ជំងឺរលាកថ្លើមថ្មី សម្លាប់ក្មេងយ៉ាងហោចបីនាក់នៅឥណ្ឌូណេស៊ី
ជាសរុប និងគិតត្រឹមថ្ងៃនេះ មានក្មេងយ៉ាងហោចណាស់ បួននាក់ នៅលើពិភពលោក ក្នុងនោះបីនាក់ជាកុមារឥណ្ឌូណេស៊ី បានស្លាប់ ដោយជំងឺរលាកថ្លើមថ្មីដ៏ចម្លែក មិនស្គាល់ប្រភព។ នេះបើតាមការជូនដំណឹងរបស់ក្រសួងសុខាភិបាលឥណ្ឌូណេស៊ី នៅថ្ងៃអង្គារទី ៣ឧសភា។
ចុះផ្សាយនៅថ្ងៃ៖
ស្តាប់ - ០២:០៥
កុមារឥណ្ឌូណេស៊ី បីនាក់ អាយុ ២ឆ្នាំ ៨ឆ្នាំនិង១១ឆ្នាំ បានស្លាប់បន្ទាប់ពីអាការៈសញ្ញា ក្តៅខ្លួន ឡើងលឿង ប្រកាច់ និងបាត់ស្មារតី។ នេះជាការលម្អិតរបស់អ្នកនាំពាក្យក្រសួងសុខាភិបាល ដោយពន្យល់ទៀតថា កុមារឥណ្ឌូណេស៊ីបានកើតជំងឺរលាកថ្លើមស្រួចស្រាវប្រភេទថ្មីដែលឆ្លងនិងវាយប្រហារជាពិសេសលើតែកុមារអាយុក្រោម១០ឆ្នាំ។
អាជ្ញាធរឥណ្ឌូណេស៊ី កំពុងតែសិក្សានិងវិភាគដើម្បីបញ្ជាក់ថា ការស្លាប់កុមារទាំងបីនេះ មិនមែនបណ្តាលមកពីវីរុសនៃជំងឺរលាកថ្លើមប្រភេទ A B C D និងE ដែលពិភពវេជ្ជសាស្ត្រធ្លាប់បានស្គាល់នោះទេ។ ក្រសួងសុខាភិបាលឥណ្ឌូណេស៊ី ក៏កំពុងដឹកនាំស្រាវជ្រាវរកមូលហេតុដែលបង្កឱ្យមានជំងឺនេះឡើងដែរ និងបានផ្តល់អនុសាសន៍ឱ្យប្រជាពលរដ្ឋទាំងអស់ ឆាប់រួសរាន់ នាំកូនមកមន្ទីរពេទ្យភ្លាម នៅពេលឃើញមានលេចអាការៈរោគគួរឱ្យសង្ស័យ។
រលាកថ្លើមស្រួចស្រាវប្រភេទថ្មីនេះ លេចឡើង តាមរយៈការបង្កឱ្យមានសញ្ញារោគមួយចំនួន ដូចជា រាករូស ចុះក្អួត ចុកពោះ និងរលាកថ្លើម ព្រមទាំងឡើងលឿងខ្លាំង។ ជំងឺថ្មី នេះ ធ្លាប់បានសម្លាប់ជីវិតកុមារយ៉ាងហោចណាស់ម្នាក់រួចមកហើយ។
ការលេចឡើងនៃជំងឺឆ្លងថ្មីលើតែក្មេង ជាភេរវសញ្ញាក្នុងពិភពវេជ្ជសាស្ត្រ។ ជាមួយនឹងក្តីព្រួយបារម្ភកាន់តែធំឡើងៗ អង្គការសុខភាពពិភពលោក បានកំណត់ឃើញមានករណីកើតជំងឺរលាកថ្លើមស្រួចស្រាវប្រភេទថ្មី ធ្ងន់ធ្ងរ លើកុមារចំនួន ១៧០នាក់ នៅក្នុង១១ប្រទេស ក្នុងរយៈពេលប៉ុន្មានសប្តាហ៍ចុងក្រោយនេះ។ តែបើគិតសរុបជាទូទៅ ត្រឹមថ្ងៃទី ១ឧសភា ករណីកើតជំងឺរលាកថ្លើមថ្មីអាចឡើងដល់២២៨នាក់ ក្នុង២០ប្រទេស និងជាង៥០ករណីទៀត កំពុងស្ថិតក្នុងការតាមដាន។ នេះបើតាមអង្គការសុខភាពពិភពលោកដែលបញ្ជាក់ថាករណីរលាកថ្លើមថ្មី បានកើតច្រើន គួរឱ្យភ្ញាក់ផ្អើល លើក្មេងអង់គ្លេស អៀរឡង់ ហូឡង់ដែលធ្លាប់តែមានសុខភាពល្អ។ នៅសហរដ្ឋអាមេរិក ភ្នាក់ងារសុខាភិបាលបានចេញផ្សាយការសិក្សាជុំវិញករណីសង្ស័យកុមារ៩នាក់ កាលពីថ្ងៃសុក្រថាពួកគេវិជ្ជមាននឹង adénovirus 41 ដែលជាភ្នាក់ងារឱ្យមានជំងឺរលាកក្រពះពោះវៀន។ ប៉ុន្តែកន្លងមក ភ្នាក់ងារបង្ករោគនេះ មិនដែលធ្វើឱ្យក្មេងមានសុខភាពល្អ ធ្លាក់ខ្លួនកើតជំងឺរលាកថ្លើមទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ