លោកស្រីអ៊ុងសាន ស៊ូជី ត្រូវគេអនុញ្ញាតឲ្យចូលអង្គសវនាកា និងជួបក្រុមមេធាវីដោយផ្ទាល់ ជាលើកទី១
លោកស្រីអ៊ុងសាន ស៊ូជី ត្រូវបានកងទ័ពភូមា អនុញ្ញាតឲ្យចូលខ្លួនដោយផ្ទាល់ ក្នុងអង្គសវនាកា នៅថ្ងៃចន្ទ ទី២៤ឧសភានេះ នៅតុលាការក្រុងណៃពីដាវ។ នេះគឺជាលើកទីមួយហើយ បន្ទាប់ពីលោកស្រី ត្រូវបានគេដាក់បង្ឃាំងក្នុងឃុំ ចាប់តាំងពីថ្ងៃធ្វើរដ្ឋប្រហារ ទី១កុម្ភៈមក។ នៅថ្ងៃនេះ លោកស្រីត្រូវបានគេអនុញ្ញាត ឲ្យជួបដោយផ្ទាល់ ជាមួយក្រុមមេធាវី ការពារក្តីរបស់លោកស្រីផងដែរ។
ចុះផ្សាយនៅថ្ងៃ៖
ស្តាប់ - ០២:៤៦
លោកស្រី Min Min Soe មេធាវីរបស់លោកស្រី អ៊ុងសាន ស៊ូជី បានប្រាប់អ្នកកាសែតថា លោក និងលោកស្រីអ៊ុងសាន ស៊ូជី ត្រូវបានគេអនុញ្ញាតឲ្យជួបគ្នាដោយផ្ទាល់ រយៈពេល៣០នាទី មុនពេលបើកអង្គសវនាកា។ លោកមេធាវីអះអាងថា លោកស្រីអ៊ុងសាន ស៊ូជី មានសុខភាពមាំមួន ហើយនៅតែមានការតាំងចិត្តរាំងមាំដដែល។ លោកស្រីបានបញ្ជាក់ថា ដរាបណានៅតែមានប្រជាជនភូមា នោះគណបក្ស សម្ព័ន្ធជាតិដើម្បីប្រជាធិបតេយ្យ នៅតែមានជីវិតជានិច្ច ព្រោះគណបក្សនេះជាគណបក្សដើម្បីប្រជាជនភូមា។
សូមបញ្ជាក់ថា បើសិនតុលាការភូមា សម្រេចទទួលស្គាល់ទោស នោះលោកស្រី អ៊ុងសាន ស៊ូជីអាចនឹងត្រូវ គេហាមឃាត់ មិនឲ្យធ្វើនយោបាយជារៀងរហូត និងអាចត្រូវជាប់ឃុំ រយៈពេលយូរផង។ ជាងនេះទៀត គណបក្សសម្ព័ន្ធជាតិដើម្បីលទ្ធិប្រជាធិបតេយ្យ របស់លោកស្រី ត្រូវប្រឈមនឹងការរំលាយចោល។
កាលពីថ្ងៃសុក្រសប្តាហ៍កន្លងទៅ នៅក្នុងវីដេអូមួយផ្សាយលើទំព័រ Facebook របស់បណ្តាញព័ត៌មានក្នុងស្រុកភូមាមួយ លោក Thein Soe ប្រធានគណកម្មការជាតិរៀបចំការបោះឆ្នោតភូមា បាននិយាយថា យោងតាមការស៊ើបអង្កេត គឺគណបក្សសម្ព័ន្ធជាតិដើម្បីប្រជាធិបតេយ្យ ពិតជាបានធ្វើសកម្មភាពខុសច្បាប់ នៅក្នុងការបោះឆ្នោត ខែវិច្ឆិកាឆ្នាំ២០២០ ដែលវាគឺជាអំពើក្បត់ជាតិ។ លោកម្នាក់នេះ បញ្ជាក់ថា គេកំពុងពិចារណា ថាតើត្រូវរំលាយគណបក្សនេះចោល ឬ ក៏ត្រូវផ្តន្ទាទោសថ្នាក់ដឹកនាំរបស់គណបក្សនេះ។ មន្ត្រីភូមារូបនេះ បានបញ្ជាក់ថា កាលពីថ្ងៃសុក្រទី២១ឧសភា គេបានបើកការប្រជុំ ជាមួយគណបក្សនយោបាយទាំងអស់ ដើម្បីធ្វើកំណែទម្រង់ ប្រព័ន្ធបោះឆ្នោត ក៏ប៉ុន្តែគណបក្សសម្ព័ន្ធជាតិដើម្បីប្រជាធិបតេយ្យ មិនបានមកចូលរួមទេ។
គួររំលឹកថា នៅពេលធ្វើរដ្ឋប្រហារថ្ងៃទី១កុម្ភៈ លោកឧត្តសេនីយ៍ មីន អ៊ុងឡាំង បានចេញមុខប្រកាសថា លោកនឹងរៀបចំការបើឆ្នោតជាថ្មី នៅរវាងមួយឆ្នាំទៀត ដោយគោរពតាមក្រិត្យក្រម សេរីយុត្តិធម៌។ ដោយឡែក ផ្អែកតាមការផ្សាយរបស់បណ្តាញព័ត៌មានក្នុងស្រុកភូមាមួយ នៅថ្ងៃទី២០ឧសភា របបសិកភូមា បានលុបចោលអាយុកំណត់ចូលនិវត្តន៍ របស់មន្ត្រីកងទ័ព ដែលនេះមានន័យថា លោកឧត្តមសេនីយ៍ មីន អ៊ុងឡាំង អាចបន្តបំពេញមុខនាទីបាន ទោះបីមានអាយុលើស៦៥ឆ្នាំក៏ដោយ។
នៅក្នុងបទសម្ភាសន៍ជាមួយទូរទស្សន៍ហុងកុង Phoenix TV ផ្សាយតាមបណ្តាញសង្គម កាលពីថ្ងៃសៅរ៍ លោកឧត្តមសេនីយ៍ មីន អ៊ុងឡាំង បានថ្លែងថា កងទ័ពភូមាចង់កសាងប្រទេស ដោយឈរលើលទ្ធិប្រជាធិបតេយ្យ ពហុបក្ស និងដោយគោរពគោលការណ៍សហព័ន្ធ។ លោកបន្ថែមថា បើអ្វីៗដូចការរំពឹងទុក កងទ័ពនឹងសម្រេចកម្មវត្ថុនេះ ក្នុងរយៈពេល១ឆ្នាំទៀត ឬ ក៏អាចថែម៦ខែទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ