍ស្រុកទេស បាតុកម្ម និងការបង្រ្កាបសម្លាប់បាតុករនោះទេ។
សូមបញ្ជាក់ថា សវនាកាជំនំជំរះក្តី លើរូបលោកស្រីអ៊ុងសាន ស៊ូជី ត្រូវលើកទៅធ្វើនៅថ្ងៃទី ១០ ឧសភាបន្តទៀត។ មានវ័យ៧៥ឆ្នាំ លោកស្រីត្រូវគេចាប់ខ្លួន នៅព្រឹកថ្ងៃទី១កុម្ភៈ។ តុលាការភូមា បានចោទលោកស្រី លើបទចោទប្រកាន់ចំនួន៦ ដែលក្នុងនោះ មានដូចជាបទល្មើសរំលោភច្បាប់កិច្ចការសម្ងាត់ជាតិ ដែលមានចំណាស់តាំងតែពីសម័យអាណានិគម និងបទល្មើសទទួលសំណូក មានប្រាក់១លានដុល្លារ និងមាស១១គីឡូក្រាម។ ជាមួយនឹងបទចោទប្រកាន់ទាំងនេះ លោកស្រីអ៊ុងសាន ស៊ូជី អាចប្រឈមនឹងការហាមឃាត់ឲ្យឈប់ធ្វើនយោបាយជារៀងរហូត និងអាចជាប់ឃុំយូរឆ្នាំថែមទៀតផង។
ដោយឡែកនៅថ្ងៃចន្ទទី២៦មេសា ប្រជាជនភូមា នៅតែបន្តចុះផ្លូវ លើកគ្រវីទង់ក្រហម រូបហង្សពណ៌មាស ដែលជាទង់របស់គណបក្សលោកស្រីអ៊ុងសាន ស៊ូជី។ គិតមកត្រឹមពេលនេះ មានមនុស្សចំនួនប្រមាណ៧៥០នាក់ បានស្លាប់ ដោយការបាញ់រះកងទ័ពភូមា។ ចំណែកមនុស្សជាប់ឃុំវិញ មានចំនួនប្រមាណ៣៥០០នាក់។
កាលពីថ្ងៃសៅរ៍ទី២៤មេសា លោកមីន អ៊ុងឡាំង មេបញ្ជាការកងទ័ពជាតិភូមា បានទៅប្រជុំជាមួយថ្នាក់ដឹកនាំប្រទេសសមាជិកអាស៊ាន នៅទីក្រុងចាការតា។ នៅក្នុងឱកាសនោះ ប្រទេសអាស៊ានទាំង៩ បានប្រាប់ទៅលោកមីន អ៊ុងឡាំង ថាត្រូវតែបញ្ឈប់ការបាញ់សម្លាប់បាតុករ ហើយត្រូវបើកផ្លូវ ឲ្យតំណាងពិសេសរបស់អាស៊ាន ចូលទៅភូមា ឲ្យបានឆាប់បំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ