មេដឹកនាំយោធាភូមាប្រកាសពន្យារបទឈប់បាញ់រហូតដល់ចុងឆ្នាំ ២០២២
នៅក្នុងជំនួបផ្លូវការជាមួយ លោកនាយករដ្ឋមន្រ្តីហ៊ុន សែនកាលពីថ្ងៃសុក្រ ទី៧មករា មេដឹកនាំរបបសឹកភូមា លោកមីន អ៊ុងឡាំងបានអះអាងថា រដ្ឋាភិបាលយោធាភូមានឹងអនុវត្តបទឈប់បាញ់ជាមួយ អង្គការប្រដាប់អាវុធជនជាតិភាគតិចទាំងអស់នៅភូមា រហូតដល់ចុងឆ្នាំ ២០២២។ ដំណើរទស្សនកិច្ចរបស់នាយករដ្ឋមន្រ្តីកម្ពុជា នៅភូមាបានបង្កឲ្យបាតុកម្មតវ៉ា រិះគន់ នៅភូមា ដោយសារគេខ្លាចថា ដំណើរទស្សនកិច្ចរបស់លោកហ៊ុន សែន នឹងទៅបញ្ជាក់ភាពស្របច្បាប់របស់របបសឹកភូមា ដែលបានធ្វើរដ្ឋប្រហារទម្លាក់រដ្ឋាភិបាល ស៊ីវិល និងចាប់លោកស្រី អ៊ុងសាន ស៊ូជី ដាក់ឃុំ តាំងពីដើមខែកុម្ភៈ ឆ្នាំ មុន។
ចុះផ្សាយនៅថ្ងៃ៖
តាមសេចក្តីប្រកាសព័ត៌មានរួម ដែលធ្វើឡើងនៅរដ្ឋធានី ណៃពីដោរ ប្រទេសភូមា ប្រមុខរដ្ឋាភិបាលកម្ពុជា និងមេដឹកនាំរបបសឹកភូមាបាននិយាយគ្នាពីចំណុចសំខាន់ធំពីរ ដែលទាក់ទងនឹងវិបត្តិនៅភូមា។ ទី១ មេដឹកនាំយោធា លោកមីន អ៊ុងឡាំង បាននិយាយប្រកាសថា កងទ័ពនឹងពន្យារការអនុវត្តបទឈប់បាញ់ជាមួយអង្គការប្រដាប់អាវុធ ជនជាតិភាគតិចទាំងអស់ រហូតដល់ចុងឆ្នាំ ២០២២។ នៅក្នុងន័យនេះ មេដឹកនាំរបបសឹកបាននិយាយស្វាគមការចូលរួមរបស់ប្រេសិតថ្មីពិសេសរបស់អាស៊ាន នៅក្នុងកិច្ចពិភាក្សាស្តីពីបទឈប់បាញ់ជាមួយក្រុមប្រដាប់អាវុធជនជាតិភាគតិច។ ទី២ មេដឹកនាំកម្ពុជា និងភូមាបានព្រមព្រៀងគ្នាផងដែរឲ្យមានកិច្ចប្រជុំរវាងភាគីពាក់ព័ន្ធ ដើម្បីបើកផ្លូវ នាំជំនួយមនុស្សធម៌ ដល់ប្រជាជនភូមា។
នៅក្នុងសេចក្តីប្រកាសព័ត៌មានរួម កាលពីថ្ងៃសុក្រ មេដឹកនាំយោធាភូមា លោកមីន អ៊ុងឡាំង និយាយផងដែរថា នឹងផ្តល់ការគាំទ្រដល់ប្រេសិតថ្មី របស់អាស៊ាន ដើម្បីអាចបំពេញតួនាទីរបស់ខ្លួនក្នុងការអនុវត្តផែនការ៥ចំណុចរបស់អាស៊ាន ដើម្បីដោះស្រាយវិបត្តនៅភូមា។ ប៉ុន្តែ លោកមិនបានបញ្ជាក់ថា តើប្រេសិតរបស់អាស៊ាននឹងត្រូវអនុញ្ញាតឲ្យចូលជួបលោកស្រី អ៊ុងសាន ស៊ូជី ដែលកងទ័ពកំពុងចាប់ដាក់ឃុំដែរឬទេ។
កន្លងមក របបសឹកភូមា មិនបានអនុវត្តតាមគោលការណ៍៥ចំណុចរបស់អាស៊ាន ដោយបានបដិសេធ មិនអនុញ្ញាតឲ្យប្រេសិតពិសេសរបស់អាស៊ានចូលជួបលោកស្រីអ៊ុងសាន ស៊ូជី រហូតធ្វើឲ្យអាស៊ានខឹងសម្បារ ផាត់ មិនឲ្យមេដឹកយោធាភូមា ចូលរួមក្នុងជំនួបកំពូលអាស៊ាន កាលពីចុងឆ្នាំមុន។
លោកនាយករដ្ឋមន្រ្តីហ៊ុន សែន ដែលទើបចូលធ្វើជាប្រធានដឹកនាំវិលជុំអាស៊ាន បានក្លាយជាមេដឹកនាំបរទេសដំបូងគេ ដែលធ្វើដំណើរទស្សនកិច្ចផ្លូវរដ្ឋ នៅភូមា គិតចាប់តាំងពីកងទ័ពភូមាធ្វើរដ្ឋប្រហារទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី។
ទស្សនកិច្ចរបស់ប្រមុខរដ្ឋាភិបាលកម្ពុជាបានរងការរិះគន់ មិនថា ពីខាងសកម្មជនប្រឆាំងភូមា និងអង្គការការពារសិទ្ធិមនុស្ស។ នៅថ្ងៃសុក្រ បាតុកម្មដុតរូបថតលោកហ៊ុន សែន និងរូបមេដឹកនាំរបបសឹកបានផ្ទុះឡើង នៅតាមទីក្រុងមួយចំនួន ដូចជានៅ ម៉ង់ដាឡេ។
សម្រាប់ ចលនាប្រឆាំង ដែលប្រមូលផ្តុំដោយអតីតសមាជិកសភា មកពីគណបក្សរបស់លោកស្រីអ៊ុងសាន ស៊ូជី ហៅកាត់ជាភាសាអង់គ្លេស ថា CRPH ទស្សនកិច្ចរបស់លោកហ៊ុន សែន នឹងមិននាំផលចំណេញដល់ប្រជាជនភូមា ផ្ទុយទៅវិញ ប្រជាជនភូមាប្រឆាំងរាល់ទង្វើគាំទ្ររបបសឹក។
តាមlលោក ហ្វីល រ៉ូបឺតសុន (Phil Robertson) អនុប្រធានអង្គការHuman Rights Watch ប្រជាជនភូមា ចង់បានការស្តារលទ្ធិប្រជាធិបតេយ្យ និងការគោរពសិទ្ធិមនុស្ស។ ដូច្នេះ ពួកគេនឹងមិនទទួលយកនយោបាយផ្លូវកាត់របស់នាយករដ្ឋមន្រ្តីហ៊ុនសែននោះទេ។
ក្រៅពីផ្ទុះអាវុធ វាយប្រហារទៅលើក្រុមចលនាប្រឆាំងការធ្វើរដ្ឋប្រហារ កងទ័ពភូមាកំពុងបើកសមរភូមិប្រយុទ្ធជាមួយក្រុមឧទ្ទាមជនជាតិភាគតិចការ៉ែន នៅភាគខាងកើត ដែលបង្កឲ្យមានលំហូរជនភៀសខ្លួនភូមាទៅប្រទេសថៃ។ ថ្មីៗនេះ របបសឹកភូមា ទើបរងការចោទប្រកាន់ថា បានដុតសម្លាប់ប្រជាជនស៊ីវិលជាង៣០នាក់ នៅរដ្ឋកាយ៉ា ដែលនៅក្នុងនោះមានស្ត្រីកុមារ និងបុគ្គលិកអង្គការSave the Children៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ