អូស្ត្រាលីជំទាស់នឹងយូណេស្កូ ដែលចង់ដាក់បញ្ចូលតំបន់ផ្កាថ្មខ្លួន ក្នុងបញ្ជីសម្បត្តិបេតិកភណ្ឌប្រឈមគ្រោះថ្នាក់
យោងតាមរបាយការណ៍បឋម អង្គការយូណេស្កូ មានគម្រោងដាក់បញ្ចូល តំបន់ផ្កាថ្មដ៏ធំមហិមា ស្ថិតនៅតាមបណ្តោយឆ្នេរ ភាគឥសាន្តប្រទេសអូស្ត្រាលី ទៅក្នុងបញ្ជីសម្បត្តិបេតិកភណ្ឌ ដែលប្រឈមនឹងគ្រោះថ្នាក់។ ការសម្រេចរបស់អង្គការយូណេស្កូនេះ ត្រូវបានរដ្ឋាភិបាលអូស្ត្រាលី ប្រឆាំងតវ៉ា ថាវាជាការសម្រេចដោយអត្តនោម័ត និងមាក់ងាយចំពោះកិច្ចប្រឹងប្រឹងរបស់់អូស្ត្រាលីនាពេលកន្លងមក ដែលព្យាយាមការពារអភិរក្សតំបន់ផ្កាថ្មរបស់ខ្លួន។
ចុះផ្សាយនៅថ្ងៃ៖
ស្តាប់ - ០២:៥១
ថ្ងៃចន្ទ ទី២១មិថុនា អង្គការយូណេស្កូ បានចេញរបាយការណ៍បឋមមួយ ដោយបានលើកសំណើថា តំបន់ផ្កាថ្មដ៏ធំមហិមា (Great Barrier Reef) នៅភាគឦសានអូស្ត្រាលី ដែលត្រូវគេចាត់ជាសម្បត្តបេតិកភណ្ឌពិភពលោក តាំងតែពីឆ្នាំ១៩៨១នោះ នឹងត្រូវចាត់បញ្ចូលទៅក្នុង បញ្ជីសម្បត្តិបេតិកភណ្ឌ ដែលប្រឈមនឹងគ្រោះថ្នាក់វិញ។ អ្នកជំនាញយូណេស្កូ បានលើកហេតុផលថា តំបន់ផ្កាថ្មនេះ បានរងនូវការខូចខាតជាច្រើន ដែលធ្វើឲ្យផ្កាថ្មប្រែទៅជាមានពណ៌ស ដោយសារតែបម្រែមប្រួលអាកាសធាតុ។
បន្ទាប់ពីបានទទួលដំណឹងនេះភ្លាម លោកស្រី Sussan Ley រដ្ឋមន្ត្រីបរិស្ថានអូស្ត្រាលី បានលើកឡើងថា រដ្ឋាភិបាលលោកស្រី និងធ្វើការតវ៉ាជំទាស់ ទល់នឹងសំណើរបស់យូណេស្កូនេះ។ លោកស្រីបញ្ជាក់ថា លោកស្រីទទួលស្គាល់ ថាកត្តាបម្រែបម្រួលអាកាសធាតុក្នុងពិភពលោក គឺជាការគំរាមកំហែងមួយដ៏ធំ មកលើតំបន់ផ្កាថ្មរបស់អូស្ត្រាលី។ ក៏ប៉ុន្តែ ការចាត់បញ្ចូលតំបន់នេះ ថាជាតំបន់ប្រឈមគ្រោះថ្នាក់ខ្លាំង គឺជារឿងភ័ន្តច្រឡំហើយ។ លោកស្រីអះអាងថា គ្មានតំបន់បេតិកភណ្ឌណា ដែលត្រូវបានទទួលការការពារអភិរក្ស ល្អដូចតំបន់នេះទេ ព្រោះរដ្ឋអូស្ត្រាលី បានចំណាយប្រាក់រាប់ពាន់លានដុល្លារ។
គួរកត់សំគាល់ថា សម្រាប់អង្គការយូណេស្កូ ការចាត់បញ្ចូលសម្បត្តិបិតិកភណ្ឌណាមួយ ទៅក្នុងបញ្ជីបេតិកភណ្ឌដែលប្រឈមគ្រោះថ្នាក់ មិនមែនមានន័យថា ជាការដាក់ពិន័យ ទណ្ឌកម្មនោះទេ។ ក្នុងករណីខ្លះ ការធ្វើបែបនេះ ជាការដាស់ពញ្ញាក់ស្មារតី ឲ្យបង្កើនការប្រឹងប្រែងអភិរក្សការពារ និងចូលរួមសកម្មពីសំណាក់សហគមន៍អន្តរជាតិ។
យ៉ាងណាក៏ដោយ លោកស្រីរដ្ឋមន្ត្រីបរិស្ថានអូស្ត្រាលី បានលើកឡើងថា ពិតជាមានហេតុផលនយោបាយ នៅពីក្រោយការសម្រេច បែបស្តីបន្ទោស និងមាក់ងាយមកលើរដ្ឋាភិបាលអូស្ត្រាលីនេះ។ ប្រភពមិនបញ្ចេញឈ្មោះ បានអះអាងថា អូស្ត្រាលីគិតថាចិនជាអ្នកនៅពីក្រោយការសម្រេចរបស់យូណេស្កូ។ កិច្ចប្រជុំគណកម្មាធិការបេតិកភណ្ឌពិភពលោក របស់យូណេស្កូ នឹងត្រូវរៀបចំឡើងនៅខែកក្កដាខាងមុខនៅក្នុងប្រទេសចិន។
ដោយឡែក អង្គការការពារបរិស្ថានបានលើកឡើងថា វាជារឿងអាម៉ាសបំផុតសម្រាប់អូស្ត្រាលី ដែលគ្មានសមត្ថភាព ក្នុងការការពារថែររក្សាសម្បត្តិបិតិភណ្ឌតំបន់ផ្កាថ្ម។ លោក Richard Leck តំណាងអង្គការ WWF បានលើកឡើងថា អូស្ត្រាលីមិនមានវិធានការគ្រប់គ្រាន់ ក្នុងការពារសម្បត្តិធម្មជាតិ និងការប្រយុទ្ធប្រឆាំងនឹងការកើនឡើងកំដៅផែនដីទេ។ អូស្ត្រាលីជាប្រទេសធំមួយ ដែលនាំចូលឧស្ម័ន និងធ្យូងថ្មច្រើនណាស់ តែមកទល់ពេលនេះ រដ្ឋាភិបាលរបស់លោក ស្កុត ម៉ូរីសុន នៅមិនព្រមកំណត់ អំពីកម្មវត្ថុអព្យាក្រិត្យភាពកាបូន ពីនេះដល់ឆ្នាំ២០៥០ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ