សភាបារាំងអនុម័តសេចក្តីសម្រេចចិត្ត ថ្កោលទោសអំពើប្រល័យពូជសាសន៍ ដែលចិនធ្វើទៅលើប្រជាជនអ៊ុយហ្គួរ
រដ្ឋសភាបារាំង កាលពីថ្ងៃព្រសហ្បតិ៍ទី២០មករា បានបោះឆ្នោតអនុម័តសេចក្តីសម្រេចចិត្តមួយ ដែលបានថ្កោលទោស ចំពោះអំពើប្រល័យពូជសាសន៍ ធ្វើដោយរដ្ឋអំណាចចិន ទៅលើជនជាតិអ៊ុយហ្គួរនៅខេត្តស៊ីនជាំង។ គួរកត់សំគាល់ថា នៅប៉ុន្មានថ្ងៃមុនការចាប់ផ្តើមបើកសម្ពោធ កម្មវិធីប្រកួតកីឡាអូឡាំពិករដូវរងារ នៅក្រុងប៉េកាំង សំឡេងថ្កោលទោស បរិហារការរំលោភសិទ្ធិមនុស្សនៅចិន បានបន្លឺកាន់តែខ្លាំងឡើង ពីសំណាក់ស្ថានប័នកំពូលរដ្ឋ នៅតាមបណ្តាប្រទេសមហាអំណាចមួយចំនួន មានដូចជាបារាំង អាមេរិក អង់គ្លេស និងកាណាដាជាដើម។
ចុះផ្សាយនៅថ្ងៃ៖
ស្តាប់ - ០២:៤៣
សេចក្តីសម្រេចចិត្ត ដែលត្រូវបានដាក់ស្នើដោយគណបក្សសង្គមនិយមបារាំង ត្រូវបានសមាជិកសភាបារាំង បោះឆ្នោតគាំទ្រ សឹងតែជាឯកច្ឆ័ន្ទ។ បើទោះជាគ្មានខ្លឹមសារអំណាចចាប់បង្ខំក្តី តាមរយៈសេចក្តីសម្រេចចិត្តនេះ រដ្ឋសភាបារាំងបានចាត់ទុកអំពើធ្វើទុក្ខបុកម្នេញ ដែលរដ្ឋអំណាចចិនបានធ្វើទៅលើប្រជាជនអ៊ុយហ្គូរ ថាមានទម្រង់ជាអំពើប្រល័យពូជសាសន៍ និងអំពើឧក្រិដ្ឋកម្មប្រឆាំងមនុស្សជាតិ។
រដ្ឋសភាបារាំង ក៏បានអំពាវនាវឲ្យរដ្ឋភិបាលបារាំង ត្រូវតែរូតរះ ចាត់វិធានការដូចគ្នានេះ ដើម្បីជំរុញឲ្យសហគមអន្តរជាតិ រួមគ្នាដាក់សំពាធទៅលើរដ្ឋាភិបាលចិន ឲ្យបញ្ឈប់ជាបន្ទាន់ នូវអំពើរំលោភសិទ្ធិមនុស្ស ដ៏ធ្ងន់ធ្ងរនេះ។ ក្រៅពីស្ថានភាពជនជាតិអ៊ុយហ្គួរ រដ្ឋសភាបារាំង ក៏បានថ្លែងការបារម្ភផងដែរ អំពីស្ថានភាពរងទុក្ខលំបាក របស់សហគមជនជាតិភាគតិចផ្សេងទៀត នៅតំបន់ស៊ីនជាំង ដែលកាន់សាសនាអ៊ីស្លាម។
នៅចំពោះអង្គសភា លោក Franck Riester តំណាងរដ្ឋាភិបាលបារាំង បានថ្លែងថា យោងតាមសក្ខីកម្មដ៏សែនតក់ស្លុតជាច្រើន ដែលលោកបានដឹង គឺពិតជាមានអំពើហិង្សា រំលោភសិទ្ធិមនុស្ស ធ្វើជាលក្ខណៈប្រព័ន្ធ ទៅលើប្រជាជនអ៊ុយហ្គួរពិតមែន។ តែយ៉ាងណា លោកបន្ថែមថា ការចាត់ថ្នាក់ថាអំពើទាំងនោះជាអំពើប្រល័យពូជសាសន៍ គឺវាជាតួនាទីរបស់ស្ថាប័នយុត្តិធម៌អន្តរជាតិ មិនមែនជារបស់រដ្ឋាភិបាលបារាំងឡើយ។
លោក Dolkun Isa ប្រធានសន្និបាតពិភពលោកនៃជនជាតិអ៊ុយហ្គួរ (CMO) បានអបអរសាទរ ចំពោះការសម្រេចរបស់សភាបារាំង ដោយលោកបានលើកឡើងថា វាគឺជាការបោះជំហានមួយបន្ថែមទៀត ក្នុងការឈានទៅទទួលស្គាល់ឲ្យបានទូលំទូលាយ ទូទាំងពិភពលោក ថាចិនបាននិងកំពុង ធ្វើអំពើប្រល័យពូជសាសន៍ លើប្រជាជនអ៊ុយហ្គួរ។
គួរបញ្ជាក់ថា យោងតាមការអះអាងរបស់អង្គការសិទ្ធិមនុស្សជាច្រើន បានឲ្យដឹងថា ចិនកំពុងតែបោសសំអាតជនជាតិអ៊ុយហ្គួរ នៅខេត្តស៊ីនជាំង។ ការបោសសំអាត ដែលរដ្ឋអំណាចចិន បានធ្វើឡើង តាមរយៈការរារាំងសិទ្ធិសេរីភាពជំនឿសាសនា ការបំផ្លាញវប្បធម៌ ទំនៀមទម្លាប់ប្រពៃណី អំពើទារុណកម្ម ចាប់បង្ឃាំង អំពើរំលោភសេពសន្ទវៈ ការលាងខួរក្បាល និងការចាប់ក្រៀវដោយបង្ខំ ដើម្បីឲ្យផុតពូជប្រជាជនអ៊ុយហ្គួរ ជាដើម ។ល។ ក្រៅពីនេះ នៅមានការជិះជាន់ កេងប្រវញ្ចកម្លាំងពលកម្ម បង្ខំឲ្យប្រជាជនអ៊ុយហ្គួរធ្វើការដោយបង្ខំ។
សូមរំលឹកដែរថា ក្រៅពីសភាបារាំង ដែលបានថ្កោលទោសចិន រដ្ឋាភិបាលអាមេរិក រដ្ឋសភាអង់គ្លេស ហូឡង់ និងកាណាដា ក៏បានអនុម័តសេចក្តីសម្រេចចិត្តស្រដៀងគ្នានេះដែរ ដោយបានចាត់ទុកថារដ្ឋាភិបាលចិន បានធ្វើអំពើប្រល័យពូជសាសន៍ និងអំពើឧក្រិដ្ឋប្រឆាំងមនុស្សជាតិ ទៅលើប្រជាជនអ៊ុយហ្គួរ។ កាលពីថ្ងៃពុធ អង្គការ Amnesty International បានអំពាវនាវថា សហគមអន្តរជាតិ មិនត្រូវចាញ់បោកការបំភ័ន្តភ្នែករបស់ចិនបានឡើយ ដោយមិនត្រូវភ្លេចថា ស្របពេលដែលកម្មវិធីកីឡាអូឡាំពិករដូវរងារនៅក្រុងប៉េកាំង ត្រូវចិនរៀបចំធ្វើយ៉ាងសម្បើមពេញមុខ តែនៅពីក្រោយនោះ គឺរដ្ឋចិនបានធ្វើអំពើរំលោភសិទ្ធិមនុស្ស ដ៏ធ្ងន់ធ្ងរបំផុត ទៅលើប្រជាជនអ៊ុយហ្គួរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ