មហាសេដ្ឋីចិនក្នុងវិស័យធនាគារម្នាក់ បានបាត់ខ្លួន ដោយចម្លែក
លោក បៅ ហ្វាន Bao Fan អ្នកជំនួញដ៏ល្បីម្នាក់ក្នុងពិភពបច្ចេកវិទ្យា នៅប្រទេសចិន បានបាត់ខ្លួន ដោយចម្លែក តាំងពីដើមសប្តាហ៍មក។ នេះបើតាមសេចក្តីថ្លែងការណ៍របស់ក្រុមហ៊ុន ដោយមិនផ្តល់សេចក្តីពន្យល់អ្វីលម្អិតទេ។ ការបាត់ខ្លួនមេដឹកនាំក្រុមហ៊ុន បានធ្វើឱ្យភាគហ៊ុននៅហុងកុងដាំក្បាលធ្លាក់ចុះ៣០%។
ចុះផ្សាយនៅថ្ងៃ៖
ស្តាប់ - ០២:៣១
កើតនៅឆ្នាំ១៩៧០ បៅ ហ្វាន Bao Fan ជាស្ថាបនិកក្រុមហ៊ុនChina Renaissance ដែលជាក្រុមហ៊ុនធនាគារឯកជនដ៏ធំបំផុតមួយនៅចិន ជំនាញខាងវិនិយោគក្នុងវិស័យបច្ចេកវិទ្យាទំនើបជាន់ខ្ពស់ និងមានបុគ្គលិកធ្វើការចំនួនជាង៧០០នាក់ នៅទូទាំងពិភពលោក មានជាអាទិ៍នៅសិង្ហបុរីនិងសហរដ្ឋអាមេរិក។ ធនាគារនេះគ្រប់គ្រងភាគហ៊ុនរបស់ក្រុមហ៊ុនឌីជីថលជាច្រើន រាប់ទាំងក្រុមហ៊ុនពាណិជ្ជកម្មអនឡាញ JD.com Didi ផង។ ប៉ុន្តែដោយគ្មានមូលហេតុ ស្រាប់តែបាត់ដំណឹងលោកអគ្គនាយកឈឹង។
នៅក្នុងសេចក្តីថ្លែងការណ៍ China Renaissance បានអះអាងថា អវត្តមានរបស់លោកអគ្គនាយកក្រុមហ៊ុន ហាក់ដូចជាគ្មានពាក់ព័ន្ធទេនឹងសកម្មភាពឬប្រតិបត្តិការរបស់ក្រុមហ៊ុនដែលបន្តមានដំណើរជាធម្មតា។ គ្រាន់តែឮដំណឹងនៃការបាត់ខ្លួនភ្លាម ភាគហ៊ុនរបស់ក្រុមហ៊ុនChina Renaissance បានធ្លាក់ចុះ៣០%នៅហុងកុង នៅថ្ងៃ សុក្រទី ១៧កុម្ភៈ។
ការបាត់ខ្លួនមេដឹកនាំក្រុមហ៊ុនយូរអាចនឹងបង្កឱ្យមានផលប៉ះពាល់ច្រើន ព្រោះលោកBao Fan ជាមនុស្សសំខាន់របស់ក្រុមហ៊ុន។ នេះបើតាមការវិភាគរបស់អ្នកជំនាញ ដែលភ្នាក់ងារBloomberg បានស្រង់មកចុះផ្សាយ។
ករណីបាត់ខ្លួនដ៏ចម្លែកបែបនេះ បានរំលឹកឱ្យឃើញករណីបាត់ខ្លួនផ្សេងៗ មានជាអាទិ៍ ការបាត់ខ្លួនមួយរយៈរបស់លោកមហាសេដ្ឋីម្ចាស់ក្រុមហ៊ុនអាលីបាបា ជេក ម៉ា កាលពីឆ្នាំ២០២០ ឬមហាសេដ្ឋីចិនសញ្ជាតិកាណាដា សៀវ ជៀនហួ Xiao Jianhua កាលពីឆ្នាំ២០១៧ ដែលកាលណោះ លោក សៀវ ជៀនហួ ជាអ្នកមានជាងគេបំផុតម្នាក់នៅចិន មានប្រាក់សរុបប្រមាណ ៦ពាន់លានដុល្លារ។ ចិនបានកាត់ទោសអតីតមេជំនួញម្នាក់នេះ កាលពីឆ្នាំទៅឱ្យជាប់ពន្ធនាគារ១៣ឆ្នាំ ពីបទលួចបន្លំ។
ចុះស្ថាបនិកក្រុមហ៊ុន China Renessance អាចពាក់ព័ន្ធនឹងអ្វី ? អ្នកនាំពាក្យក្រសួងការបរទេសចិន បានអះអាងថាគ្មានព័ត៌មានអ្វីទាក់ទងនឹងការបាត់ខ្លួនរូបអគ្គនាយកក្រុមហ៊ុននេះទេ។ ប៉ុន្តែបើតាមកាសែតពាណិជ្ជកម្មក្នុងស្រុក Caixin អាជ្ញាធរចិនធ្លាប់បានឃាត់ខ្លួនប្រធានក្រុមហ៊ុនChina Renaissance លោក Cong Lin កាលពីខែកញ្ញាកន្លងទៅ។ ការបាត់ខ្លួននេះសង្ស័យតែជាយុទ្ធនាការបោសសម្អាតវិស័យហិរញ្ញវត្ថុរបស់លោកប្រធានាធិបតីស៊ីជីនពីងក្នុងក្របខ័ណ្ឌប្រយុទ្ធប្រឆាំងនឹងអំពើពុករលួយចាប់ផ្តើមឡើងវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ