នាយករដ្ឋមន្ត្រីជប៉ុន បញ្ជាឱ្យបើកអង្កេតលើវិហារបង្រូបបង្រួមនិកាយមូន
លោកនាយករដ្ឋមន្ត្រីជប៉ុន ហ្វូមីអូ គីស្ហ៊ីដា បានដាក់បញ្ជានៅថ្ងៃចន្ទទី ១៧ តុលា ២០២២ ឱ្យរដ្ឋាភិបាលបើកការស៊ើបអង្កេតលើវិហារបង្រួបបង្រួម និកាយមូន។ និកាយមូន បានរងការបន្ទោសច្រើនយ៉ាង តាំងពីមានឃាតកម្មលើរូបអតីតនាយករដ្ឋមន្ត្រី ស្ហ៊ីនហ្សូ អាបេ កាលពីខែកក្កដាមក។ ខ្មាន់កាំភ្លើងចង់សម្លាប់លោកស្ហ៊ីនហ្សូអាបេ ក៏ដោយហេតុតែយល់ថាអតីតនាយករដ្ឋមន្ត្រីស្និទ្ធិនឹងនិកាយមូន ដែលម្តាយបានធ្វើទានរហូតក្រខ្លួន។
ចុះផ្សាយនៅថ្ងៃ៖
ស្តាប់ - ០២:០៥
នៅចំពោះមុខសភា នាថ្ងៃ ចន្ទនេះ លោក នាយករដ្ឋមន្ត្រីជប៉ុន គីស្ហ៊ីដា បានអះអាងថា មានអ្នករងគ្រោះច្រើន ធ្លាក់ខ្លួនក្រ ឬប្រឈមនឹងវិបត្តិគ្រួសារយ៉ាងធ្ងន់ធ្ងរដោយសារ វិហារបង្រួបបង្រួមនិងក្រុមនិកាយសាសនានេះ។ ហើយការខិតខំប្រឹងប្រែងរបស់រដ្ឋាភិបាលមិនគ្រប់គ្រាន់ទេ ហេតុដូច្នេះហើយបានរដ្ឋាភិបាលមានសិទ្ធិត្រូវតែបើកអង្កេតលើវិហារសាសនារបស់ក្រុមនិកាយនេះ ស្របតាមច្បាប់ស្តីពីអង្គការសាសនា។
ជាងនេះទៅទៀត រដ្ឋាភិបាលក៏នឹងសើរើមើលច្បាប់ខ្លះដើម្បីឈានទៅលុបកិច្ចសន្យា និងពង្រឹងកុំឱ្យមានការល្មើសរំលោភសិទ្ធិកុមារ ព្រមទាំងជួយកូនៗរបស់ក្រុមសាសនិកនិកាយសាសនាទាំងឡាយឱ្យបានទទួលការអប់រំ និង ការងារធ្វើ។ នេះបើតាមសេចក្តីប្រកាសបន្ថែមរបស់លោកនាយករដ្ឋមន្ត្រី។
បើតាមបណ្តាញឃោសនាព័ត៌មានជប៉ុន ការអង្កេតដែលលោកនាយករដ្ឋមន្ត្រីស្នើឡើងនេះ សំដៅវែករកឱ្យឃើញថា តើវិហារបង្រួបបង្រួម ពិតជាមានសកម្មភាពធ្វើឱ្យប៉ះពាល់ដល់សុខុមាលភាពសាធារណៈ ឬប្រព្រឹត្តទង្វើផ្ទុយពីលក្ខន្តិកៈសាសនាមែនដែរឬយ៉ាងណា ?
សម្រាប់ខ្មាន់កាំភ្លើងដែលធ្វើឃាតអតីតនាយករដ្ឋមន្ត្រីអាបេ គ្រួសារត្រូវហិនហោចទ្រព្យសម្បត្តិ ដោយហេតុតែម្តាយយកលុយទៅឱ្យវិហារបង្រួបបង្រួមនិកាយមូន។ អតីតសមាជិកអង្គការនិកាយមូន ជាច្រើន ក៏បានចេញមុខរិះគន់ជាសាធារណៈ ដោយចោទថាអង្គការបានកំណត់កម្មវត្ថុតម្រូវឱ្យបរិស័ទប្រាក់វិភាគទាន។ ប៉ុន្តែអង្គការបានបដិសេធទាំងស្រុង។
ប្រសិនបើការស៊ើបអង្កេតរកឃើញដូចការចោទប្រកាន់មែន នោះនិកាយមូននឹងបាត់បង់នាមជាអង្គការសាសនា (រំលាយ) បាត់បង់ការអនុគ្រោះពន្ធ តែនិកាយនេះនៅអាចបន្តដំណើរការបាន។
រដ្ឋាភិបាលជប៉ុន មិនងាយប្រើវិធានការបែបនេះទេ ដោយខ្លាចប៉ះពាល់ដល់សេរីភាពផ្នែកជំនឿសាសនា។ ប៉ុន្តែការទម្លាយព័ត៌មានស្តីអំពីទំនាក់ទំនងរបស់អ្នកនយោបាយជប៉ុនកំពូលជាមួយនិកាយមូន បានរួមចំណែកធ្វើឱ្យរដ្ឋាភិបាលធ្លាក់ប្រជាប្រិយភាពយ៉ាងខ្លាំង។ សូមរំលឹកថា ជប៉ុនធ្លាប់បានប្រើច្បាប់រំលាយអង្គការសាសនាពីររួចមកហើយ ក្នុងនោះមានមួយជានិកាយAum Shinrikyo ដែលធ្លាប់បង្កភេរវកម្មបាញ់ឧស្ម័នសារាំង ក្នុងរថភ្លើងក្រោមដី នៅក្រុងតូក្យូ កាលពីឆ្នាំ១៩៩៥។ នេះបើតាមសារព័ត៌មានជប៉ុនដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ