ចិនយល់ព្រមឲ្យប្រមុខ អ.ស.ប.ទទួលបន្ទុកសិទ្ធិមនុស្សទៅកាន់តំបន់ស៊ីងជាំង តែនៅក្រោយកីឡាអីឡាំពិក
ប្រទេសចិនបានយល់ព្រមឲ្យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សលោកស្រីមីស្ហែល បាស្ហឺឡេធ្វើដំណើរទៅកាន់តំបន់ស៊ីនជាំង នេះជាព័ត៌មានចុះផ្សាយដោយកាសែត South China Morning Post ក្នុងថ្ងៃព្រហស្បតិ៍ ទី២៧ មករា។ South China Morning Post ដែលបានដកស្រង់ប្រភពមិនបញ្ជាក់អត្តសញ្ញាណបានឲ្យដឹងទៀតថា ដំណើរទៅកាន់តំបន់ស៊ីនជាំងរបស់លោកស្រីបាស្ហឺឡេធ្វើឡើងនៅក្រោយការរៀបចំកីឡាអូឡាំពិករដូវត្រជាក់ក្នុងក្រុងប៉េកាំង។
ចុះផ្សាយនៅថ្ងៃ៖
ស្តាប់ - ០១:៥៣
ជម្រើសទៅកាន់តំបន់ស៊ីនជាំងរបស់ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សលោកស្រីមីស្ហែល បាស្ហឺឡេមិនមែនជាជម្រើសចៃដន្យទេ។ មិនចៃដន្យ ព្រោះក្រុមបស្ចិមប្រទេស និងក្រុមអង្គការក្រៅរដ្ឋាភិបាលបានចោទចិនពីបទបានអនុវត្តនយោបាយប្រឆាំងនឹងក្រុមជនជាតិភាគតិចអ៊ុយហ្គួរ និងសហគមន៍អ្នកកាន់សាសនាអ៊ីស្លាមផ្សេងទៀតនៅទីនោះ។ តាមក្រុមបស្ចិមប្រទេស និងក្រុមអង្គការក្រៅរដ្ឋាភិបាល ចិនបានសាង់សង់ជំរំមួយធំល្វឹងល្វើយដើម្បីដាក់ពួកអ៊ុយហ្កួរ និងធ្វើបាបពួកនេះតាមរយៈការធ្វើទារុណកម្ម និងបង្ខំឲ្យធ្វើការងារ។ សហរដ្ឋអាមេរិកថែមទាំងបានចង្អុលមុខចិនពីបទប្រល័យពូជសាសន៍លើពួកអ៊ុយហ្កួរ។
តែចិនតែងចេញមុខបដិសេធ និងអះអាងច្រើនដងថា ជំរំដាក់ពួកអ៊ុយហ្គួរមិនមែនជាជំរំលត់ដំ ធ្វើទារុណកម្មស្អីទេ តែជាជំរំអប់រំ រៀនសូត្រ ហ្វឹកហ្វឺនដើម្បីអនាគតពួកអ៊ុយហ្គួរទេតើ។ គួរបញ្ជាក់ថា ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សលោកស្រីមីស្ហែល បាស្ហឺឡេបានចរចាជាមួយរដ្ឋអំណាចចិនតាំងពីឆ្នាំ ២០១៨ មកម្ល៉េះស្តីពីលក្ខខណ្ឌនៃទស្សនកិច្ចរបស់លោកស្រីទៅកាន់តំបន់ស៊ីនជាំង។ គេនៅមិនទាន់ដឹងថា តើព័ត៌មានចុះផ្សាយដោយកាសែត South China Morning Post ពេលនេះជាដំណឹងពិត ឬមិនពិតទេ ព្រោះខណៈនេះ គេនៅមិនទាន់មានការបញ្ជាក់ពីក្រសួងការបរទេសចិន ពីបេសកកម្មការទូតចិននៅអង្គការសហប្រជាជាតិ ឬមួយពីអង្គការសហប្រជាជាតិនៅឡើយទេ។
អ្វីដែលគេដឹងដោយយោងតាមកាសែត South China Morning Post ដដែល ដំណើរទៅកាន់តំបន់ស៊ីនជាំងរបស់លោកស្រីមីស្ហែល បាស្ហឺឡេធ្វើឡើងនៅក្រោយការរៀបចំល្បែងកីឡាអូឡាំពិករដូវត្រជាក់ដែលគ្រោងបើកធ្វើពីថ្ងៃទី៤ ដល់ថ្ងៃទី២០ កុម្ភៈខាងមុខក្នុងក្រុងប៉េកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ