លោកស្រីអ៊ុងសាន ស៊ូជី ត្រូវតុលាការរបបសឹកភូមា កាត់ទោស ឲ្យជាប់ពន្ធនាគារ៤ឆ្នាំ
នៅថ្ងៃចន្ទ ទី៦ធ្នូនេះ តុលាការរបស់របបសឹកភូមា បានសម្រេចផ្តន្ទាទោស លោកស្រីអ៊ុងសាន ស៊ូជី ឲ្យជាប់ពន្ធនាគារ៤ឆ្នាំ ពីបទញុះញង់បង្កអសន្តិសុខសង្គម និងបំពាននឹងវិធានការសុខាភិបាល ទាក់ទិននឹងវិបត្តិកូវីដ១៩។ លោកស្រី អ៊ុងសាន ស៊ូជី និម្មិតរូបប្រជាធិបតេយ្យភូមា ក៏កំពុងរងនូវការផ្តន្ទាទោសមួយចំនួនផ្សេងទៀតដែរ ពីសំណាក់តុលាការភូមា ដែលអាចរារាំងលោកស្រី ឲ្យនៅឆ្ងាយពីឆាកនយោបាយ ជារៀងរហូត។
ចុះផ្សាយនៅថ្ងៃ៖
ស្តាប់ - ០២:៤០
លោកស្រីអ៊ុងសាន ស៊ូជី ត្រូវបានតុលាក្រុងណៃពីដាវ ផ្តន្ទាទោស ឲ្យជាប់ពន្ធនាគារ ២ឆ្នាំ ពីបទញុះញង់ បំផុសបំផុល បង្កឲ្យមានអសន្តិសុខសង្គម អសណ្តាប់ធ្នាប់សាធារណៈ និងទោស២ឆ្នាំទៀត ពីបទបំពាននឹងវិធានការសុខាភិបាល ទាក់ទិននឹងការឆ្លងរាលដាលកូវីដ១៩។ នេះបើផ្អែកតាមការបញ្ជាក់ ថ្ងៃចន្ទទី៦ធ្នូ ពីសំណាក់ លោក Zaw Min Tun អ្នកនាំពាក្យរបបសឹកភូមា។
ចំណែកលោក Win Myint អតីតប្រធានាធិបតីភូមា ក៏ត្រូវតុលាការផ្ទន្ទាទោស ឲ្យជាប់ពន្ធនាគារសរុប៤ឆ្នាំដូចគ្នាដែរ ក្រោមបទចោទប្រកាន់ ដូចលោកស្រីអ៊ុងសាន ស៊ូជី ដែរ។ អ្នកនាំពាក្យរបបសឹកភូមា បានអះអាងថា អ្នកទាំងពីរ នឹងមិនទាន់ត្រូវបានគេបញ្ជូនខ្លួនទៅពន្ធនាគារ ក្នុងពេលនេះទេ ដោយសារអ្នកទាំង២នេះ ត្រូវប្រឈមនឹងសវនាការកាត់ទោស ពីបទល្មើសផ្សេងទៀត។
គួរកត់សំគាល់ថា សវនាការកាត់ទោស នៅថ្ងៃចន្ទ ទី៦ធ្នូ មិនត្រូវបានអាជ្ញាធរភូមា អនុញ្ញាតឲ្យអ្នកកាសែតចូលទៅតាមដានស្តាប់ទេ។ ចំណែកលោក មេធាវីការពារក្តីជូនលោកស្រីអ៊ុងសាន ស៊ូជីវិញ ត្រូវបានរបបសឹកភូមា ហាមឃាត់ មិនឲ្យនិយាយអ្វីទាំងអស់ ទៅកាន់អ្នកកាសែត។
សូមបញ្ជាក់ថា លោកស្រីអ៊ុងសាន ស៊ូជី បច្ចុប្បន្នដែលមានអាយុ៧៥ឆ្នាំ ត្រូវប្រឈមនឹងការចោទប្រកាន់ជាច្រើនផ្សេងទៀត ដែលអាចធ្វើឲ្យលោកស្រី ត្រូវតុលាការផ្តន្ទាទោសឲ្យជាប់ពន្ធនាគារ រាប់សិបឆ្នាំ។ ការចោទប្រកាន់ទាំងនេះ ត្រូវបានអ្នកវិភាគ និង អង្គការសិទ្ធិមនុស្សនានា អះអាងថា គឺជាឆាកល្ខោន ដែលរៀបចំឡើងដោយឥតខ្មាសអៀន ពីសំណាក់របបសឹក និងតុលាការពុករលួយ ដើម្បីបង្ឃាំងលោកស្រីអ៊ុងសាន ស៊ូជី ឲ្យនៅឆ្ងាយពីឆាកនយោបាយភូមាជារៀងរហូត។
លោក Ming Yu Hah តំណាងតំបន់ របស់អង្គការ Amnesty International បានលើកឡើងថា ការចោទប្រកាន់ បែបប្រឌិតក្លែងក្លាយ ដែលរបបសឹកភូមា បានធ្វើមកលើរូបលោកស្រីអ៊ុងសាន ស៊ូជី គឺវាបានសបង្ហាញឲ្យឃើញ នូវអំពើអយុត្តិធម៌យ៉ាងស្រស់ស្រស់ ដែលអ្នកទោសនយោបាយប្រមាណ ១៣០០នាក់ផ្សេងទៀត កំពុងតែរងទទួល។ នេះគឺជាយុទ្ធសាស្ត្ររបស់របបសឹក ដើម្បីបំបិទមាត់អ្នកប្រឆាំង និងរារាំងសិទ្ធិសេរីភាពបញ្ចេញមតិ។
ដូចគ្នាដែរ លោក Richard Horsey អ្នកវិភាគនៅ International Crisis Group បានលើកឡើងថា ការផ្តន្ទាទោសនេះ គឺជាការសងសឹក និងដើម្បីបង្ហាញកម្លាំងសាច់ដុំ ពីសំណាក់ក្រុមកងទ័ពភូមា មកលើលោកស្រីអ៊ុងសាន ស៊ូជី ក៏ដូចជាបក្សប្រជាធិបតេយ្យ។ តែយ៉ាងណា អ្នកវិភាគរូបនេះជឿថា របបសឹកប្រហែលជាមិនបញ្ជូនខ្លួនលោកស្រីអ៊ុងសាន ស៊ូជី ទៅឃុំនៅក្នុងពន្ធនាគារទេ គឺគេនឹងបង្ឃាំងលោកស្រីទុកក្នុងគេហដ្ឋាន ឬនៅទីតាំងណាមួយ ជារៀងដរាប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ